भांगरभूंय | प्रतिनिधी
देशी वाडले 5.36 टक्के, विदेशी 29.33 टक्के
भांगरभूंय । प्रतिनिधी
पणजी : पोरूंचे तुळेंत अंदूं सप्टेंबर मेरेन देशी तशेंच विदेशी पर्यटकांच्या प्रमाणांत वाड जाल्या. देशी पर्यटकांच्या प्रमाणांत 5.36 टक्के जाल्यार विदेशी पर्यटकांच्या प्रमाणांत 29.33 टक्के वाड जाल्या. दोनूय मेळून ही वाड 6.23 टक्के आसा, अशी म्हायती पर्यटनमंत्री रोहन खंवटे हांणी दिली. ते पत्रकार परिशदेंत उलयताले. ह्या वेळार पर्यटन संचालक केदार नायक हाजीर आशिल्ले. पर्यटना विशींच्या नव्या उपक्रमांची म्हायती तांणी दिली.
2024 त जानेवारी ते सप्टेंबर मेरेन 69,24,938 पर्यटकांनी गोंयाक भेट दिल्ली. अंदूं सप्टेंबर मेरेन 72,96,068 पर्यटकांनी भेट दिल्या. हें प्रमाण 5.36 टक्के चड आसा. पोरूं जानेवारी ते सप्टेंबर मेरेन विदेशी पर्यटकांचो आंकडो 2,59,820 इतलो आशिल्लो. अंदूं सप्टेंबर मेरेन हो आंकडो 3,36,031 इतलो आसा. हें प्रमाण 29.33 टक्के चड आसा.
पावसांत पर्यटकांचो आंकडो उणो आसता. मात अंदूं पावसांत लेगीत पर्यटक आयले. अंदूं ऑक्टोबरांतूच रशिया आनी मध्य आशिया खंडांतल्यान 34 चार्टर विमानां आयल्यात. यूकेची तूय अॅरवेज ही विमान कंपनी मॅचेस्टर आनी गॅटवीक शारा सावन थेट विमानसेवा सुरू करतली. हाका लागून अंदूं 30 ते 40 हजार पर्यटकांची भर पडटली. हे भायर नॉर्वे, डेन्मार्क, स्विडन, फिनलँड ह्या देशांतले पर्यटक हाडपाचे यत्न सुरू आसात.
बेगिनूच अॅरोस्पोर्टस आनी वेलनेस पर्यटन धोरणाची अधिसुचोवणी जारी जातली. टावन स्कॅर, युनिटी मॉल सारक्या प्रकल्पां खातीर केंद्रान 472 कोटी रुपया मंजूर केल्यात.
हॉटेल नोंदणीचे तपासणे खातीर मोहीम
पर्यटन नोंदणी कायद्या प्रमाण हॉटेलांची नोंदणी करप सक्तीचें आसा. ए, बी, सी आनी डी गटांत हॉटेलांची नोंदणी जाता. कांय जाणांनी ए वा बी गटांत नोंदणी करपाचें सोडून सी गटांत केल्या. चुकीच्या गटांत नोंदणी करपा खातीर 16 जाणांक नोटिसो जारी जाल्यात.
गोंयकारांक दर्यादेगांचेर फोटे काडपाची संद मेळोवन रोजगार मेळचो म्हूण खासा येवजण सुरू जातली. फोटेग्राफरांची लेगीत नोंदणी जातली. पर्यटन वाडपा खातीर बेकायदो टावटस तशेंच हेर बेकायदो गजालींचेर खर कारवाय जातली. काय टॅक्सीकार लेगीत गोंयचें नांव पेड्डेर करतात. हांचे आड कारवाय जातली. टॅक्सीकारांक डिजिटल प्लॅटफॉर्माचेर हाडपाचे यत्न सुरू आसात, अशें मंत्री खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
