भांगरभूंय | प्रतिनिधी
ब्रह्मेशानंद स्वामीः श्री विजयानंद विद्यालयाचे नवे इमारतीचें उक्तावण
भांगरभूंय । प्रतिनिधी
दिवचलः नवें शिक्षणीक धोरण विद्यार्थ्यांचे सर्वांगी उदरगतीक चालना दितले. सुसंस्कृत, परिपूर्ण मनीस घडोवपी शिक्षण आत्मसात करचे खातीर खरो इतिहास मुखार येवप गरजेचें आसा, अशें दत्त पद्मनाभ पीठ पिठाधिश्वर पद्मश्री सद्गुरू ब्रह्मेशानंद स्वामी हांणी सांगलें.
तिखाजन मयेंच्या श्री विजयानंद ज्ञानप्रसारक संस्थेच्या श्री विजयानंद हायस्कुलाचे नवे इमारतीचें उक्तावण तशेंच प्रा. नित्यानंद नायक यादस्तीक सभाघराचें उक्तावण ब्रह्मेशामंद स्वामीचे हस्तुकीं जालें. ह्या वेळार ते उलयताले. तांचे वांगडा माचयेर केंद्रीय मंत्री श्रीपाद नायक, मंत्री सुभाष शिरोडकार, आमदार प्रेमेंद्र शेट, शैलेश झिंगडे, भगीरथ शेट्ये, कमलाकांत तारी, धर्मा चोडणकार, विद्यानंद कारबोटकार, शंकर चोडणकार, संदेश पार्सेकार, अध्यक्ष रुपेश ठाणेकार तशेंच संस्थेचे सगळे पदाधिकारी हाजीर आशिल्ले.
भुरग्यांक बऱ्या दर्ज्याचें शिक्षण मेळचें हे खातीर वावुरपी विजयानंद ज्ञानप्रसारक संस्थेचो वावर इतिहासीक आसा. रुपेश ठाणेकार आनी तांच्या सांगात्यांचो वावर असामान्य आसा. नवें शिक्षणीक धोरण बरें आसा. ताका लागून देश आनी मनीस समृद्ध जातलो. ते खातीर ताका सगळ्यांनी तेंको दिवचो. तशेंच शिक्षकांची भुमिका म्हत्वाची आसा. तांकां बरें प्रशिक्षण दिवपाची गरज आसा. विद्यार्थीच न्हय जाल्यार देश घडोवपाचो वावर शिक्षक करतात. आयज अभ्यासक्रमांत बदल करपाची गरज आसा. राम, लक्ष्मण, सीता हांचें संस्कार करपी शिक्षण नासत जाल्यार तें कसल्याच कामाचें ना. हिंदूंनी सगळयांची राखण केली, मान दिला. शालेय शिक्षणा वांगडा मुल्यां लेगीत गरजेचीं आसात, अशें ब्रह्मेशानंद स्वामी हांणी सांगलें.
केंद्रीय मंत्री श्रीपाद नायक हांणी सांगलें, गंवगिऱ्या वाठारांत दूरदिश्टी दवरून मयें गांवांत शिक्षणीक क्रांती घडटा. आयज झाडाचें रुखांत रुपांतर जालां. शिक्षणाचें म्हत्व वळखून ही संस्था वावर करता. सुसंस्कृत समाज निर्मिती खातीर शिक्षणा वांगडाच धर्माची आनी संस्काराची जोड आसची पडटा, अशें तांणी सांगलें.
मंत्री सुभाष शिरोडकार हांणी सांगलें, शिक्षणीक संस्था चलयतना ताचो दर्जो सांबाळप म्हत्वाचें आसा. शिक्षक, विद्यार्थी हांचें योगदान लेगीत म्हत्वाचें आसा. इमारत बांदप हें पुण्याचें काम. गांवगिऱ्या वाठारांत शिक्षणीक सेवा दिवपाचें काम म्हान आसा. बऱ्या दर्जाचें शिक्षण दितना फुडले पिळगे खातीर खूबश्या मळार उंच उड्डाण घेवचे खातीर सगळ्यांनी योगदान दिवचें.
आमदार प्रेमेंद्र शेट हांणी संस्थेच्या वावराक परबीं दिली. ही संस्था शिक्षणीक हब जावचें, बरे नागरीक घडोवचे खातीर सगळ्याच मळार विद्यार्थ्यांक घडोवचे खातीर योगदान दिवपाची गरज आसा, अशें तांणी सांगलें.
उदय पत्रे हांणी येवकार दितना संस्थेच्या वावराचो नियाळ घेतलो. ह्या वेळार धर्मा चोडणकार, शैलेश झिंगडे, भगीरथ शेट्ये, शंकर चोडणकार हांणी शुभेत्सा दिल्यो. अनंत अग्नी हांणी नित्यानंद नायक हांच्या वावराची म्हायती दिली. ह्या वेळार विवीध मानेस्तांचो संस्थे वतीन ब्रह्मेशानंद स्वामींचे हस्तुकीं सत्कार केलो. रुपेश लिंगडकार हांणी सुत्रसंचालन केलें जाल्यार रुपेश ठाणेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
