भांगरभूंय | प्रतिनिधी
पर्यटनाच्या मळाचेर आमचें सुपुल्लें गोंय जितलें लोकप्रीय आसा, तितलीच ताची बदनामीय जाल्या. घुंवळे वखदांचो हुंवार, दर्यादेगां वयले गुन्यांव, पर्यटकांची सतावणूक, पर्यटना कडेन संबंदीत म्हारगाय अश्या जायत्या कारणांक लागून पर्यटक गोंयाक नांवां दवरतात. तरीय पर्यटक व्हड संख्येन गोंयांत येतात. हांगाचे सरबरायेचो, सैमाचो आनंद घेतात. ट्रॅव्हल एजंटस असोसिएशन ऑफ इंडियाच्या अभ्यासा प्रमाण, विकेंड पर्यटनांत गोंय देशांत पयल्या क्रमांकाचेर आसा. ह्या सप्तकांत शुक्रारा प्रजासत्ताक दिसाची सुटी आसा, मागीर शेनवार, आयतार. ताका लागून पर्यटकांच्यो घिट्ट्यो गोंयांत पडटल्यो हें सांगपाक ज्योतिशी नाका. कारण, हाचे आदीं लागून आयिल्ल्या सुटयां वेळार गोंय पर्यटकांनी भरिल्लें दिसलां. हो घोंगो कायम उरतलो, हे खातीर आमकां तरातरांचें उपाय घेवचे पडटले.
गोंया उपरांत पुद्दुचेरी, जयपूर, उटी ह्या थळांक देशी पर्यटक पसंत करतात. गोंयांत हवामान बरें आसता. हेर थळांचे तुळेन रावपाचे, खावपा- जेवपाचे दर थीर आसतात, अशें ट्रॅव्हल एजंटस असोसिएशन म्हणटा. मात, कांय पर्यटकांच्या मतान, गोंयांत थोडे तोंडाक येता तितले पयशे घेतात! ते विशींचे व्हिडिओय अदीं मदीं व्हायरल जातात. हो जमानो सोशल मिडियाचो. म्हणटकच सकाळीं अपलोड केल्लो व्हिडिओ, सांजवेळ मेरेन संवसारभर पातळटा. सरकारी यंत्रणांक हाचेर नियंत्रण दवरचें पडटलें. कारण खरें आसूं वा फट, पूण असल्या वैयक्तीक अणभवांचेर लोक रोखडेच विस्वास दवरतात. तोंडी प्रचारूय जाता. हो बरो आनी घातकूय. देखून जे लोक पर्यटकां कडेन चुकीचें वागतात, तांच्या नांकांत दावें घालचेंच पडटलें. नाजाल्यार हेर वेवसायिकांक तें म्हारग पडूं येता. फाटल्या कांय दिसांनी तर सवाय भितर हाॅटेल दितां म्हूण सांगून पर्यटकांक लुटपाचे प्रकार जाल्यात. पुलिसांनी दुबावितांक अटकूय केल्या. हातूंत कांय हाॅटेल कामगार सांपडल्यात. चडशे भायले. म्हणटकच पर्यटकांक ड्रग्स विकपाक, लुटपाक लोक खासा गोंयांत येतात काय, हाचो सोद पुलिसांक घेवचो पडटलो. फाटीं सनबर्न जालें, तेन्ना कितलेशेच मोबायल फोन चोरपी सांपडिल्ले! गोंयच्या पर्यटनाक नेमकें कितें बादा हाडपाक शकता, हें सरकारी यंत्रणांक खबर आसतलेंच. फुडाराक कितें जावंक शकता, हाचोय अदमास आसतलो. म्हणटकच आतां पसूनच उपाय, येवजण्यो जाय!!
हालींच अयोध्येंत रामलल्लाचें देवूळ जालां. तें पळोवपाक हजारांनी लोक वतात. पंढरपूर, कोल्हापूर, अक्कलकोट, वेलंकणी, अजमेर अशा थळांचेर दरवर्सा लाखांनी लोक वतात. तांचो फक्त त्या – त्या धर्मीक थळांकूच फायदो जाता, असो थोड्यांचो समज. पूण ह्या धर्मीक पर्यटनाच्या खुस्तार थंयचे लोक, ल्हान- व्हड वेवसायीक पोट भरतात, हें आमी विसरूंक फावना. गोंयांत धर्मीक पर्यटनाक उर्जा दिवपाचो यत्न जावचो. हेर राज्यांचे तुळेन गोंयची देवळां, चर्ची वेगळ्यो. थंय गजबज, धंदेवाईक नदरेचे मनीस दिसनात. ताका लागून ह्या शांत धर्मीक थळांचें आकर्शण जायत्या जाणांक आसा. ते लोक, खास करून कुटुंबां गोंयांत आयलीं जाल्यार आमचे अर्थवेवस्थेक थोडें बळगें मेळटलें. शेनवार- आयतारा हें धर्मीक पर्यटन करप देशी पर्यटकांक सोंपें. तशे विकेंडाक येतात, ते शेजराच्या राज्यांतले पर्यटक, पूण पयसुल्ल्यान पर्यटक येवंक जाय. विमान, रेल्वेक लागून हें शक्य आसा!! खरें म्हणल्यार चार्टर विमानांनी येवपी विदेशी पर्यटक सगल्यांत चड दुडू खर्च करतात. ते गोंयांत येतात, शांतपणान चार दीस सारपाक. तांकां त्रास दिवपी घटक कुशीक काडप गरजेचें. गोंयांत हालींसराक पार्टेच्या नांवा खाला रातभर व्हडल्या आवाजांत संगीत वाजता. तें गोंयकारांक आवडटलेंच अशें ना. ह्या आवाजाच्या प्रदुशणा खातीर कांय वेंचीक पर्यटक सोडल्यार हेरांक खूब त्रास, मनस्ताप जाता, हें आमकां केन्ना कळटलें?
देशी पर्यटन, धर्मीक पर्यटन, भलायकी पर्यटनाच्या मळांची पर्यटकांक ओड लागपाक जाय. सरकारान राज्यांतले कांय उत्सव राज्य उत्सव म्हूण जाहीर केल्यात. तातूंत आनीक भर पडची. खास करून शिमग्याच्या दिसांनी गोंयची संस्कृताय पळोवपाक मेळटा. त्या वेळार पर्यटक आयल्यार बरें. तातूंत कला- संस्कृतायेची जाण आशिल्ले पर्यटक आसल्यार गोंयची संस्कृताय देश- विदेशांत जंय पावूंक ना थंय पावतली. ताचो फायदो आमकांच जातलो. हालींच्या दिसांनी पर्यटन मळाचेर सर्त खूब वाडल्या. गोंयच्या शेजारचें कोंकण पर्यटनाच्या मळाचेर कूस परतिता. कारवार जिल्ह्यांतूय पर्यटना विशींच्यो हालचाली वाडूं येतात. तेन्ना गोंयान हें सगलें मतींत घेवन पर्यटनाचीं नवीं मळां सोदचीं आनी गोंयमायेच्या माथ्या वयलो पर्यटन रुपी मुकूट आनीक चकचकतलो हे खातीर उपाय घेवचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
