भांगरभूंय | प्रतिनिधी
पणजी: संवसारीक पर्यटन दीस 2024 निमतान गोंय सरकाराच्या पर्यटन खात्यान मिरामारा विवांता गोवा हांगा पर्यटन भागधारकां खातीर आवटरीच कार्यावळीचें येसस्वी आयोजन केलें. हे कार्यावळीक जांणी गोंयच्या पर्यटन मळार बरें आनी म्हत्वाचें योगदान दिलां अशा मुखेल भागधारकांनी हाजेरी लायली.
हे कार्यावळींत पर्यटन मंत्री रोहन खंवटे आनी पर्यटन संचालक सुनील अंचिपाका हांणी भागदारकां कडेन संवाद आनी सहयोग वाडोवपाचेर भर दिलो. पर्यटन मळा वेले वॉटरस्पोर्ट्स (उदका खेळ), बीच शॅक्स, वॉटरपार्क, वेलनेस पर्यटन, रॅस्टोरंण्ट संघटणा आनी हेर भागधारक, म्हायती आनी अणभव सामायीक करपा खातीर तशेंच गोंयच्या पर्यटन विकासाच्या विवीध पैलुंचेर चर्चा करपा खातीर ह्या वेळार हाजीर आशिल्ले.
हे कार्यावळींत पांच मुखेल भागधारकांनी गोंयच्या पर्यटन मळा वेल्या विवीध पैलूंचेर उजवाड घालो.
कार्यावळीची सुरवात पर्यटन संचालक सुनील अंचिपाका हांच्या येवकाराच्या उलोवपान जाली. अंचपिका हांणी गोंयच्या पर्यटन मळार सहयोग आनी नाविन्यपूर्णतायेच्या गरजांचेर भर दिलो. तशेंच पर्यटन खात्या कडल्यान सुरू आशिल्ल्या यत्नांचेर उजवाड घालो आनी नव्या पर्यटन उपक्रमां खातीर सरकाराच्या तेंक्याचो पुनरुच्चार केलो.
कार्यावळींत उलयतना पर्यटन मंत्री रोहन खंवटे हांणी सहकार्यात्मक यत्नांचे म्हत्व आनी पर्यटन मळार नवी संकल्पना सादर करपाचेर भर दितना सांगलें, तुमकां तेंको दिवन गरजेची आशिल्ली कसलीय मजत पुरोवपा खातीर आमी तयार आसात. तशेंच गांवांतल्या पर्यटनाचो सांबाळ आनी प्रचार करपा खातीर आमी वचनबद्ध आसात. हाचे बगर आमी आंतरराष्ट्रीय पर्यटकां खातीर तयार केल्ल्या नव्या पॅकेजी सयत वेलनेस पर्यटन सुरू केलां हाका लागून वाडट्या मळार आमी दीत आशिल्ल्या सेवांचो आनीक विस्तार जायत आसा अशें तांणी म्हणलें.
ह्या वेळार वेगळ्यावेगळ्या मानेस्तांची उलोवपां जालीं. जीटीडीसीचे सरवेवस्थापक गॅवीन डायस हांणी उपकार आठोवन कार्यावळीची सांगता जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
