भांगरभूंय | प्रतिनिधी
लखनौ, खबरां संस्था ः उत्तर प्रदेशांतल्या चार विद्यार्थ्यांनी देवाच्या नांवान परिक्षेत गूण मागले आनी तांकां ते मेळ्ळेय. ही घडणूक उजवाडाक आयले उपरांत संबंदीत प्राध्यापकांक नोकरे वयल्यान काडून उडोवपाची कारवाय सुरु केल्या.
नेमके कितें घडलें?
उल्लेख केल्लो प्रकार उत्तर प्रदेशांतल्या वीर बहादुर सिंह पूर्वांचल विद्यापिठांत घडलां. फ्री प्रेस जर्नलान हे संबंदी सविस्तर खबर दिला आनी त्या अहवाला प्रमाण विद्यापिठाच्या आदल्या विद्यार्थ्यान दाखल केल्ल्या म्हायती हक्काच्या अर्जांतल्यान हो प्रकार उजवाडाक आयला. ह्या विद्यापिठांतल्या पयल्या वर्साच्या चार फार्मसी विद्यार्थ्यांनी फार्मसी परिक्षेच्या पेपरांत फकत ‘जय श्री राम, आमी पास जावनी’ आनी कांय क्रिकेट खेळगड्यांचीं नांवां बरयलीं. हातूंत रोहित शर्मा, विराट कोहली, हार्दिक पांड्या ह्या भारतीय क्रिकेट खेळगड्याचो आस्पाव आसा.
परिक्षेचो निकाल आयले उपरांत हे विद्यार्थी 56 टक्क्यांनी पास जाल्ल्याचें उक्तें जालें. परिक्षेंत गैरवेव्हार जाल्ल्याचो दुबाव आशिल्ल्यान दिव्यांशु सिंग नांवाच्या विद्यार्थ्यान आरटीआय खाला वट्ट 18 विद्यार्थ्यांचीं उत्तरपत्रिकां घेवन तांची परतून तपासणी करपा खातीर अर्ज दाखल केलो. दाखल केल्ल्या अर्जाक जाप दितना ह्या चार विद्यार्थ्यांच्या उत्तरपत्रांत हो पुराय मजकूर आशिल्ल्याचें दिसून आयलें.
प्राध्यापकांचेर पयशे खाल्ल्याचे आरोप
मजगतीं, विद्यापिठाचे प्राध्यापक पयशे घेवन विद्यार्थ्यांक पास करतात अश्यो कागाळी पयलीं आयिल्ल्यो. हे संबंदी संबंदीत विद्यार्थ्यान उत्तर प्रदेशाच्या राज्यपालाकय पत्र बरोवन कागाळ केल्ली. तांणी 21 डिसेंबर 2023 दिसा चवकशी करपाचो आदेश दिल्लो. निमाणें हे संबंदी अहवाल सादर केला आनी संबंदीत प्राध्यापकांक गुन्यांवकार थारायल्यात. तांचे आड विद्यापिठ खर कारवाय करतले अशेंय स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
