भांगरभूंय | प्रतिनिधी
भावंडांनो,
तुमच्यांतल्या कांय जाणांच्यो परिक्षा अजून सुरू जावच्यो आसात. ते खातीर तुमी बिनधास्त आसात न्हय? पुणून तुमी भोंवतणी नदर मारल्या? आं .. घरांत तुमचीं वडील भावंडां सामकी अभ्यासांत भरसून गेल्यांत. कारण, तांच्यो परिक्षा सुरू जाल्यात. काल सावन.. आनी फुडले तीन सप्तकभर ती चालू उरतली. म्हणून म्हण्टां, भावंडांनो तुमी थोडे दीस घरांत शांतताय राखात आं?
परिक्षेक लागून तुमचेर टेन्शन ना. देखून तुमी मेकळीं आसात. खेळाचें आनी हेर मनरिजवणेचें येवजितात. पुणून मात्शे तुमच्या भावंडांनो विचार करशात? करातूच. घरांत बोवाळ घालून तांच्या अभ्यासांत आडमेळीं हाडूं नाकात आं. हाडचिना ना न्हय?
म्हाका एक सांगांत, तुमकां तुमचो भाई वा दिदी, ताई वा व्हडली भावंडां फुडारांत दोतोर, इंजिनियर, वकील वा मोठो अधिकारी बी जावचो अशें दिसना? तशी तुमची इत्सा ना? म्हाका खबर आसा तुमी ‘ना’ म्हणचीं नात. म्हणटकच, तुमचीं भावंडां फुडारांत मोठी मनशां जावंक जाय जाल्यार तुमी तांची परिक्षा सोंप मेरेन तांकां आडमेळ हाडूंक फावना. तुमच्या वांगडा खेळपाक येवपाक तांकां बळजबरी करप ना. तांच्या अभ्यासांत आडमेळीं येतात अशे तरेन टिव्ही लावप ना. तांचे मुखार मोठमोठ्यान गजाली करप ना. खेळपूय ना. तुमी तशीं बरीं वागल्यार तुमचीं भावंडां बरे तरेन अभ्यास करूंक पावतली आनी बऱ्या गुणांनी पास जातलीं. मागीर तांची फुडाराचीं सपनां पुराय जावंक कळाव लागचो ना.
भावंडांनो, परिक्षेंत फकत पास जाली म्हणून जायना. तर मतींत दवरात. आयचो हो काळ स्पर्धात्मक आसा. सगळ्या मळांनी, वाटांनी आयज सर्त लागल्या. सगळे तरेचें शिक्षण घेवपाक प्रवेशा खातीर दरेकल्याक सर्तीक फुडो करचो पडटा. देखून म्हण्टां, पयलींच बऱ्या गुणांनी पास जाल्यार तुमी हे सर्तींतल्यान सहजतायेन मुखार वचूंक शकतात. तुमचें वा तांचें ध्येय साध्य करूंक पावतात. भावंडांनो, धावेची परिक्षा ही तुमच्या जिणेंतली म्हत्वाची परिक्षा आसा. तुमच्या फुडाराची बुन्याद हेच परिक्षेचेर आदारिल्ली आसा. देखुनच म्हण्टां भावंडांनो, तांच्यो परिक्षा सोंपसर मात्शी कळ सोसात. तांकां तांची परिक्षा बरे तरेन दिंवनी.
आनी भावंडांनो, तुमच्या व्हडल्या भावंडांक उलो मारून म्हाका इल्लेंशें सांगन दिसता तें म्हणल्यार भावंडांनो, तुमी परिक्षे खातीर वतना अर्दवर पयलींच केंद्रार पावात. तुमची आसन वेवस्था म्हणल्यार तुमची बसका जाणून घेयात. ऐन वेळार गडबड जावंक जायना. ते गडबडीन आबूज, गोंदळ जाल्यार जापो दिवपाचेर परिणाम जातलो. परिक्षे खातीर वतना जें साहित्य तुमकां जाय तें आदिंच पाउचांत वा कंपास पेटयेंत घालून तयार दवरात. तुमचें वळखपत्रूय वांगडा व्हरपाक विसर नाकात. यादीन सांबांळात तें. परिक्षेच्या वर्गांत प्रस्न पत्रिका सोडोवपाक दिल्ल्या पुराय वेळाचो उपेग करात. वर्गांतल्यान पयलींच भायर सरूं नाकात. वेळांत वेळ काडून बरयल्ल्यो जापो परतून एकदां वाचून पळयात. गडबडीन चूक जाली जाल्यार ते वेळार ती सुदारूं येता. शांत चित्तान आनी उमेदीन परिक्षेक फुडो करात.. तुमकां म्हज्या अपुरबायेच्या भावंडांक परिक्षे खातीर म्हज्यो लाख लाख शुभेच्छा.. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
