भांगरभूंय | प्रतिनिधी
सगल्या शाळांनी ही कार्यावळ दाखयतले
पणजीः ‘परिक्षा पे चर्चा’ कार्यावळींत प्रधानमंत्री नरेंद्र मोदी फाल्यां 29 तारखेक विद्यार्थी, शिक्षक आनी पालकां कडेन संवाद सादतले. परिक्षेचो ताण उणो करपा खातीर राज्यांतल्या सगल्या विद्यार्थ्यांनी तशेंच पालकांनी ही कार्यावळ पळोवची, अशें आवाहन मुख्यमंत्री डॉ. प्रमोद सावंत हांणी केलां.
प्रधानमंत्री मोदी हांची आयज आयतारा ‘मन की बात’ कार्यावळ जाली. सांखळे रवींद्र भवन सभाघरांत हेर लोकां सयत मुख्यमंत्र्यांनी व्हडले स्क्रीनीचेर कार्यावळ पळयली. ह्या वेळार आमदार प्रेमेंद शेट, आमदार डॉ. चंद्रकांत शेट्ये, सांखळेची नगराध्यक्ष रश्मी देसाय, पक्ष वावुरपी आनी हेर लोक व्हडा संख्येन हाजीर आशिल्ले.
‘मन की बात’ कार्यावळींत प्रधानमंत्र्यांनी पद्म पुरस्कारांचो उल्लेख केलो. अयोध्येतली रामाची प्राणप्रतिष्ठा तशेंच नारी शक्तीचो तांणी उल्लेख केलो. ‘मन की बात’ कार्यावळीक लागून लोकांक कन्याकुमारी ते काश्मीर मेरेनचे प्रस्न समजुपाक खूब मजत जाता, अशें मुख्यमंत्र्यांनी सांगलें.
आयज ‘परिक्षा पे चर्चा’ कार्यावळ जातली. कांय विद्यार्थ्यांक परिक्षेचो ताण सोंसना. हो ताण हलको जावपा खातीर विद्यार्थ्यांनी ‘परिक्षा पे चर्चा’ कार्यक्रम पळोवपाक जाय, अशें मुख्यमंत्र्यांनी सांगलें.
मजगतीं, राज्यांतलीं सगलीं विद्यालयां आनी उच्च माध्यमीक विद्यालयांनी ‘परिक्षा पे चर्चा’ कार्यावळ णवी आनी वयल्या यत्तांनी शिकपी विद्यार्थ्यांक स्क्रिनीचेर दाखोवपाची वेवस्था करची, अशें परिपत्रक राज्य शिक्षण संशोधन मंडळान जारी केलां. कार्यावळ पळोवपी विद्यार्थ्यांचे फोटे धाडपाकूय विद्यालयांक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
