भांगरभूंय | प्रतिनिधी
गोंयांत ८० ते ९० टक्के बुथांचेर पळयतात ‘मन की बात’ कार्यावळ
पणजी : प्रधानमंत्री नरेंद्र मोदी हांचे मन की बात हे कार्यावळीचो लाव आतां सगळे कडेन दिसपाक लागला. गोंयच्या ८० ते ९० टक्के बूथांचेर मन की बात कार्यावळ पळयतात. परीक्षा पे चर्चा कार्यावळीक लागून विद्यार्थ्यांचो परीक्षे विशींचो भञय पयस जावपाक मजत जाल्या अशें, मुख्यमंत्री डॉ. प्रमोद सावंत हांणी म्हणलें.
पर्वरी मंत्रालयांत डॉ. आश्विन फर्नांडीस हांणी बरयिल्ल्या ‘मोदीलोग’ ह्या पुस्तकाचें प्रकाशन मुख्यमंत्र्या हस्तुकीं जालें. ह्या वेळार उलयतना मुख्यमंत्र्यांनी ही म्हायती दिली. ह्या वेळार पुस्तकाचे लेखक डॉ. फर्नांडीस हजर आशिल्ले.
प्रधानमंत्री नरेंद्र मोदी हांचे मन की बात कार्यावळीन एके तरेचो विक्रम केला. हे कायारवळीच्या आदारान जनते कडेन संवाद सादपी ते पयले मुख्यमंत्री जावन आसात. मेक इन इंडिया, वोकल फॉर लोकल, फिट इंडीया मूमेंट, स्वच्छ भारत अभियान, आत्मनिर्भर भारत अश्या जायत्या उपक्रमांची म्हायती प्रधानमंत्र्यांनी मन की बात कार्यावळी वरवीं दिली. देशांतली विविधताय, सुटके झुजार्यांचें योगदान, स्वातंत्र्य चळवळींतले अनसंग हीरोज, तशेंच संस्कृतीची म्हायती जनतेक मन की बात कार्यावळीक लागून मेळ्ळी. मन की बात कार्यावळीक लागून एके तरेची जागृताय जावपाक मजत जाली, अशें मुख्यमंत्र्यांनी म्हणलें.
डॉ. फर्नांडीस हांचें ‘मोदीलोग’ पुस्तक मन की बात आनी प्रधानमंत्री नरेंद्र मोदी हांच्या भारता विशींच्या विजनाचेर आधारीत आसा. गोंयच्या स्टॉल्सांचेर हें पुस्तक उपलब्ध आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
