भांगरभूंय | प्रतिनिधी
परिक्षेची तयारी करतना खंयचोय विशय खूब कठीण आसा, म्हाका जमचो ना, म्हाका कांय कळना असो विचार केन्नाच करूंक जायना.
परिक्षा ही आपले जिणेंतलो एक म्हत्वाचो भाग जावन आसा. आतांच्या स्पर्धात्मक युगांत परिक्षेक चड म्हत्व आयलां. आमचे जिणेंत धावी आनी बारावी ह्यो दोन परिक्षा आमचो फुडार घडयता. आतां तर प्रत्येक शिक्षणीक पांवड्यार तरातरांच्यो परिक्षा दिवच्यो पडटात. परिक्षेंत बरें यश मेळपाक जाय जाल्यार खूब मेहनत घेवची पडटा. अभ्यासाचें नियोजन करप हें खूब गरजेचें आसा. हे खातीर प्रत्येक विशयाचो अभ्यासक्रम समजून घेवंक जाय. प्रत्येक विशयाच्या पाठांचें वाचन करूंक जाय, आनी त्या पाठांत कितें आसा तें लक्षांत दवरूंक जाय. त्या पांठांचे प्रस्न सोडोवपाचो यत्न करूंक जाय. आतां तर पुस्तकांच्या दुकानांनी यत्ता पांचवी पसूनचे गायड मेळटात म्हणून स्वाता वाचन करून पाठांतल्यान प्रस्नाच्यो जापो सोदून काडून बरोवपाचे त्रास लेगीत आतांची भुरगीं घेनात. हाका आतांचे पालकूय तितलेच जापसालदार आसात. आपूण खंयच्या विशयाचो अभ्यास करता, त्या विशयाच्या पाठांच्या प्रस्नांचीं उत्तरां बरोवन काडूंक जाय. ताका लागून आमकां आत्मविस्वास येता.
गणीत सारक्या विशयांत तर गणितां सोडोवन पळोवंक जाय. मागिरूच आमकां ती परिक्षेक बरीं सोडोवंक येतलीं. आतांच्या भुरग्यांची एक कागाळ आसता की वाचिल्लें लक्षांत उरना, याद जायना? पूण तूं कितलो वेळ अभ्यास करता तेंवूय बी चड म्हत्वाचें आसता. एक वर अभ्यास करप हाका अभ्यास करप म्हणिनात. बरो अभ्यास करपी भुरगो सात ते आठ वरां तरी अभ्यास करता आनी बरो पास जाता.
परिक्षेच्या दिसांनी आहार आनी न्हीद चड म्हत्वाची आसा. ह्या दिसांनी सकस आहार घेवपाक जाय, तेलकट, मसाल्याचें पदार्थ खावंक जायना. बरगर, पिझ्झा हें खावपाचें बंद करपाक जाय. बरी न्हीद लेगीत अभ्यासाक खूब मजत करता. रातीं बेगीन न्हिदून सकाळीं बेगीन उठून अभ्यास केल्यार चड लक्षांत उरता. आतांच्या भुरग्यांक जागरणां करपाची खूब वायट संवय लागल्या. मोबायलाचेर रातभर गेम खेळप, चेंटींग करप, व्हॉटसेप, फेसबूक आनी इश्टाग्रामाचो चड वापर करप हाका लागून मेंदवाचेर आनी तकलेचेर परिणाम जावपाक लागला. मागीर वाचिल्लें कशें लक्षांत उरतलें? बरें लक्षांत उरपाक जाय जाल्यार बरी न्हिदूय बी गरजेची आसता.
अभ्यास करतना आपूण खंय बसून अभ्यास करता हें जाणून घेवप खूब गरजेचें आसा. अभ्यासाची सुवात नितळ आनी हवेशीर आसूंक जाय. खंयच्याच आवाजाचें अभ्यास करतना त्रास जावंक जायना, भोंवतणचें वातावरण शांत आसूंक जाय.
परिक्षेची तयारी करतना खंयचोय विशय खूब कठीण आसा, म्हाका जमचो ना, म्हाका कांय कळना असो विचार केन्नाच करूंक जायना. म्हजें कडेन जातलें, हांव करतलों, असो सकारात्मक विचार करूंक जाय. आत्मविश्वास हो परिक्षेच्या यशाचो पयलो पांवडो आसा. जें वाचता ताची उजळणी करप खूब गरजेची आसा.
खंयच्याय बऱ्या गजालीक दैवी फाठबळ आसप गरजेचें आसा. परिक्षेक वचपाक भायर सरचे पयलीं घरांतल्या देवाक आनी आवय- बापूय, जाणट्यांक नमस्कार करून भायर सरूंक जाय. परिक्षेचो भंय मनांत दवरूंक जायना. पेपर बरयतना उत्तरांची बरी मांडणी लेगीत गरजेची आसा. कठीण प्रस्नां कडेन पयलींच न पळयतां सोंपें प्रस्न सोडोवंक जाय. बरें अक्षर काडप तितलेंच म्हत्वाचें आसा. तुमकां सगल्यांक परिक्षा बरीं वचूं दी अशें देवा कडे मागणें करता आनी तुमकां सुयश मेळूं अशें मागतां.
प्रा. किशोर वासुदेव वझे
नागेशीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
