पर्यटनाक वेगळी दिका मेळची

भांगरभूंय | प्रतिनिधी

गोंयांत येयात, सैम, देवळां, इगर्जो, घसघशे पळयात. नेमावळ पाळून सैमाच्या सांगांतात रावात, मस्ती नाका. गोंय हें शिस्तीचें, शांतिकायेचें राज्य हें सांगपाची धिटाय पर्यटन मंत्र्याक, मुख्यमंत्र्यांक दाखोवची पडटली.

रुप्या वरी लिकलिकपी दर्यावेळे वयली रेंव हें गोंयच्या पर्यटनाचें एका तेंपार धन आशिल्लें. दर्यावेळांचेर गीतांची रचणूकय जाल्ली. तेन्नाच्यो दर्यावेळो आयज ना हें सत मानून घेवन दर्यावेळेर सावन पर्यटन पयस व्हरपाक जाय.
पर्यटन खात्यांत चड तेंप वावुरिल्ले उल्हास कामत, बाळकृष्ण (बीजी) खांडेपारकार हांचे वरी वरिश्ठ अधिकाऱ्यांनी पर्यटनाक दिका दिवपाचे यत्न केले. गोंयांत विदेशांतल्यान पर्यटक हाडपा पासत आदले मुख्यमंत्री डाॅ. विल्फ्रेड डिसोझा हांचो मोलादीक वांटो आशिल्लो. पर्यटन वेव्हार, वेवसायाक शीम आशिल्ली, तेन्नाचे मुख्यमंत्री प्रतापसिंह राणे, डाॅ. डिसोझा हांचे मदीं तंटो आसत पूण ते एकामेकांक सांबाळटाले. देशांत पर्यटन वेवसाय चड राज्यांनी नाशिल्लो, उदरगत सवकासायेन जाल्ली. पूल, येरादारीचीं साधनां, हाॅटेलांचेर मर्यादा आशिल्ली. फाटल्या वीस पंचवीस वर्सांत संवसारीकरण, तंत्रगिन्यानान राष्ट्रां लागीं आयल्यांत. नागरिकांच्यो गरजो बदल्ल्यात, कायदे आनी नेमावळींत बदल जातात. अभ्यासांतल्यान गोंयांकय बदलचें पडटलें, देशा वांगडा वचप, व्हड जावप, वेवसायांत शिस्त हाडप ही मोख मुखार दवरल्यार गोंयचें पर्यटन तिगतलें. दोन तीन वर्सां दर्यावेळां पसून पर्यटकांक पयस व्हरून दर्यावेळो नितळ करपाचो व्हड वावर जावचो. दर्यांत पेंवपाचेर, देंवपाचेर मर्यादा घालपाची गरज आसा.
कामत, खांडेपारकार ह्या अधिकाऱ्यां उपरांत आयएएस अधिकारी स्वप्नील नायक, निखील देसाय, अमेय अभ्यंकर हांणी पर्यटनाक बळगें दिलें. पर्यटन वेवसाया विशीं कायदे करपाक, नितळसाणीचें म्हत्व लोकांक सांगपाक ते अनमनले नात. विदेशांत, देशांत भोंवड्यो करून गोंय म्हळ्यार कितें तें माध्यम, जायरातीं वरवीं हेर देशांतल्या कायद्यांची म्हायती तांणी घेतली. राज्यांतल्या पर्यटन थळार वचून ती पळोवपी, कितें ना कितें आसा तें समजून घेवपी अधिकाऱ्यां मदीं तांचो आस्पाव जाता. पर्यटनाची नकारात्मक प्रतिमा पुसपाक, पर्यटकांक गोंयांत हाडपाक तांणी येवजण्यांची बुन्याद घाली. त्या येवजण्यांनी पर्यटकांची आवड पळोवन बदलांतल्यान पर्यटनाक नवे दिकेन व्हरपाक जाय. गरज पडल्यार दर्याक गोंयच्या जायरातींतल्यान कुशीक दवरचो. गोंयांत येयात, सैम, देवळां, इगर्जो, घसघशे पळयात. नेमावळ पाळून सैमाच्या सांगांतात रावात, मस्ती नाका. गोंय हें शिस्तीचें, शांतिकायेचें राज्य हें सांगपाची धिटाय पर्यटन मंत्र्याक, मुख्यमंत्र्यांक दाखोवची पडटली. पर्यटन मंत्री पर्यटन उद्देगांतले एक जाणकार, पर्यटनांतल्या भागिदारांक बरोबर घेवन ते मुखार गेल्यात. पर्यटन येवजणी करपाक राल्फ डिसोझा हांचे वरी पर्यटन उद्देजकांनी सरकाराक आदार केला. पर्यटनांत बेकायदो वेवसाय करपी गोंया भायले आयल्यात, राज्याची बदनामी ते करीत आसत जाल्यार तांचेर कायद्यान कारवाय करची.
