भांगरभूंय | प्रतिनिधी
पणजेंत 9 ऑक्टोबराक जातलें महोत्सवाचें उक्तावण
पणजी: गोंयांत जावपी संवसारीक पर्पल महोत्सवात अंदूं 25 देशांतले 15 हजार प्रतिनिधी वांटेकार जातले. पर्पल महोत्सव 9 ऑक्टोबर ते 12 ऑक्टोबर मेरेन पणजेंत मनरिजवण संस्थेच्या संकुलात जातलो. 9 तारखेक सांजे 4 वरांचेर महोत्सवाचें उक्तावण जातलें. केंद्रीय समाजीक न्याय खात्याचे मंत्री डॉ. वीरेंद्र कुमार, केंद्रीय मंत्री रामदास आठवले, मुख्यमंत्री डॉ. प्रमोद सावंत, हेर मंत्री, आमदार उक्तावण सुवाळ्याक हाजीर रावतले.
गोंयचे दिव्यांग खात्याचे मंत्री सुभाष फळदेसाय हांणी पत्रकार परिशदेंत ही म्हायती दिली. ह्या वेळार आयुक्त गुरुप्रसाद पावसकार, खात्याच्यो संचालक वर्षा नायक, सचीव तहा हाजीक, दिव्यांग सल्लागार मंडळाचे वांगडी प्रकाश कामत हाजीर आशिल्ले.
अंदूंचो पर्पल महोत्सव व्हड दबाज्यान जातलो. आतां मेरेन 10 हजार प्रतिनिधींची नोंदणी जाल्या. आनीक 5 हजार प्रतिनिधींची नोंदणी जावपाची आस्त आसा. उक्तावणा पयलींच ब्लायंड क्रिकेट सर्त, व्हीलचेर सर्त तशेंच हेर कार्यावळी सुरू जाल्या. महोत्सवा खातीर 14 कोटींचो खर्च अपेक्षीत आसा.
पर्पल महोत्सवांत तरेकवार अश्यो 25 परिशदो जातल्यो. एकवटीत राष्ट्रसंघाचे प्रतिनिधी महोत्सवांत वांटेकार जातले. पर्पल थींक टँक, पर्पल प्रदर्शन, पर्पल स्पोर्टस अश्यो कार्यावळी महोत्सवांत जातल्यो. महोत्सवाची लागीं लागीं 90 टक्के तयारी पुराय जाल्या. सरकारी खात्यांचे 150 अधिकारी आनी 600 कार्यकर्ते महोत्सवाची तयारी करतात.
गोंयांत दिव्यांग लोकांचो आकडो 80 हजारां लागीं आसूंक जाय. आतां मेरेन 35 हजार दिव्यांगांची नोंदणी जाल्या. दिव्यांगांचें सर्वेक्षण सुरू आसा.
सुभाष फळदेसाय, दिव्यांग मंत्री
………
उपचारा खातीर गोंयांत दोन थेरपी व्हॅनी
दिव्यांगांचेर उपचार करपा खातीर दोन थेरपी व्हॅनींची वेवस्था जातली. दिव्यांगांचेर उपचार करपाची वेवस्था ह्या व्हॅनींनी आसतली. महोत्सवांत दिव्यांगांच्यो एकाच मशिना वरवीं भलायके संबंदी वैजकी चांचण्यो जातल्यो. बीपी, शुगर तपासपाची वेवस्था ह्या मशिनांत आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
