भांगरभूंय | प्रतिनिधी
म्हापशें: पर्यटन भागधारकांनी कायदो हातांत घेवचो न्हय, कारण ह्याच गोंयांतल्या पर्यटन उद्देगाचेर दीर्घकालीन परिणाम जावंक शकता अशें आवाहन मुख्यमंत्री डॉ. प्रमोद सावंत हांणी केलें. हालींच कळंगूटे जाल्ल्या पर्यटकां वेल्या हल्ल्यांची दखल मुख्यमंत्र्यांनी घेवन हें आवाहन केलें.
कळंगूटे 100 कोटी रुपया खर्च करून भुंयगत वीज वाहिनी आनी रस्त्याच्या दुरुस्ती प्रकल्पाची बुन्याद मुख्यमंत्र्यां हस्तुकीं बुधवारा सांजवेळा घाली. साळगांवां नवें जीआयएस वीज उपकेंद्र तें कळंगूट, नागवा, साळगांव, बादें तशेंच बागा हांगासरले प्रस्तावीत 33 केव्ही वीज प्रकल्पाक ही भुंयगत वीज जोडणी दितले.
ह्या वेळार आमदार केदार नायक, मायकल लोबो, डिलायला लोबो, कळंगूटचे सरपंच जोजफ सिक्वेरा तशेंच पंचायत मंडळ आनी हेर मानेस्त हाजीर आशिल्ले.
जेन्ना रॅस्टोरंण्ट आनी शॅकांनी पर्यटकां मदीं झगडीं जातात आनी खुनाचे प्रकार घडटात, तेन्ना फुडारांत पर्यटक गोंयांत येवपाक भियेतात. पर्यटकां बरोबर किरकोळ समस्या आसल्यो तरी 100 क्रमांकाचेर संपर्क सादून पुलिसांक आपोवंक शकतात अशें मुख्यमंत्र्यांनी सांगलें.
मुखार उलयतना तांणी म्हणलें, आमी शॅक घेतात आनी हेरांक चलोवपा खातीर दितात. ते हेर राज्यांतल्यान लोकांक कामां खातीर हाडटात. उपरांत जेन्ना समस्या निर्माण जाता तेन्ना संवाद सादचे पयलींच ते चाकू घेतात आनी हल्लो करतात. कारण थंय अशे मानसीकतेंतले लोक आसतात. तशेंच ह्या घडणुकांचो परिणाम बरोच काळ तिगून उरता. 10-15 वर्सा उपरांतूय लोक म्हणटले पर्यटक गोंयांत गेले आनी थंय तांची हत्या जाली. ह्या परिणामाक लागून गोंयांत येवपी पर्यटकांची संख्या उणी जायत आसा अशें तांणी म्हणलें.
सरकारान गुन्यांव आडावपा खातीर भाडेकार पडटाळणी मोहीन सारके विवीध उपक्रम हातांत घेतल्यात. गोंयांत बलात्कार आनी खुनाचीं प्रकरणां वाडल्यांत. गोंयांत येवपी लोकांचे चड करून कामगार वर्गाची पुलीस पडटाळणी करप गरजेची आसा. जेणे करून ते गुन्यांवांनी वांटेकार आसतना तांकां सोदूंक येतलें. पर्यटन आनी हांगा येवपी लोकांक लागून गोंय बदलत आसा, आनी आमकां ह्या बदलां बरोबर जगपाचें आसा अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
