भांगरभूंय | प्रतिनिधी
म्हापशें: हणजूण्यां आयिल्ले एके पर्यटक बायलेचो विनयभंग केल्ल्याच्या आरोपा खाला मिथून सुर्यकांत गौर (गुलबर्ग कर्नाटक) ह्या पर्यटक टॅक्सी चालकाक हणजूणें पुलिसांनी अटक केली.
ही घडणूक शुक्रारा मध्यान रातीर 12.30 वरांच्या सुमाराक घडली. चेन्नयचे फिर्यादी 30 वर्सां पिरायेची बायल रातच्या विमानान गोंयांत आयिल्ली. तिणें हणजूण्यां एका हॉटेलांत बुकींग केल्लें. तिचे वांगडा आनीक एक पर्यटक बायल वास्कोच्यान दुबावीत पर्यटक टऐक्सींतल्यान पणजे येवपाची आशिल्ली. ते दुसरे पर्यटक बायलेक दुबावितान पणजे हॉटेलाचेर पावयली. ते उपरांत फिर्यादी बायलेक पावोवपाक तो हणजूण्यां आयलो. हॉटेलाचे भायर ताणें फिर्यादी बायल टॅक्सींतल्यान देंवतना दुबावितान तिचो विनयभंग केलो. दुबाविताचे तावडेंतल्यान तिणें आपली सुटका केली आनी ती हॉटेलाचेर गेली. शेनवारा दनपारां फिर्यादी बायलेन हणजूणें पुलीस स्टेशनाचेर वचून रितसर कागाळ दाखल केली. हे कागाळेच्या आदारान पुलिसांनी दुबावीत टॅक्सी चालकाक ताब्यांत घेतलो आनी ताका विनयभंगाच्या आरोपा खाला गुन्यांव नोंद करून अटक केली. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