गोंय घुवंळे वखदां, सोऱ्याची भूंय न्हय हें सांगतना घुवंळे वखदां हाडटल्यांचेर, नायट लायफाचेर सरकाराची नदर आसा ही शिटकावणी दिवची. शॅक्स वांटपाची पद्दत भासाभाशेंतल्यान बदलप, भलायकेक बरें, पर्यटकांक जाय तें ताजें खाण जेवण दिवपाची गरज आसा. गोंयांत भोंवडेकार जावन येवन आलाशिरो घेतिल्ल्या गुन्यांवकारांक, तोपी घालतल्यांक सोदचे, वातावरणांतल्या बदलांचो अणभव घेवचो, पर्यटक खंयच्या वाठारांत चड रावतात तें सोदून काडचें.
पर्यटन वेवसायाची उदरगत अती जाल्या व्हय? वेवसायांत सरकारी येवजण्यांचो लाव घेवन पळ काडपी, वेवसायांतल्यान लुकसाणच चड म्हणपी आयल्यात जाल्यार ते पर्यटनांतल्यान भायर कित्याक सरुंक ना? सकारात्मक पर्यटन दाखोवचे परस नकारात्मक जायरात करून गोंयांतल्यान पर्यटक पयस वचचे म्हूण वावुरतात जाल्यार तांचेर बडी मारचीच पडटली.
मशिदी, इतिहासाची याद करून दिवपी थळां, मसाले आनी शेती पर्यटना बराबरीन पर्वत पर्यटनाची येवजण करूं येता. कालचे नामनेचे दोंगर आयज तशेच उरचे नात, दोंगराच्या तळाक आनी तेंगशेर घरां, झोंपड्यो आसतल्यो. नितळसाणेन पर्वत पर्यटनांत उजवाडाचें दिवज कित्याक पेटोवचें न्हय? धरणाचे वाठार, फेस्तां, उत्सव संवसारीक पर्यटनाच्या नकाशार घालचे पडटले. कार्नाव्हाल, शिगम्या वरी दिवाळी, पातोळेचें, तवशाचें फेस्त, जात्रा, चवथीक म्हत्व दिवन अन्न महोत्सव, लोकोत्सव थळाव्या पांवड्यार जाल्यार पर्यटनाक वेगळी उंचाय येतली. पर्यटन, कला आनी संस्कृती खात्यांनी जोड पालवान वावुरल्यार काणकोणचो लोकोत्सव, राजभाज्यो उत्सव संवसारीक पांवड्यार पावतलो. संस्था, संघटणा उत्सव घडोवन हाडटात, तांकां पर्यटन, कला आनी संस्कृती खातीं पालव दितात, त्या उत्सवांचो पांवडो वाडोवचो पडटलो.
