भांगरभूंय | प्रतिनिधी
तुमचें हालींच ‘द कमबॅक’ हें इंग्लिश कथांचें पुस्तक ऑनलायन माध्यमांचेर प्रसिद्ध जालां, हाचे विशीं सांगशात?
‘द कमबॅक’ हो एक ल्हानसो कथासंग्रह, पूण खूब वेगळे तरेच्यो कथा तातूंत सांगल्यात. चमत्कारिक परिस्थितींत घुस्पून उरिल्ले लोक तातूंतल्यान भायर सरतात, आपलें स्वत्व, स्वाभिमान, आपलो आत्मा परत मेळयतात हीच ‘थीम’ सगळ्या कथांनी आसा. कथा म्हणलें की खूब फावट आमकां प्रेमकथा, हास्यकथा, ना जाल्यार भयानक, सामाजिक परिस्थितीचेर भाश्य करपी करूण काणयो याद जातात, पूण असले कसलेच विशय ह्या कथासंग्रहांत नात. आमच्या सदच्या जिणेंत अशे कांय प्रसंग घडटात जे आमच्या काळजाक लागतात आनी आमकां बदलतात. हे प्रसंग बरे आनी वायट दोनूय जावं येतात. अशेच कांय प्रसंगांच्यो काणयो ह्या कथासंग्रहांत आसात.
तुमकां या पुस्तकाची कल्पना अशी सुचली? ह्या पुस्तकांतल्या काणयां फाटली काणी कितें ?
आमच्या भोंवतणी ज्यो घटना घडटात तांकांच वेगळ्या दृश्टींतल्यान मांडपाचो यत्न हांवें केला. कांय म्हजे, कांय म्हज्या इश्टांचे अणभव, आयकिल्ल्यो काणयो हांचेर ह्यो कथा आदारीत आसात. ह्या पुस्तकांतली पयलीच काणी एका संन्याशाची आसा, जो संन्यास सोडून आपल्या आदल्या संसारांत परत येता. हांव कांय अध्यात्मिक संस्थांच्या संपर्कांत आयिल्लों, थंय वेदांताचें तत्वज्ञान शिकलों. तांणी म्हाका ब्रह्मचारी जावन तांच्या संघटनेन येवपाची विनंती केली. पूण म्हजे विचार स्वतंत्र आसात. चांगल्या राहणीमानाची म्हाका आवड आसा, म्हूण हांवें हो प्रस्ताव न्हयकारलो. पुराणांत व्हडले -व्हडले राजे राज्य सोडून वनवासाक गेल्ल्याच्यो कथा आमी सदांच आयकतात, तीच कल्पना उलट केली आनी संन्यासी आपल्या संसारांत परत येता अशें जालें जाल्यार कितें अशें म्हाका ह्या वेळार दिसलें आनी ताचेर हांवें कथा बरयली!
ऑनलायन माध्यमांतल्यान पुस्तकां खपपाक कसलीं आडमेळीं बी येतात आनी आनी पुस्तक विकप फायद्याचें थारता?
बुक विकपाक समाजमाध्यमांचेर बरें ‘फॉलोविंग’ आसप गरजेचें आसा. हे फॉलोवर मेळोवपाक सतत किदें ना किदें पोस्ट करीत रावपाक जाय. तें खूब कठीण. दुसरें म्हणल्यार जगाच्या विविध भागांतले लोक तुमकां फॉलो करतात, पूण ते तुमचें पुस्तक विकत घेतलेच अशें ना. कोट्यांनी फॉलोवर आसल्यार पुस्तकांच्यो शेकड्याने कॉपी खपतल्यो, पूण ते कोट्यांनी फॉलोवर मेळोवपाक खूब वेळ आनी शक्त खर्च करची पडटा. ऑफिस आनी संवसार हांचे मदीं व्यस्त आशिल्लो. म्हजे सारको सामान्य मनीस सातत्यान सोशल मिडीयाचेर कंटेंट पोस्ट करपाक शकना. ऑनलायन पुस्तक प्रसिद्ध करप खूब सोंपें आसा, पूण विकप इतलें सोंपें ना.
कम बॅक ह्या साहित्यकृतींतल्यान तुमी सकारात्मक संदेश दिवपाचो यत्न केला, तुमचे जिणेंत बी तुमी अशें कम बॅक केलां?
