पर्यटनांत गोंयचें ‘कोटी’चें उड्डाण!

भांगरभूंय | प्रतिनिधी

‘नेमेची येतो पावसाळा’ हे म्हणी प्रमाण विधानसभेंतूय अशे काय विशय नेमान चर्चेक येतात की ताका फाटो दिवप सभाघराच्या वांगड्यांकूय शक्य नासता वा सरकाराकूय ते टाळचे अशें दिसत आसलें तरी ते टाळून मुखार वचप शक्य नासता. गोंयचें पर्यटन हो एक असोच विशय आसा की ताचेर सभाघरांत आनी भायरूय कितलीय रुचीन चर्चा जायत आसली तरी ताचो केन्ना चोथो जाल्लो दिसचो ना. फाटलीं खूबशीं वर्सां आमी हें चित्र पळयत आसात. पूण पर्यटन म्हणलें की आरती परती चर्चा, आरोप प्रत्यारोप, ताका मंत्र्याची जाप हें सगलें आयलेंच. फाटल्या धा बारा वर्सां सावन सभाघरांत नेमान चर्चेक येवपी विशय म्हणल्यार म्हादयचो वाद, बंद आशिल्ल्यो खणी, व्हड प्रमाणांत जावपी जमीन रुपांतरण, कॅसिनो आनी पर्यटन. पावसाळी विधानसभा अधिवेशनाचो हो मेनू तसो थारिल्लो आसता. कारण दोन अडेज सप्तकांतल्या दीर्घ अशा वर्सांतलें एकसुऱ्या अधिवेशनांत वांगड्यांची भूक भागोवपा खातीर हो मेनू गरजेचो थारता आनी खूबशा वांगड्यांक वर्सभरा खातीर आमी आमदार ह्या नात्यान व्हड कार्य केल्ल्याचें समाधानूय मेळटा. सद्या चालू आशिल्लें विधानसभेचें पावसाळी अधिवेशनूय ताका आडवाद थारपाचें कारण नाशिल्लें. गोंयच्या पर्यटनाचेर आपले बगर आनी कोणाचोच खोलायेन अभ्यास ना आनी ताचेर सविस्तरपणान कोणूच उलोवंक शकना असो समज वा गैरसमज करून बशिल्ले कळंगूटचे आमदार मायकल लोबो हांणी ह्या विशया वेले चर्चेत फुडाकार घेवप हें थारिल्लेंच आसता, आनी ह्या वेळा वेलें चित्रूय कितें वेगळें नाशिल्लें.
पर्यटन मंत्री रोहन खंवटे हेवूय अशेच तालमीत तयार जाल्ले खेळगडे की जांणी पुराव्यांचे अशे आंकडे तोंडार मारले की मायकल लोबो हांकां घडये आपूणच चुकत आशिल्ल्याची जाणीव पयलेच फावटी जाल्ली आसुये हें मानून घेवपाक खूबशी सुवात आसा. गोंयाक भेट दिवपी देशी विदेशी पर्यटकांचे संख्येंत वर्सांगणीक उणाव जायत आशिल्ल्याचो निश्कर्श आपल्या अभ्यासांतल्यान काडीत मायकल लोबो दर वर्सा सभाघरांत ताचो पुनरुच्चार करीत आसतात. ह्या वेळारूय तांणी तेंच केलें आनी गोंयाक भेट दिवपी पर्यटकांची संख्या कशी उणी जायत गेली, सरकार खंय उणें पडटा, सरकारान नेमकें कितें करूंक जाय, पर्यटनाभिमूख वेवसाय करप्यांचे कशे हाल जायत आसात हो तांचो सदचोच पाडो वाचपाचो यत्न केलो. सभाघरा भायर मायकल लोबो जे उलयतात तेच तांणी रिपीट केल्ल्यान तातूंत नवें अशें कांयच नाशिल्लें. पूण पर्यटन मंत्री रोहन खंवटे हांणी तांकां जाप दितना जी आंकडेवारी दिली ती मात वेगळीच आनी लोबो हांचे मुद्दे खोडून काडपी आशिल्ली. फक्त पंदरा सोळा लाखांची लोकसंख्या आशिल्ल्या गोंयान आतां पर्यटन मळार ‘कोटी’चें उड्डाण केल्ल्याचें आतां स्पश्ट जालां आनी ह्या मळारूय गोंय नवी झेप घेवपाक तयार जालां अशें म्हणूंक येतलें. 2024 वर्सा गोंयाक भेट दिवपी देशी पर्यटकांची संख्या 99 लाख 41 हजार इतली आसून विदेशी पर्यटकांचो आंकडो साडेचार लाखां परस चड आशिल्ल्याची म्हायती दितना केन्ना न्हय इतली पर्यटकांची संख्या एक कोटी परस चड जाली अशें सांगून पर्यटन मंत्र्यांनी मायकल लोबोक ओगी केल्ले आसले तरी हे म्हायतीक लागून फाटाल्या कांय वर्सांत 15-16 लाख लोकसंख्येच्या गोंयान पर्यटन मळार मारिल्ली झेप दिसून येता.
