भांगरभूंय | प्रतिनिधी
गोंय म्हणल्यार मजा, मस्ती करपाचो जागो, जाय तितलो सोरो पियेवपाचो, जाय तें खावपाचें, मनाक येता तें करपाचें असो कांय पर्यटकांचो समज जाला. हाचो दुसऱ्यांक त्रास, मनस्ताप जाता, हें तांकां कळना. कार्नाव्हालाकूच न्हय, तर हरशीय भौशीक जाग्यांचेर बसून हांसत- किटकिटत बियरी पियेवप्यांचो आंकडो वाडपाक लागला. हुस्क्याची गजाल. सोरो राज्याक येणावळ दिता, हें खरें आसलें तरी ताचेर आनीक कितलीं वर्सां अवलंबून रावपाचें ताचोय विचार जावपाक नाका? गोंयची प्रतिमा आनीक कितली इबाडून घेवप, तेंय चिंतपाक जाय.
पर्यटन खात्यान नितळसाण, पर्यटकांचे सुरक्षे खातीर पावलां उबारल्यांत. भौशीक जाग्यांचेर सोरो पियेवप्यांक आनी बाटली थंयच फोडून वा तशीच उडोवप्यांक पांच ते पन्नास हजार रुपयां मेरेन दंड घालपाचो निर्णय घेतला. पूण हो दंड 100 टक्के सरकारी तिजोरेंतूच जमा जातलो, हे खातिरूय उपाय घेवचे पडटले. तो आॅनलायन भरपाक लायल्यार बरो. दर्यावेळार सोरेकारांक बसपाक थारावीक जागो दवरुंक जाय. कारण ते जळीं मळीं बसले काय कुटुंबांक मेकळेपणी भोंवपाक मेळना. नशा करप्यांक लागून विनयभंग, केस्तांव, हल्ले जावपाची भिरांत आसता. गोंयांत येतकच पर्यटकांनी कशे वागपाक जाय. ताची म्हायती सगल्या राज्यांनी पावपाक जाय. वेवसाय करपी गोंयकार, तांचे परप्रांतीय कामगार, कर्मचाऱ्यांनीय शिस्तींत रावंक जाय. कोयराची समस्या तर इतली वाडल्या की आयिल्ल्या प्रत्येक पर्यटकाक बालदी दिवपाचो वेळ आयला.
पर्यटकांक सोऱ्याचे बाटले बदला कॅन दिवपाचो यत्न जातलो, अशें सरकारान म्हणलां. मात बाटलेंतली बियर तयार करपी कंपनीं आनी त्यो विकपी बार्रकारांचें कितें? बाटले बदला कॅन हो सोऱ्याक उर्बा दिवपा सारको प्रकार अशें कांय जाणांक दिसूं येता. मात, सोऱ्याक लागून येणावळ मेळटा, विकप्यांचें पोट चलता, अशें थोड्यांचें मत. विकपी बाटलेंतलो सोरो विकचे नात आनी पर्यटक फक्त कॅनूच घेतले, हें कोण पळयतलो? दर्यादेगांचेर कोयर जाता, तो नितळ करपाचें काम थळाव्या आपमजत गटांक दितले, ही बरी गजाल. ते गट गोंयकारांचे आसल्यार चडूच बरी गजाल!
भौशीक जाग्यांचेर थारावीक पर्यटक सोरो पियेतात. पूण ताचो मनस्ताप हेर पर्यटकांक जाता. कोयर उडोवपाची वेवस्था केल्ली आसतना तो रेंवेंत, मातयेंत उडोवप जाता, ही बेशिस्तूच. हाका लागून केस्तांवां जावं शकतात. न्हय जाल्यांत. एकामेकांच्या तकलेर बाटल्योय फोडल्यात. बियरींच्या बाटल्यांचेर बंदी आयल्यार असले प्रकार बंद जातले. विनोदाचो भाग कुशीक दवरलो, तरी दर्यावेळांचेर कसलोच कोयर, झगडीं, ड्रग्साचो वापर जावंक जायना. पूण आयज मेरेन कोणाकूच हें आनी हेर प्रकार बंद करप शक्य जावंक ना. म्हणटकच घोशणे परस कृती म्हत्वाची!! गोंय देशांतलें मुखेल पर्यटन थळ. पूण भायर तें बदनाम जालां. सोशल मिडियाचो वापर करून कांय लोकांनी गोंयच्या पर्यटन मळाचें नांव घाण केलां. हातूंतल्या सगल्यांकूच वायट अणभव आयला अशें ना. म्हणटकच बदनामी फाटल्यान कसलें कट कारस्थान आसा, ताचो सोद सरकारान घेवंक जाय.
कोयर नेमको कित्याक लागून जाता? सोऱ्याच्यो, उदकाच्यो बाटल्यो, चिप्साचीं पाकिटां. कांय लोक थंयच रावतात, जेवतात, उश्टें उडयतात. भौशीक शौचालयांचो वापर चड जायना. ताका लागून हळशीक पातळटा. कांय पर्यटकांचो सभावूच विचित्र आसता. तांणी दुसरे कडेन येतात तेन्ना सुसंस्कृतपणान वागपाक जाय. सैम इबाडटलो अशें कांय करपाक जायना. शिश्टाचार, समाजीक नेम पाळुकूंच जाय. सगल्यांत म्हत्वाचें, सगल्यांनी पियेवपाचेर नियंत्रण दवरूंक जाय. चड नशा केल्यार दुर्घटनाय जावं येता. विदेशांत वतकच आमी नेम पाळटात, मागीर देशांत ही बेशिस्त कित्याक? घर की मुर्गी दाल बराबर, आतां पुरो!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