कला अकादमीतल्या वर्सुकी लोकोत्सवांतल्यान पर्यटन फुलता, इफ्फी, सेरेंडीपीटी वरी उत्सव पर्यटनाक उर्बा दितात. सेरेंडीपीटी हेर शारांत व्हरपा पासत शारांतल्या सभाघरांनी, कला आनी संस्कृती भवनांनी तजवीज, नियोजन करचें पडटलें.
उत्सवी पर्यटनांतल्यान येणावळ मेळटा, जात्रा फेस्तांतल्यान थळावे एकठांय जातात. पर्यटन खात्यान बांदिल्ल्यो साधनसुविधा सुदारच्यो, दर्यावेळां परस तीन, पांच नखेत्री हाॅटेलां ल्हान प्रमाणांत सांगें, धारबांदोड्यां बांदपाक जाय. रोजगार संदीची निर्मणी जातलीच. तेभायर थळाव्या ल्हान उद्देग, वेवसायांक बळ मेळटलें.
पावसांत कांपाल वाॅक वे चेर येवपी पर्यटक आपल्यो गाडयो, बशींनी येवपी. विकएंड पर्यटन गाडयांतल्या साधनसुविधांतल्यान व्हड जाल्लें दिसता. गाडयो, बसींचे पार्किंग जाता त्या सुवातींचेर सीसीटीव्ही कॅमेरे नदर दवरतात, कांय पार्किंग सुवातींत फी घेवपी कोण नासता हें पर्यटन खात्याक कळ्ळां. पर्यटन खातें, पर्यटन विकास म्हामंडळ एकठांय हाडपाची येवजण फुडारांत करची. उद्देग, वेवसाय करतल्यांचें पर्यटन मंडळ जालां, हें पर्यटन खात्याचें व्हड जैत. कांय कार्यावळी पर्यटन खातें मंडळाक बराबर घेवन करता, त्यो कार्यावळी सगल्या शारांनी जावंक शकतात. संमेलनां, साहित्यीक कार्यावळींतल्यान पर्यटन गोंयच्या कोनशांनी पावता तें एक दोन सुवातीं खातीर कित्याक? खासा सवलती मेळटात? पर्यटन खात्यान सवलतींची, येवजण्यांची एकात्म बांदावळ करची. ते बांदावळीचो लाव जातलो.
पर्यटन वेवसाय वाडीक लागता तसो पांवडो देंवता, आडवाटेन पर्यटक चोब्यांनी येतात, ते आयिल्ले हें लिपोवपी आसात. ल्हान उद्देजकांक वेवसाय नोंदणेची सक्ती करची.
दायज पर्यटन जे गतीन उदरगतीच्या मार्गार वचूंक जाय तें वचूंक ना. दायजाक लागिल्ली वायटी, थळांचो जाल्लो इबाड, बेकायदो गाडे म्हारग पडटा. सर्त वाडिल्ल्यान थळाव्या जेवणा खाणाचो पांवडो देंवला, हेर राज्यांचें खाशेलेंपण गोंयांत वाडिल्ल्यान लुकसाण थळाव्यांचें जाता. अशे वेळार थळाव्यांक एकठांय हाडून तांकां शिस्तीचें, खाणा जेवणाचो पांवडो उंचावपाचें शिक्षण दिल्यार पर्यटनाक सकारात्मकतेची वाट दिसतली.
नेरुल, वेरेंचो वाठार कांपाल वाॅक वे वेल्यान कसो दिसता? परशुराम पुतळ्याक पर्यटक म्हत्व कित्याक दितात ताचो अणभव आमदारांनी घेवचो. कला अकादमीतलो लोकोत्सव एकाच वेळार मडगांव ते सांखळे मेरेन व्हरपाचेर विचार जावचो. 12 तालुक्यांनी लोकोत्सव उबाळाच्या दिसांनी पर्यटन खातें घडोवन हाडूंक शकता. अन्न, कला, संगीत, सर्ती तातूंत आस्पाव करूं येतात.

सुहासिनी प्रभुगांवकार
9881099260