भांगरभूंय | प्रतिनिधी
श्रीरामाच्या 77 फूट मुर्तीचें प्रधानमंत्र्यां हस्तुकीं अनावरण
अध्यात्म, राष्ट्रसेवा, उदरगत विकसीत भारता खातीर म्हत्वाची
अध्यात्मीक वावरा वांगडाच पर्तगाळ मठान केलें संस्कृतीचें संवर्धन
भांगरभूंय । प्रतिनिधी
पणजी : विकसीत भारताचें सपन साकार करचे खातीर अध्यात्म, राष्ट्रसेवा आनी उदरगत ह्या तिनूय गजालींचो समन्वय आसप खूब म्हत्वाचें. पर्यटनाचो मुखेल वांटो आशिल्लें गोंय आनी अध्यात्मीक वावर करपी पर्तगाळ मठाची विकसीत भारत 2047 खातीर म्हत्वाची भुमिका आसतली, अशें प्रधानमंत्री नरेंद्र मोदी हांणी सांगलें.
पर्तगाळ जीवोत्तम मठाच्या 550 व्या वर्सपुर्ती निमतान श्रीरामाच्या 77 फूट उंच मुर्तीचें अनावरण जालें. ह्या निमतान प्रधानमंत्री उलयताले. ह्या वेळार तांणी पर्तगाळ मठाचो अध्यात्मीक वावर आनी सेवेची तोखणाय केली.
ह्या सुवाळ्याक राज्यपाल पुसापती अशोक गजपती राजू, मुख्यमंत्री डॉ. प्रमोद सावंत, केंद्रीय मंत्री श्रीपाद नायक, भौशीक बांदकाम मंत्री दिगंबर कामत, मठाचे केंद्रीय समितीचे अध्यक्ष श्रीनिवास धेंपो, श्रीपाद वडेर स्वामी आनी हेर मानेस्त उपस्थीत आशिल्ले.
सगल्या भक्तांक आनी अनुयायांक मायेमोगाचो नमस्कार, ह्या कोंकणी वाक्यान प्रधानमंत्री मोदी हांणी भाशणाक सुरवात केली.
अध्यात्मीक वावर करतनाच पर्तगाळ मठान संस्कृतीचें संवर्धन केलें. बदलते परिस्थितींत सेवा वावर चालू दवरतना मठान आपली दिशा बदलूंक ना आनी लोकांक दिशा दिवपाचें काम केलें. समाजाक आनी राष्ट्राक योग्य दिशा दिवचे खातीर अध्यात्म, इतिहास आनी संस्कृतीची गरज आसता. भक्ती आनी शिस्तीक लागून एक सामुहीक उर्जा तयार जाता. लोकांचीं मनां जोडटना परंपरा आनी आधुनिकता हांचे मदलो पर्तगाळ मठ हो एक म्हत्वाचो दुवो जाला.
विकसीत भारताचें सपन साकर करचे खातीर दरेकल्यान पर्यावरणा सयत उदकाचें संवर्धन करपाक जाय. सेंद्रीय शेती वांगडाच सक्षम अशी जिणेशैली आपणावपाक जाय, अशेंय प्रधानमंत्र्यांनी सांगलें.
मठ समितीचे अध्यक्ष श्रीनिवास धेंपो हांणी येवकार दिलो. श्रीमद विद्याधीश तीर्थ स्वामी हांणी मठ आनी वावराची म्हायती दिली.
पर्तगाळ मठ जातलें म्हत्वाचें पर्यटन थळ : मुख्यमंत्री
विकसीत गोंय 2037 चें उदिश्ट पुराय करतना अध्यात्मीक उदरगत लेगीत म्हत्वाचो घटक आसा. पर्तगाळ मठान अध्यात्मीक वावर करतना परंपरा आनी संस्कृतीचो सांबाळ केला. पर्तगाळ मठ फुडारांत म्हत्वाचें पर्यटन थळ जातलें, अशी आस्त मुख्यमंत्री डॉ. प्रमोद सावंत हांणी उक्तायलो.
जिवितांत गोंय थारलां म्हत्वाचें थळ : प्रधानमंत्री
कित्याक तें म्हाका खबर ना, मात म्हज्या जिवितांत गोंय हें म्हत्वाचें थळ थारलां. गोंय हें म्हाका सेगीत फुडल्या पांवड्यार व्हरता, अशें प्रधानमंत्री नरेंद्र मोदी हांणी म्हणलां. प्रधानमंत्री नरेंद्र मोदी हांणी भाशणांत गोंया सयत पर्तगाळ मठाच्या वावराच्या लेगीत खूब तोखणाय केली. मठाची म्हायती दितना पर्तगाळ मठाच्या श्रीमद विद्याधीश तीर्थ स्वामी हांणी प्रधानमंत्री मोदी विशीं खूब म्हायती सांगली. प्रधानमंत्री मोदी हांचे आवयचो जल्मदीस 18 जून आसा, जो गोंयचो क्रांतीदीस आसा. श्रीकृष्णाचें राज्य आशिल्ली द्वारका हेच मोदींचें लेगीत जल्मस्थान आसा, अशें स्वामीजीन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
