पर्यटकांच्या स्वातंत्र्याचेर निर्बंध घालचे नात

भांगरभूंय | प्रतिनिधी

मुख्यमंत्री : गोंय सुरक्षीत राज्य आशिल्ल्याचें स्पश्ट

भांगरभूंय । प्रतिनिधी

पणजी : देश – विदेशांतल्यान गोंयांत येवपी पर्यटकांक सदांच ‘अतिथी देवो भवः’ ह्या तत्वानूच येवकार दितात. गोंयांत येवपी पर्यटकांनी कितें खांवचें आनी कितें खांवचें न्हय, कसले कपडे न्हेसचे, हे बाबतींत सरकार केन्नाच कसलेच निर्बंध घालचें ना, अशें मुख्यमंत्री डॉ. प्रमोद सावंत हांणी शुक्रारा स्पश्ट केलें. मुंबय आयोजीत ‘इंडिया समीट’ हातूंत घेतिल्ले मुलाखतींत ते उलयताले.

हेर राज्यांनी पर्यटकांच्या खांवपा – पियेवपा संबंदांत तशेंच कपड्यां विशीं कितें निर्णय घेवचो, हो तांचो अधिकार आसा. पूण गोंय संवसारीक दर्जाचें पर्यटन थळ आशिल्ल्यान दर वर्सा लाखांनी पर्यटक गोंयाक भेट दितात. ‘अतिथी देवो भव:’ ह्या तत्वानूच आमी तांकां येवकार दितात. देश – विदेशांतले सगळेच तरेचे पर्यटक गोंयांत येतात. ताका लागून तांणी गोंयांत आयले उपरांत तांच्या खांवपा – पियेवपाचेर वा कपड्यांचेर आमी कसलेच तरेचे निर्बंध घालपाक शकनात, अशें मुख्यमंत्री डॉ. सावंत हांणी सांगलें. फाटल्या कांय दिसांनी पर्यटका बाबतींत चुकीच्यो घडणुको घडल्यो. पूण पर्यटकांचे सुरक्षे खातीर गोंय पुलीस सतर्क आसात. गोंया इतलें सुरक्षीत राज्य सध्या देशांत ना, पूण पर्यटकांनी लेगीत गोंयांत येवन बेकायदेशीर कामांत वांटो घेवचो न्हय, असोय उलो तांणी मारलो. मजगतीं, राष्ट्रीय राजकारणांत प्रवेश करपाचो विचार आसा काय कितें, असो प्रस्न डॉ. सावंत हांकां विचारलो. ह्या प्रस्नाक जाप दितना तांणी सांगलें, दिल्लीच्या राजकारणांत आपल्याक रस ना. आपूण गोंयांत आसा तो बरो आसा. केंद्र आनी गोंयांतल्या भाजपच्या डबल इंजीन सरकाराक गोंयची आनीक उदरगत करपाची आसा. फाटल्या धा वर्सांत केंद्र सरकाराचे मजतीन गोंयची सर्वांगी उदरगत करपाक आपल्या सरकाराक येस मेळ्ळां. तेच खातीर गोंयकारांनी भाजप सरकाराचेर परतून परतून विस्वास दवरला, अशेंय मुख्यमंत्री डॉ. सावंत हांणी सांगलें.

अध्यात्मीक पर्यटकाचे उदरगतीक सुरवात

गोंय फकत दर्यादेगां पुरतेंच मर्यादीत ना. गोंयांत दर्यादेगो, चर्ची वांगडाच देवळांय आसात. गोंयांत 70 टक्के हिंदू धर्माचे लोक रावतात. ताका लागून गोंयाक अध्यात्मीक पर्यटनाचे बाबतींत लेगीत देशांत आघाडेर व्हरपाचे सरकारान यत्न सुरू केल्यात, अशें मुख्यमंत्री डॉ. प्रमोद सावंत हांणी सांगलें.