भांगरभूंय | प्रतिनिधी
गोंयांत पर्यटनाचो थारावीक मोसम आसतालो. तेन्नाच पर्यटकांची भिरीं दिसतालीं. मात, हालींच्या वर्सांनी वर्सूयभर देशी-विदेशी पर्यटक खांची-कोनशांनी पळोवंक मेळटात. आयज पर्यटन दर्यावेळां पुरतें मर्यादीत उरूंक ना. तातूंत बदल जाला. आयज गोंय म्हणल्यार फक्त ‘खाओ, पिओ, मजा करो’ अशें समीकरण जालां. तातूंत वायट कांय ना. मात गुन्यांवाचो ताका स्पर्श जाता, तेन्ना ही संकल्पनाच खतावता. गोंयांत येवपी भोवतेक पर्यटक दर्यावेळांचेर वतातूच. मात, कांय पर्यटकांक घुंवळे वखदां, सोरो आनी हेर कांय प्रकार करीनशे दिसतात तें वायट. मागीर मारामारी, फारपेट, खून असलेय प्रकार जातात. हाका लागून राज्याचें नांव पेड्डेर जाता. आमदार मायकल लोबो हांणी ह्या घडणुकांचेर विधानसभेंत उजवाड घालो. ते सरबराय मळाचेर वावुरतात, तांचो मतदारसंघूय दर्यादेगे वयलो. म्हणटकूच पर्यटन मळाचेर कितें चलता तें तांचे बगर आनीक कोणाक चड खबर आसतलें?
येरादारी पुलीस आनी हेरां कडल्यान (कोण काय हे?) पर्यटकांची सतावणूक जाता. सुविधा नात, लायटीची समस्या अशा साबार मुद्यांचेर मायकल हांणी विचार उक्तायले. ताचेर विचार जावप गरजेचें. कारण सध्या पर्यटन होच गोंयाक येणावळ दिवपी मुखेल उद्देग. ताचे फाटोफाट कॅसिनो दुडू दिता. अर्थांत हो दुडू राज्या खातीर वापरप कांय जाणांक आवडना. खणी बेगीन सुरू जाल्यो जाल्यार राज्याक थाकाय मेळटली, हातूंत दुबाव ना. पूण पर्यटनाची भांगराचें तांतीं दिवपी कोंबी आमी सांबाळूंक जाय. काणयेंतले सारकें एकाच वांगडा तांतयां मेळोवपाचें वसवशेंपण केल्यार तें म्हारग पडटलें. येरादारी पुलीस भायल्या राज्यांतली गाडी दिसली काय योग्य कागदपत्रां आसुनूय तालांव घालतात, असो सगल्यांचोच आरोप आसा. तातूंत तथ्य आसतलें. पूण ह्यो गाडयो तपासच्योच पडटात. कारण गोंयांत गुन्यांवकारी वाडल्या. सगलेच पर्यटक (वा गोंयकार) गुन्यांवकार वा वायट हेतान हेडपी मनीन न्हय. तरीय गाडयेंत गुन्यांवकार आसात, शस्त्रां आसात, सोरो, घुंवळे वखदां आसात काय नात, तें पळोवचेंच पडटा. नाजाल्यार तें गोंयाक म्हारग पडूं येता. तरीय येरादारी पुलिसांनी हे सुचोवणेचेर विचार करूंक फावो. हें यूग सोशल मिडियाचें. कोणें दिशाभूल करपी पोस्ट पसून घालो जाल्यार पसून ताचेर भावार्थान विस्वास दवरपी लाखांनी नेटिझन्स आसात. म्हणटकूच आमी सगल्यांनीच सादूर रावंक जाय. पर्यटनांक बऱ्यो सुविधा मेळनात, अशी खंत आमदार मायकल लोबो हांणी उक्तायली. दर्यादेगांचेर जिवरक्षक आसात. न्हावपी पर्यटकांक कपडे बदलपाची, अपघात जाल्यार प्रथमोपचाराची सुविधाय कांय कडेन आसा. पूण ज्यो वायट प्रवृत्ती ह्या मळार घुसल्यात, तांचो पयलीं बंदोबस्त जाय. हें चड म्हत्वाचें.
आनीक एक म्हत्वाची गजाल उदकाचे खेळ, खाणां- जेवणां. गोंय हें देशांतलें एक म्हारगें राज्य. दर्यावेळो तर सगल्यांत म्हारग. ओगीच कांय पर्यटक स्टोव्ह बी हाडून रस्त्या कुशीक रांदिनात. पर्यटन खात्यान हाचेर उपाय सोदपाक जाय. एमआरपी छापिल्ले जिनस पसून चड मोलान विकपाचे प्रकार घडटात… आनी ‘इतलें म्हारग कित्याक रे?’ अशें थंय विचारपाची माणसुकी ना. गोंयांतल्या कांय दर्यां वेळांचेर सांजवेळार कुटुंबाक घेवन भोंवप म्हणल्यार धाडसूच. घुंवळे वखदां सयत अटक, ही सदचीच खबर. मसाजाच्या नांवा खाला कितें चलता, तें सगले जाणात. पूण तें चालूच उरतलें. कारण ती आतां परंपरा जाल्या… हे सगले गैरप्रकार, गुन्यांव बंद केले बगर पर्यटनाक लागिल्लें खत पुसून वच्चें ना. उदका खेळ वायट न्हय. पूण तांणी सुरक्षेचे कितें उपाय घेतल्यात ताची तपासणी जावंक जाय. फाटीं दक्षीण गोंयांत उदका खेळा वेळार एकल्याक मरण आयिल्लें. तेन्ना परवानो नासतना हें खेळ चलतात, अशें जाहीर जाल्लें. परवानो नासतना कसलोय वेवसाय करपाक आतां धाडस नाका. संबंदीत यंत्रणेची बोल्सां गरम केलीं काय तुमकां कोण हटकिना. गुन्यांवांच्यो खांदयो बेणून कांय जावचें ना, पाळां मुळां खणून काडप होच ताचे वयलो उपाय… आनी तो करपी मनीस प्रामाणीक, धाडशी, निसुवार्थी आसप गरजेचें. असले मनीस आयज उणेच आसात. तांकां चेपून दवरपी मात वाडल्यात.
आमदार मायकल लोबो हांणी पर्यटन मळा विशीं हुस्को उक्तायला तो योग्यूच. आतां तांणी हेर मळां विशींय ‘घरचो आहेर’ दिवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
