भांगरभूंय | प्रतिनिधी
मडगांव : सध्याच्या 12 वांगड्यांच्या मंत्रिमंडळांत सात मंत्री हे कॉंग्रेसीचे आसात. कॉंग्रेसीक कुशीक काडून परिवर्तन हाडपा खातीर लढो दिल्ल्या मूळ भाजप कार्यकर्त्यांचे श्रम मातये भरवण जाल्यात. परिवर्तन कांयच जावंक ना, हें ‘ओल्ड वायन इन न्यू बॉटल’ अशें जालां, अशी प्रतिक्रिया आमदार विजय सरदेसाय हांणी मंत्रिमंडळाच्या बदलाचेर दिली.
गोवा फॉरवर्डाचे अध्यक्ष विजय सरदेसाय हांणी राज्यांतल्या दोन मंत्र्यांचे सोपूत विधीचे फाटभूंयेर सरकारांत कॉंग्रेसीच्या काळांत मंत्री आशिल्ले आतांय आसात, अशें सांगून टिका केली. आमदार दिगंबर कामत हे फाटल्या तीन वर्सांच्या काळा उपरांत वाट पळोवन आतां मंत्री जाल्यात. 2007 ते 2012 ह्या काळांत कॉंग्रेसी आड आंदोलन करीत, लढो उबारीत मूळ भाजप कार्यकर्त्यांनी परिवर्तनाची साद दिल्ली. आतांच्या मंत्रिमंडळाचो नियाळ घेतल्यार तेन्ना कॉंग्रेसीच्या मंत्रिमंडळांतले सात मंत्री आयज भाजपच्या मंत्रिमंडळांत आसात. हातूंत दिगंबर कामत, विश्वजीत राणे, बाबूश मोन्सेरात, रवी नायक, सुभाष शिरोडकार, नीळकंठ हळर्णकार आनी मॉवीन गुदिन्हो हांचो आसपाव आसा. सध्याच्या मंत्रिमंडळांत दिगंबर कामत हांच्या सहकार्याचें भोवमत दिसता. मूळ भाजप कार्यकर्त्यांनी आंदोलन करुन 2012 वर्सा परिवर्तनाचें सरकार हाडलें, तांचो संघर्श सध्या फुकट गेला. तांणी आतां कितेंच उलोवचें, करचें न्हय असो संदेशूय दिला. हें सगलें पळयल्यार परिवर्तन बी कांयच जावंक ना. फकत आदलो सोरो नवे बाटलेंत, असोच हो प्रकार, अशें सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
