परेश कामतीचो ‘चित्रलिपी’ आतां मराठींत

भांगरभूंय | प्रतिनिधी

कोंकणीचे नामनेचे कवी आनी अनुवादक परेश नरेंद्र कामत हांच्या ‘चित्रलिपी’ ह्या साहित्य अकादेमी पुरस्कार जैतिवंत कविता संग्रहाचो मराठी अणकार साहित्य अकादेमी, नवी दिल्लीन उजवाडाक हाडला. कवी गीतेश गजानन शिंदे हांणी हो मराठी अणकार केला. कोंकणी कवितेंत आगळी चित्रमयता आनी रंगबोलयेची खाशेली शब्दकळा आशिल्ली परेश कामतीची कविता आतां मराठी वाचकां मेरेन पावल्या.
कवी परेश कामत हांकां 2018 वर्साचो प्रतिश्ठेचो साहित्य अकादेमी पुरस्कार फाव जाल्लो. तांचे आतां मेरेन अळंग, गर्भखोल, शुभंकर, चित्रलिपी, रंगबोली हे पांच कविता संग्रह उजवाडाक आयल्यात आनी त्या संग्रहांक गोंय सरकाराचे अनेक राज्य पांवड्या वयले पुरस्कार फाव जाल्यात. त्या भायर मुंबय आनी मणिपालच्या प्रतिश्ठेच्या पुरस्कारांनीय कवी परेश कामत सन्मानीत जाल्यात. हिंदीचे नामनेचे कवी राजेश जोशी हांच्या ‘दो पंक्तियों के बीच’ ह्या साहित्य अकादेमी पुरस्कार फाव जाल्ल्या कविता संग्रहाचो तांणी साहित्य अकादेमी खातीर कोंकणीत अणकार केला.
‘चित्रलिपी’ संग्रहाचें खाशेलपण म्हळ्यार ह्या संग्रहांत थीम कवितांचो कवीन प्रयोग केला. उदक, व्हडीं, काळोख, उजवाड, झाड, पक्षी, मूय, भूंय असो आदिमकाळा पासून अनंतकाळा मेरेनचो प्रवास कवीन चित्रीत केला. तांच्या कांय कवितांनी ‘काँट्रास्टींग इमेजरी’ दिश्टी पड्टा. ह्या कवितांनी तूं- हांव मदले परस्पर संबंद मानवी संवेदनांक तरल पांवड्यार व्हरतात. सगळ्यांत म्हत्वाचें म्हळ्यार हे कवितेची नाळ भुंये कडेन जितली घट्ट जोडिल्ली आसा, तितलीच ती उदकाचे तरंग आपल्या आंगापांगार खेळयत रावता.
परेश कामतीच्या कोंकणी कवितांचे अणकार हिंदी, पंजाबी, मराठी, गुजराती, उडिया, आसामी, कश्मिरी आनी इंग्लिश अशा साबार भाशांनी जाल्यात. तांच्या कवितांचो गोंय विद्यापीठ आनी सोलापूर विश्वविद्यालयांत बी ए आनी एम एच्या अभ्यासक्रमांत आसपाव जाला.
कवी गीतेश शिंदे हे मराठींतले नामनेचे कवी, लेखक आनी अनुवादक आसात. तांचो ‘निमित्तमात्र’ हो स्वतंत्र कविता संग्रह उजवाडाक आयला आनी त्या संग्रहाक राज्य पांवड्या वयले साबार पुरस्कार फाव जाल्यात. कोंकणींतले जेश्ठ कवी माधव बोरकार हांच्या ‘यमन’ ह्या साहित्य अकादेमी पुरस्कार फाव जाल्ल्या कविता संग्रहाचो तांणी साहित्य अकादेमी खातीर मराठी अणकार केला. ‘सृजनसंवाद’ हे प्रकाशन संस्थेचे ते संपादक आसात.