कोविड काळांत एक अणभव म्हाका आयलो, पूण तो खूब बरो आनी धक्कादायकय आनी जीण बदलपी आशिल्लो. हो अणभव ’वर्क फ्रॉम होम’ करपाचो. खरें म्हणल्यार म्हजो पिंड हो फिक्शन कथालेखकाचो. बिझनेस रायटिंग हो प्रकार म्हाका तेन्ना नवो अशिल्लो. कामांत खूब चुको जाताल्यो, खूब कितें आयकून घेवचें पडटाले. मागीर एक दीस हें सगळें नाका म्हूण हांवें विचार केलो की घर सोडून काशीक वतलों, थंय खंयच्यातरी देवळांत न्हिदतलों, कसो तरी रावतलों, पूण ही असली जीण नाका. हांवें म्हज्या घरकान्नीक म्हणलें बाय, हांव चल्लों, म्हज्यान आनीक जायना. हांचेर म्हजी अपेक्षा आशिल्ली की ती म्हजी समजूत काडटलीं, काळजी करू नाका अशें सांगतली, पूण जालें दुसरेंच. घरकान्नीन म्हाका म्हणलें ‘तू जर गेलो जाल्यार तुज्या फाटल्यान हांवूंय बी येतलें, तूं रावता थंय रावतलें, पूण तुजी साथ सोडचें ना. त्या खिणाक म्हाका जबाबदारी म्हटल्यार कितें तें कळ्ळें, प्रेम म्हणल्यार कितें तें कळ्ळें आनी जिणें म्हजेर इतलो विस्वास दवरलो तिचो तो विस्वास केन्ना तोडचो ना अशें थारोवन हांव नव्या आत्मविस्वासान उबो रावलों.
तुमचें आदलें एक पुस्तक किंडलाचेर आसा, ताचो प्रतिसाद कसो आशिल्लो?
म्हजें पयलें पुस्तक ‘ऑल इन अ डेज वर्क’ हें सुमार 40 लोकांनी विकत घेतलें. पूण तातूंत जर्मनी, अमेरिका अशा भायल्या देशांनी स्थायीक जाल्ले म्हजे खूबशे इश्ट आशिल्ले. तांणी परकी चलनांत म्हजे पुस्तक घेतलें ताका लागून म्हाका फायदो जालो.
तुमचे विचार चड गतीन लोकां मेरेन पावयतले जाल्यार खंयचें माध्यम प्रभावी अशें दिसता?
आतां प्रभावी माध्यम म्हणल्यार आमकां सोशल मीडिया दिसतालें, पूण तातुंतूय बी विविध प्रकारची माध्यमां आसात. खूब व्हडलें फेसबूक पोस्ट लोक चड वाचीनात. इंस्टाग्राम रिल्स, युट्युब व्हिडीओस हे चड प्रभावी आसा. ताच्याच बरोबर पॉडकास्ट हे माध्यम सध्या फुडें येता.
तुमचें आनीक पुस्तक येवपाचें बी वाटेर आसा?
हय. सध्या ‘इन्फ्लुएन्सर’ नांवाचे लोक सगळी कडेन चर्चेंत आसात. तातुंतूय ‘फ़िन्फ्लुएन्सर’ म्हटल्यार फायनान्शिअल इन्फ्लुएन्सर, सोशल मीडियाचेर गुंतवणूक आनी बचत हांचेर कितें ना कितें ज्ञान दित असतात. तशेंच ज्ञान दिवपी कांय पुस्तकांय आसात. म्हजें फुडलें पुस्तक हें अशा ‘सेल्फ हेल्प बुकाचें’ विडंबन आसा!
पुस्तकां छापून तीं विकचीं अशें तुमकां कित्याक दिसना? छापपाची प्रक्रिया आतां परवडना अशें दिसता?
आॅनलायन पुस्तक प्रसिद्ध करपाची प्रक्रिया फुकट आसा. आनी हीं पुस्तकां खपलीं जाल्यार लेखकाक 35% ते 70% वांटो मेळटा. हाच्या उलट पुस्तक छापपाक हजारांनी रुपयांचो खर्च येता. मागीर पुस्तक विक्रेत्यांकडे वचून तीं तांणी आपल्या दुकानांत विकपाक दवरचीं म्हूण तांकां विनवणी करची पडटा. तांणी मानुंकना जाल्यार पुस्तक लोकां फुडें येवप कठीण. त्या परस ऑनलायन मार्केटिंग खूब सोंपें. आतां अमेझॉनाचेर तुमी बुकाची छापील आवृत्ती फुकट प्रकाशित करूंक शकतात. ‘ऑन डिमांड प्रिंट’ करून अमेझॉन हें पुस्तक विकता आनी लेखकाक पयशे दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
