भांगरभूंय | प्रतिनिधी
भांगरभूंय । प्रतिनिधी
काणकोणः पर्तगाळ मठाच्या दुसऱ्या टप्प्यांतल्या बांदकामाचो बुन्यादी फातोर विद्याधीश स्वामीचे हस्तुकीं बसयलो. वीर विठ्ठल देवूळ आनी प्रशासकीय कार्यालयाचो ह्या बांदकामांत आसपाव आसा. कार्यावळीक मठ समितीचे पदाधिकारी आनी विशेश विद्यार्थी हाजीर आशिल्ले.
मठ परंपरेतले द्वारकानाथ स्वामीच्या 30वे पुण्य तिथी निमतान फाटल्या सोमाराक ही कार्यावळ जाली. तीन सुवातांनी बुन्यादी फातोर बसोवन चार शिलांचे पूजन केलें. मोखर्ड हांगच्या लोक विस्वास प्रतिष्ठानाच्या विशेश विद्यार्थ्यां वतीन प्रातिनिधीक रुपांत सात्त्विक शानबाग आनी मडगांवच्या इशान कामतीन मानेस्तां वांगडा बुन्यादी फातोर बसयलो. उपरांत स्वामीन सगल्या विद्यार्थ्यांक प्रसाद दिलो. शिक्षिका आदिती फळदेसाय, सल्लागार समितीचे पदाधिकारी शिरीष पै विद्यार्थ्यां वांगडा आशिल्ले.
लोकांच्या आधारान चलवी लोक विस्वास प्रतिश्ठानाच्या सामजाकी वावराची दखल घेवन स्वामीन मठाच्या बांदकामाचो बुन्यादी फातोर बसोवपाचे कार्यावळी खातीर खासा आमंत्रण दिवप हो लोक विस्वास प्रतिश्ठानाक मेळल्लो देवाचोच आशिर्वाद आसा अशे प्रतिश्ठानाचो अध्यक्ष अनुप प्रियोळकारान सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