गोंय हें संवसारीक नामनेचें पर्यटन केंद्र जालां हें कोणूच अमान्य करपाचो प्रस्नूच उपस्थीत जायत नासलो तरी गोंयचे पांय फाटीं ओडपाचे यत्नूय जायत आसात हें न्हयकारूं येना. पर्यटन मंत्री रोहन खंवटे हांणी लेगीत सभघरांत ते विशीं म्हायती दितना गोंयची बदनामी करपा खातीर कितें कितें करतात हाची कल्पना दिली. आतां हातूंत नेमको कोणाचो हात आसा हाचोय सोद घेवपाची गरज आसा. राज्या भायल्यान समाजमाध्यमां वेल्यान गोंया विशीं चुकीची म्हायती पातळायतात आनी ते खातीर ‘पेड इन्फ्लुएंसर’ नेमणूक केल्ल्याचें जेन्ना पर्यटन मंत्री सांगतात तेन्ना ताची गंभीरताय लक्षांत घेवनूच हे प्रकार आडावपा खातीर खर पावलां उबारपाची गरज आसा. पर्यटनाच्या मळार अशें हें चलताच अशें म्हणीत ताचे कडेन आमी आडनदर करतले? हो खरो प्रस्न आसा. पर्यटन हो खूबशा राज्यांच्या अर्थीक वेवस्थेचो कणो जायत चल्ला आनी गोंयचे बाबतितूय सादारणपणान तशीच परिस्थिती आसा. देशी विदेशी पर्यटकांक आपले कडेन वळयतना योग्य प्रचार करप वेगळें आनी दुसऱ्या पर्यटन थळांची बदनामी करून पर्यटकांक आकर्शीत करप हातूंत तसो बरोच फरक आसा. पूण ही सर्त आतां अश्या पांवड्यार पावल्या की ती आडावपा खातीर एकठांय येवनूच ताचेर उपाय काडप म्हत्वाचें आसा. सर्त ही कसलीय आसूं ती निकोप आसूंक जाय हें पथ्य पाळीत जाल्यारूच अशा गजालींक थारो मेळचो ना. गोंयच्या पर्यटनाचे बाबतींत सामकी पद्दतशीर बदनामी करपाचे यत्न जायत आसतनाय आमच्या ल्हानशा गोंयान लोकसंख्येच्या स साडेसचे पटीन पर्यटकांक आकर्शीत करप ही तशी व्हड तेंगशी आसा.
पर्यटन मळार एखाद्या राज्या खातीर अासूं वा देशा खातीर कितलें म्हत्वाचें थारूंक शकता हाचो अदमास आमी हालींच मालदीव ह्या भारताच्या शेजरा आशिल्ल्या देशांत जें घडलां ताचे वेल्यान घेवंक शकता. भारता कडेन दोन हात करूंक पळयतल्या त्या देशाक पर्यटनाच्या मळार जो फटका बसलो ताचें पर्यावस राष्ट्राध्यक्ष महमद मुईज्जू हांच्या काळजाचें परिवर्तन जावपा कडेन जालें. भारता कडली दुस्मानकाय थंयच्या पर्यटनाक मारक थारिल्ल्याचें दिसून येतनाच अध्यक्ष मुईज्जू हांणी प्रधानमंत्री नरेंद्र मोदी हांच्या पांया कडेन सांश्टांग नमस्कार घालपाक कळाव केलो ना. पर्यटन मळार गोंयाक स्पर्धक आयज खूब आसात. पूण तांचे कडेन सर्त करतना अजून खूब कितें राज्य सरकाराक करूंक येतलें. नवें नवें पर्यट प्रकल्प उबारून देशी विदेशी पर्यटक हांगा अजून व्हड संख्येन कशें येवंक शकतले हाचो विचार जावंक जाय. पावसाळी पर्यटनाचेर आमी खूब कितें उलयत आसले तरी पावसांत गोंयांत येवप्यांची संख्या तशी वाडिल्ली दिसून येना. ईको फ्रेंडली पर्यटन येवजणेचेरूय चर्चा बरे पैकीं जायत आसा. अशे प्रकल्प उबे रावतले तेन्ना अजून पर्यटकांचो आंकडो वाडूंक शकतलो आनी गोंयचे अर्थवेवस्थे खातीर तें वरदान थारूंक शकतलें. गोंयचे सदाबहार सैमीक सोबीतकाय, रुपेरी रेंवेच्यो सोबीत दर्यावेळो, देवळां, चर्ची देशी विदेशी पर्यटकांक आयजूय आकर्शीत करतात हें मान्य करूनय अजून एखादो दुसरो दीस तांचो राबितो वाडचो हे खातीर यत्न जायत जाल्यार ह्या मळार आमी फाटीं पडपाची धास्ती बाळगुपाची गरज ना. पर्यटन थळांचेर उपद्रव करप्यां आड कारवाय करपाची तरतूद आशिल्लें विधेयकूय आयलें हें बरें जालें. गोंयची प्रतिमा म्हेळी करपा खातीर कार्यरत आशिल्ल्या शक्तींचेंय विघटन करचें पडटलें. तातूंतच गोंयचें आनी आमच्या पर्यटन मळाचें हीत आसा.

वामन प्रभू
9823196359