भांगरभूंय | प्रतिनिधी
पर्यटकांक विक्रेत्यां पसून मेळटली मुक्ती
खरेदीची सक्ती केल्यार 1 लाखां मेरेन दंड
दर्यादेगांचेर गाडी चलोवप्यांकूय पडटलो खार
भांगरभूंय । प्रतिनिधी
पणजी : दर्यादेगां सयत हेर पर्यटन थळांचेर वस्तू खरेदी करपा खातीर पर्यटकांचे फाटीक लागपा सयत विवीध सेवांच्यो तिकेटी खरेदी करपाची सक्ती केल्यार आतां 5 हजार ते 1 लाख रुपया मेरेन दंड जातलो. गोंय पर्यटन थळां संरक्षण आनी दुरुस्ती विधेयक 2025 सभाघरांत चर्चे उपरांत मंजूर जालें. आमदार कृष्णा साळकार हांणी सुचयिल्ली दुरुस्ती लेगीत मान्य केली. पर्यटन मंत्री रोहन खंवटे हांणी हें विधेयक चर्चे खातीर मांडून संमत करून घेतलें.
आमदार कृष्णा साळकार तशेंच काँग्रेसीचे आमदार अॅड. कार्लोस फेरेरा हांणी दुरुस्त्यो सुचयल्यो. दर्यादेगांचेर टावट्सां कडल्यान बेकायदो तिकेट विक्री करतात. लमाणी तशेंच हेर विक्रेत्यां कडल्यान वस्तूंचे खरेदी खातीर हट्ट धरतात. ह्या प्रकारां खातीर आतां खर दंड जातलो.
उक्तडाचेर अन्न शिजोवप, सोरो पियेवन बाटल्यो उडोवप, दर्यादेगांचेर गाडी चलोवप हे खातीर लेगीत दंड जातलो. दंडाची रकम 5 हजार ते 1 लाख रुपया मेरेन करचे खातीर कलम 10 त दुरुस्ती आसा. दर दोन वर्सांनी दंडाचे रकमेचो नियाळ घेतले. हे खातीर कलम 10 ए चो आस्पाव केला.
दोन विधेयकां सभाघरांत सादर
कोयर उक्तडार उडयल्यार 3 लाख रुपयां मेरेनच्या दंडाची तजवीज आशिल्लें गोंय कोयर नियंत्रण दुरुस्ती विधेयक मुख्यमंत्री डॉ. प्रमोद सावंत हांणी सभाघरांत सादर केलें. तशेंच गोंय भौशीक विद्यापीठ विधेयक 2025 मुख्यमंत्री डॉ. प्रमोद सावंत हांणी सादर केलें. म्हाविद्यालयांचें क्लस्टर स्थापन करपाची तजवीज विधेयकांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
