भांगरभूंय | प्रतिनिधी
पर्यटन थळां सांबाळप, ती फुडल्या पिळग्यां खातीर वेवसाय आनी वेळ पासार करपाक दवरप, हें दुरदिश्टीचें काम. ह्या थळांचेर सरकारी यंत्रणां आनी समाजाची कावळ्याची नदर जाय. खास करून दर्यावेळांचेर! आयज दर्यावेळ ही गुन्यांवांची पोंय जाल्या. कोणे श्रद्धा दुखोवन घेवची न्हय. ही सत गजाल. गुन्यांवांच्यो खबरो चाळ्ळ्यार हाचेर उजवाड पडटा. गोंयांत म्हयन्याक 25 तरी अपघात जातात, तश्योच ड्रग्स, खंडणी कडेन सबंदीत 25 तरी घडणुको घडटात. अर्थांत ह्यो पुलिशेंत नोंद जाल्ल्यो, परस्पर कितलीं केस्तांवां मिटयतात आसतले, हें थळाव्यांकूच खबर! तातूंत फाटल्यान लागून पर्यटकांक सतावप चालू आसा. जळू तरी एकवेळ सुटत, पूण दर्यादेगांचेर वस्तू खपोवपाक, मसाज दिवपाक पर्यटकांक दसपी सोंपेपणी सुटनात. नाकपुडयेर बोट मारीत पर्यटक सोदपी धंदेकारूय वाडल्यात. पूण ते हो धंदो इतलो फिशालकायेन करतात की पुलिसांक चुकूनच दिसतात!!! आतां हें सगलें आडावपाक विधेयकांक दुरुस्ती करपाचें सरकारान थारायलां. बरी गजाल. चालीक लागची.
दर्यावेळांचेर (पणजे चर्च आनी हेर कडेनूय) माळो, वेणयो घालपी, मसाज करपी, कपडे, खेळणी विकपी धंदेकार पर्यटकां फाटल्यान हेडटात. भितरले 99 टक्के बिगरगोंयकार. पर्यटकांक खाशेल्यो सेवा दिवपी थळां दाखोवपाक, थंय व्हरून सोडपाक ट्वाट्स भोंवतात. क्रूज बोटी आनी हेर सेवांच्यो तिकेटी विकतात. दरेका शारांत, सरभोंवतणच्या उपनगरांनीय ते आसात. तांचे व्हिडियोय अदींमदीं व्हायरल जातात. मात कारवाय जाताच अशें ना. आतां सांपडल्यार तांकां 5 हजार ते 1 लाख रुपयां मेरेन दंड जातलो. हातूंत गोंयकार आसल्यार सवलत बी दिवची न्हय. अनियमीत, बेकायदेशीर घरां, जमनीं संदर्भात दियात म्हणटात तशी! 2030 मेरेन पर्यटकांक सतावपी हे ‘उद्देजक’ ना जातले, अशी आस्त. उक्त्यार जेवण शिजोवपी, बाटल्यो आनी हेर कोयर उडोवपी, दर्यावेळांचेर गाडयो चलोवपी हांचेरुय कारवाय जातली. हांकां व्हडलो तालांव घालपाची गरज आसा. पूण हें सगलें करतना पर्यटकांक वा हेरांक हें कित्याक करचें पडटा, ताचोय अभ्यास करून उपाय काडूंक जाय.
पोट भरपाचो अधिकार सगल्यांकूच आसा. मात तो बेकायदेशीर कामां, गैरप्रकार करून न्हय. कोणाक त्रास दिवन तर न्हयच! दर्यावेळाचेर जें कितें चलता, ताच्यो खबरो दिसाळ्यांनी येतात. मात, व्हिडियो, ल्हान लेख सोशल मिडियाचेर चड भोंवतात. तातूंत ते बरोवपी प्रतिश्ठीत आसल्यार त्या राज्यांतले लोक रोखडेच विस्वास दवरतात. बोरा येदो प्रकार काळगां येदो करून सांगपी कांय नेटिझन्सूय बेरकी, धुर्त सुत्रधारांनी दिसवड्याचेर दवरल्यात. गोंय, प्रतिस्पर्धी फुडाऱ्याक बदनाम करपाक. सांगपाचो उद्देश ह्या घडणुकांक लागून गोंयचें पर्यटन बदनाम जाता. आमकां एकूय पर्यटक वगडावपाचो ना. तो देवा समान सोयरो. ताचेर आमचें पोट चलता, हे भावनेन गोंयकारांनी पर्यटन वेवसाय सांबाळूंक जाय.
पुलिसां वांगडाच पर्यटन खात्यान स्वताचे पंगड दवरून बेकायदेशीर गजालींचेर लक्ष दवरचें. सगल्यांक परवाने दिवचे. पर्यटन थळांचेर वेवसाय करपी प्रत्येकाची सरकार दरबारांत नोंदणी करची. पर्यटन खात्या कडेनूय नोंदणी करची पडटा. तरीय बरेच लोक गुपचूप वेवसाय करतात. पर्यटकांक सेवा दिवपी सगल्यांची वळेरी सरकारी वेबसायटींचेर आसल्यार बरी. पर्यटन खात्यान विक्रेत्यांक प्रशिक्षण दिवचें, नेमावळ बंधनकारक करची. मजत, सेवे खातीर कोणा कडेन संपर्क करचो हाची पुराय म्हायती आशिल्ले फलक पर्यटन थळांचेर लावचे. गोंयांत येवपाची तिकेट काडली काय पर्यटकाक ती म्हायती सोशल मिडिया वरवीं मेळ्ळ्यार बरें.चर्च, देवळांच्या समितींनी पर्यटकांक कोण त्रास दिता जाल्यार तांचेर नदर दवरुंय फावो.
फक्त दंडूच दिवन उपकारचें ना. प्रामाणिकपणान वेवसाय करप्यांक हाचो कसलोच त्रास जावंक जायना. शक्य आसा हें.-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
