भांगरभूंय | प्रतिनिधी
गांवगिर्या वाठारांतलीं सैमीक थळां आनी कांय अपरिचीत घसघशे पर्यटकांक दाखोवपाचेर भर
पणजीः गोंयच्या जल खेळांची पर्यटकांक मजा घेवपाक मेळची आनी विशेश म्हळ्यार ’मान्सून पर्यटन चालीक लावपा खातीर’ राज्याच्या पर्यटन खात्यान एअरलायन्स आनी ट्रॅव्हल कंपन्यां वांगडा भागीदारी केल्ल्याची म्हायती मुखार आयल्या. ह्या उपक्रमा खाला पावसांतल्या गांवगिर्या वाठारांतलीं सैमीक थळां आनी कांय अपरिचीत घसघशे पर्यटकांक दाखोवपाचेर भर दितले.
‘दर्या पल्तडीं गोंय’ हे मोहिमे खाला पावसाच्या, सांस्कृतीक उत्सवांचेर भर दिली. सांजाव, चिखल कालो आनी हेर थळावे सण- उत्सव हांचो आसपाव आसा. ह्या उपक्रमा खाला पर्यटन विभागान एअरलायन्स, ऑनलायन ट्रॅव्हल एजंट्स आनी आदरातिथ्य संस्था हांचे वांगडा भागीदारी करून आकर्शक टूर पॅकेजीस आनी खासा पावसाचे अणभव तांचे मुखार सादर केले. गोंयां कडेन चडांतचड पर्यटक आकर्शीत जावचे खातीर यत्न केले, अशी म्हायती अधिकार्यांनी दिली.
पर्यटकांक म्हादय न्हंयेचें, व्हाळा, घसघश्यांचें सैमीक सौंदर्य पळोवपाक मेळचें, हाका लागून गोंय पर्यटन विकास महामंडळ आनी ब्रिटीश ऍडव्हेंचर स्पोट्र्स हांच्या जोड पालवान सत्तरींत म्हादय न्हंयेच्या पात्रांत ‘वॉटर राफ्टिंग’ ह्या वॉटर स्पोर्ट्साची सुरवात केल्या. सध्या गोंयांत पावसान विसव घेतला. तरी पावस उणो जाले उपरांतूच सुरक्षेची काळजी घेवनच ‘वॉटर राफ्टिंग’ सुरू करतले.
पावसांत जर तुमकां भोंवडेर वचपाक जाय जाल्यार तुमची गोंयांतूच सुंदर थळांक भेट दिवपाक शकता. चोर्ला घांट, दूदसागर घसघसो, भगवान महावीर वन्यजीव अभयारण्य, तांबडी सुर्ला घसघसो, हरवळे घसघसो, नेत्रावळी घसघसो ह्या सुवतांक तुमी भेट दिवपाक शकतात. मान्सूनचे सुरवातेकूच राज्यभर पडिल्लया घोग्यांनी पावसान चडश्या सुवातांचे घसघशे सुरू जाल्यात. मात प्रशासनान जतनाय घेवची म्हणून दोनूय जिल्ह्यांतले धोको निर्माण करपी घसघशे, खाणींचे खड्डे, न्हंयो, तळीं आनी हेर उदकास्रोतांनी नागरिकांनी प्रवेश करपाचेर आनी पेंवपाचेर ६० दिसां खातीर बंदी घातली. दोनूय जिल्होधिकार्यांनी तशे आदेश जारी केल्यात.
फाटल्या कांय वर्सां सावन घसघशे, व्हाळ, तळ्यांनी बुडून मरण जावपाच्यो घडणुको घडटात. २०२३ वर्सा सांगेच्या मैनापी घसघश्याचेर न्हांवपा खातीर गेल्ल्या दोगांक मरण आयलें. पावसाच्या दिसांनी चडश्या सुवातांवेल्या घसघश्यांचेर बुडून मरण आयिल्लें. पावसाच्या दिसांनी चडश्या सुवातांच्या घसघश्यांचेर उदकाचो प्रवाह वाडटा आनी हाका लागून अपघात जावपाचो धोको अदीक आसता. विशेश म्हळ्यार असल्या पर्यटन स्थळांचेर नियंत्रण हाडपाचें व्हड आव्हान पुलीस प्रशासना मुखार आसता. हाका लागून प्रशासनान जतनाय घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
