भांगरभूंय | प्रतिनिधी
भांगरभूंय । प्रतिनिधी
पेडणेः पेडणे तालुक्यांत मोरजी, आश्वें, मांद्रे, हरमला ह्या दर्या वाठारांत सुमार 500 पर्यटक टॅक्सीवाले आसात. मात पर्यटक नाशिल्ल्यान तांचो वेवसाय सारको चलना. ताका लागून रिणाचे हप्ते भरप तांका सामके कुस्तार जावपाक लागलां. सरकारान पर्यटन वेवसायाचो विस्तार करतना दर्या देग वाठारांत चडांत चड पर्यटक येतले अशी वेवस्था करपाची तांची मागणी आसा.
अंदूच्या पर्यटन सिझनांत पेडण्याच्या दर्या वाठारांत व्हडा प्रमाणांत पर्यटक येतले अशी अपेक्षा आशिल्ली. मात ती फट थारल्या. सद्या हे टॅक्सीवाले रस्त्या कुशीक टॅक्सी पार्क करून गिरायकाची वाट पळयत आसतात. पूण गिरायक मेळनाशिल्ल्यान तांचे सामकार पोटाचो प्रस्न उप्रासला अशें समाज वावुरपी अल्बर्ट फर्नांडीस हाणे सांगलें.
पेडण्यांतल्या दर्या वाठारांत पयलं व्हडा प्रमाणांत पर्यटक येताले. ताका लागून शिकल्ल्या जायत्या तरणाट्यांनी बँकेतल्या रीण घेवन टॅक्सी घेवन आपलो वेवसाय सुरू केल्लो. सद्या पर्यटक उणे आसात आनी जे कोणी येतात ते आपली वाहनां घेवंन येतात. ताका लागून टॅक्सीवाल्यांक भाडीं मेळप सामकें कुस्तार जाला. पर्यटन खातें आनी सरकारान टॅक्सीवाल्यांच्या प्रस्नांत लक्ष घालून पर्यटकां खातीर जाय त्यो सुविधा तयार करून चडांत चड पर्यटक गोंयांत येतले आनी टॅक्सीकारांक गिरायक मेळटले हाची वेवस्था करपाक जाय अशें फर्नाडीसान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
