भांगरभूंय | प्रतिनिधी
येरादारीचे नेम पाळिनात त्या गाडयेकारांक येरादारी पुलीस तालांव मारतात. येरादारी अधिकारीय (आरटीओ) अदीं मदीं दंड दितना दिसतात. तरीय आमचे कांय गाडयेकार तालांव फारीक करपाक भियेनात. म्हयन्याक 5 – 6 पसून तालांव दिवपी गाडयेकार आसात. कांय जाण मुखार पुलीस आसात तें पळोवन पयस उबे रावतात. अर्दवर पसून रावपाची सोंशीकसाण ते दाखयतात. तीच गाडी चलयतना दाखयिल्ली जाल्यार अपघात अर्द्यान उणे जावपाचे. आतां ह्या तालांव दिवप्यां मदीं पर्यटक पुलिसांचीय भर पडपाची आसा. विधानसभेच्या अधिवेशनांत पर्यटन विधेयक मांडपाचे आसात, तातूंत ह्या पर्यटक पुलिसांच्या वाडीव अधिकाराची तजवीज केल्या. फाटीं कोणे तालांव मारचे हाचे वयल्यान वाद जाल्लो. कारण सगलेच घोस्तान तालांव मारपाक लागिल्ले. मागीर थारावीक पदा वयल्या पुलिसांनीच तो मारचो, असो आदेश भायर सरिल्लो. उपरांत फक्त येरादारी पुलिसांनीच तालांव मारचो, हेर पुलिसांनी न्हय, अशेंय थारिल्लें. एआयचेर चलपी सिग्नलांचेर बसयिल्ले कॅमेरेय बेशिस्त गाडयेकारांक पळयत आसतात, पूण ते सादी पसून चूक जाल्यार सरळ पांचशे रुपया दंड दितात. आतां हो तालांव सगलेच फारीक करतात काय नात, हें येरादारी खात्याकूच खबर आसतलें.
तालांव मारपाक चडाओड लागिल्ली आसता. तातूंत आतां पर्यटक पुलिसांक लागून ‘तालांवकारां’चो आंकडो वाडटकच वाद वाडना जाल्यार पुरो. कितलो तालांव मेळटा काय? वर्साक चार ते पांच कोटी रुपया. 2023 वर्सा उत्तर आनी दक्षीण येरादारी पुलिसांनी मेळून 5 कोटी 10 लाख रुपयां दंड एकठांय केल्लो. आरटीओन ह्या काळांत कोणाक तालांव घाला जाल्यार ती रक्कम वेगळी. म्हणटकच जर दर दिसा नेम मोडपी गाडयेकारांक दंड दीत रावले जाल्यार खोटल्यांनी दुडू जमतले. सरकारी तिजोरी भरपाक तालांवाचें खूब व्हड योगदान आसा, हें न्हयकारूंक मेळना. गोंयच्या गाडयेकारांनी हाचेर विचार करपाक जाय. नेम पाळप ना, तालांव भरप ही पुरुशार्थाची गजाल न्हय!!
गोंयाक भेट दिवपी पर्यटकांचे सुरक्षेचे नदरेन गोंय पर्यटन खात्याचे हे स्वताचे पुलीस आसतले खंय. तांकां टुरिस्ट गार्ड अशें म्हणटले. सध्याच्या पुलीस अधिकारी, कर्मचाऱ्यां मदल्यानूच तांकां वेंचून काडटले. हेर खंयचेय गजाली परस पर्यटकांक सुरक्षा दिवपाची चड गरज आसा. कारण दर्यावेळां वयल्या कारनाम्यांच्यो एकेक गजाली सदांच आयकुपाक मेळटात. सगल्यांच्योच खबरो छापून येनात. फाटीं ब्रह्मेशानंद स्वामींनी कळंगूट हें थायलॅण्ड कशें दिसता अशें म्हणिल्लें. खुद्द कळंगूटकारांक दर्यावेळेर आनी सरभोंवतणच्या वाठारांत कितें चलता ताची नेमकी म्हायती आसतली, जी कोणाकूच आसची ना. पर्यटन पुलिसांक हांगाच्यो वायट गजाली ना करपाक वावुरचें पडटलें. पर्यटकांक शिस्त लावपा परस ही खूब कठीण गजाल. पूण इत्साशक्त आसल्यार अशक्य न्हय. टाव्ट्स नांवाचो जो प्रकार चलता, ताचेर सगल्यांत पयलीं बंदी घालपाक जाय. दर्यादेग कायदो माड्डुपाचे प्रकार सदांच घडटात. पर्यटकूच न्हय, तर गोंयकार पसून मोटारी, जिपी घेवन रेंवेंचेर पासयो मारतात, उदकांत वतात. सगल्यांक दंड घाला. तरीय ते सुदरनात कशे तें कळना. 20- 25 हजार रुपया दंड दिवन गाडयेंत भितर बशिल्ल्यांक दोन दीस बंदखणींत दवरीत जाल्यार घडये सुदारत काय? येरादारी नेमाचें उल्लंघन करपी कितलेशेच पर्यटक आसात. गोंयांत आयल्यात म्हणजे सोरो पियेवपाकूच जाय. ही गजाल सक्तीची असो बी तांचो समज आसतलो.
घुंवळे वखदांचेर नियंत्रण दवरपाचें काम पुलीस करतात. पूण पर्यटक पुलिसांनीय तांकां मजत करप ही काळाची गरज. सोरो पियेवन बोवाळ घालप्यांचेरुय नियंत्रण दवरपाक जाय. सध्या पर्यटक पुलीस आसात, तांकां चड अधिकार नात. ते फक्त दुबावितांक ताब्यांत घेवन पुलीस स्टेशनाचेर व्हरपाक शकतात. अधिकार मेळटकच पर्यटकांक थंयचे थंय अटक करपाक मेळटली. खरें म्हणल्यार गोंयांत येतकच पर्यटकांनी कशें वागप हाची तांकां पयलींच म्हायती दिवपाक जाय. कळंगूट पंचायतीन चेक नाके सुरू करपाक परवानगी मागिल्ली, ताचें कितें जालें? भितर सरतनाच पर्यटकांची आनी हेर सगल्यांची तपासणी जावप सुरक्षेचे नदरेन म्हत्वाचें. कांय जाण बोल्सांनी सुरे, पिस्तुलां, गाडयांनी वारांव, दांडे, हाॅकी स्टीक घेवन बिनधास्त भोंवतात. मात ते पुलिसांक मेळटाच अशें नात. गोंयच्यो दर्यावेळाे सांजच्यो सातां उपरांत पर्यटकां खातीर, बायलां खातीर सुरक्षीत करपाची जापसालदारकी सगल्याच पुलिसांचेर आसा. तालांव घेवपाचें काम जे आवडीन करतात, तशेंच हेंय काम तांणी करूंक फावो. पर्यटक पुलिसांची गरज आसाच, पूण फक्त तालांव घेवपा पुरती न्हय!!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
