भांगरभूंय | प्रतिनिधी
भांगरभूंय । प्रतिनिधी
दिवचलः मयें तळये कडेन कांय कोटी रुपया खर्च करून पर्यटन सुविधा तयार केल्यात. मात हांगा पर्यटक व्हडा संख्येन येनात. ज्यो त्रुटी आसात त्यो पयस करून तळयेच्या वाठाराची उदरगत करतले अशें मयेंचो आमदार प्रेमेंद्र शेट हांणी मयेच्या पंचायत मंडळा वांगडा ह्या वाठाराची पळोवणी केल्या उपरांत पत्रकारांक सांगलें.
तळयेची पळोवणी केली तेन्ना पर्यटन उदरगत म्हामंडळाचे दीपक नार्वेकार, सरपंच दिलीप शेट, दया कारबोटकार आनी पर्यटन खात्याचे अधिकारी हाजीर आशिल्ले. मयें तळये कडेन आशिल्ले निवासी सुरू करप, मुख्य दार उक्तें करप, जाय ती दुरुस्ती आनी नितळसाण करपाचें काम करून पर्यटनाच्या माध्यमांतल्यान थळाव्या लोकांक रोजगाराची संद उपलब्द करून दिवपाचें काम रोखडेच सुरू करतले अशें आमदार शेट हांणी सांगलें.
सुमार 20 कोटी खर्च करून जायत्यो सुविधा तयार करून लेगीत मयें तळये कडेन बशी येवपाक दिनात, मयेंच्या नांवा खाला पर्यटकांक दुसरीच तळये कडेन व्हरतात अशें एका ग्रामस्थान आमदार शेट हाका सांगले. ज्यो कितें समस्या आसात तो जाता तितल्या बेगीन सुटाव्यो करपाचें आस्वासन पर्यटन मंत्री रोहन खवंटे हांणी दिलां अशें शेट हांणी सांगलें. मयें तळये कडेन पर्यटक व्हडा प्रमाणांत येतले अशी वेवस्था करपाची मागणी ग्रामस्थांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
