भांगरभूंय | प्रतिनिधी
कोलवा पुलिशेंत गुन्यांव नोंद : दुबाविताचो सोद सुरू
भांगरभूंय । प्रतिनिधी
मडगांव :वार्काच्या एका हॉटेलांत पर्यटकांक हाडपा खातीर गेल्ल्या एका टॅक्सीकाराक मारपेट करपाची घडणूक घडली. हे विशीं कोलवा पुलीस स्टेशनांत अनवळखी दुबाविता आड गुन्यांव नोंद केला.
दर्यादेग वाठारांतले टॅक्सीकार आनी मडगांव तशेंच हेर अॅपा वरवीं टॅक्सी चलोवपीं ड्रायव्हरां मदलो वाद सोंपपाचें नांवूच घेना. हे पयलीं मोबोर टॅक्सी बूक केल्ल्या पर्यटकाक हाडपा खातीर गेल्ल्या ड्रायव्हराक बडयिल्लो. तेन्ना मारपेट करप्यांचेर गुन्यांव नोंद केल्लो. प्रवाशांक हाडपा खातीर गेल्ले कडेन वाद जाल्ल्याचें मडगांवच्या टेम्पो ट्रॅव्हलर्स, बस आनी टॅक्सीकारांनी सांगलें.
वार्काच्या एका हॉटेलांतल्या पर्यटकांनी ऑनलायन गाडी बूक केल्ली. ते प्रमाण प्रवाशांक हाडपा खातीर गेल्ल्या टॅक्सी ड्रायव्हराक थंय आशिल्ल्या एका ड्रायव्हरान आडयलो. गाडयेचें दार उक्तें नाशिल्ल्यान ताणें व्हड फातर गाडयेर मारपा खातीर उबारलो. उपरांत टॅक्सी ड्रायव्हराक मारपेट केलो. त्या चालका वांगडा ताचो बापूयूय आशिल्लो. ताणेंय टॅक्सी मुखार दुचाकी घालून गाडी आडोवन दवरली. मारपेटा उपरांत टॅक्सी ड्रायव्हर कोलवा पुलीस स्टेशनाचेर आयलो. तेन्ना मडगांवचे हेर टॅक्सीकारुय पुलीस स्टेशनाचेर आयले. दुबाविताक अटक केले बगर वच्चो ना अशी भुमिका तांणी घेतली. कोलवा पुलिसांनी ह्या दुबाविताचेर गुन्यांव नोंद केला. गाडयेच्या क्रमांका प्रमाण दुबाविताचो सोद घेवपाचें काम पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
