भांगरभूंय | प्रतिनिधी
पणजी : गोंयांत येवपी पर्यटकांची म्हायती सहज उपलब्ध जावचे खातीर एप्रील सावन संबंदीत हॉटेलांनी पर्यटकांची म्हायती खात्याच्या पोर्टलाचेर अपलोड करप सक्तीचे करतले, अशें पर्यटन मंत्री रोहन खंवटे हांणी सांगलें.
बुधवारा, २६ मार्चाक गोंय विधानसभेंत अर्थसंकल्प सादर करतले. ताचे पयलीं प्रस्न जापेचें सत्र जातलें. मजगतीं रिव्हॉल्युशनरी गोवन्सचे आमदार विरेश बोरकार हांणी विवीध देशांतल्यान गोंयांत येवपी पर्यटकांची म्हायती दिवंक नाशिल्ल्याचो मुद्दो हजर करून पर्यटक मंत्र्यांक जाप विचारली. उपरांत पर्यटन खात्या खाला फाटलीं तीन वर्सां कितल्यो आनी खंयच्यो सुविधा निर्माण केल्यो हाची म्हायती कलम ३७ चें कारण दिवन न्हयकारपाक शकना. नक्की हातूंत घोटाळो आसा, अशें म्हणीत आमदार बोरकरांनी मंत्री खंवटे हांचे कडेन वाद घालो.
ह्या वेळार सभापती तवडकार हांणी मदीं पडून आमदार बोरकार हांकां धाक दिली. उपरांत आमदार बोरकार हांणी सभाघराच्या हौदांत धांव घेवन आपलें म्हणणें मांडपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
