भांगरभूंय | प्रतिनिधी
धावेची परिक्षा १ मार्च सावन : अंदूं कोलवाळ नवें केंद्र
पणजी : धावेचे परिक्षे खातीर अंदूं कोलवाळ केंद्राची भर पडल्या. कोलवाळ सयत ३२ केंद्रांतल्यान परिक्षा जातली. थारिल्ले प्रमाण १ मार्च सावन परिक्षा सुरू जातली. मंडळाने निमाणें वेळापत्रक जाहीर केलां.
सकाळीं ९.३० ते १२.३० मेरेन परिक्षा आसतली. १ मार्च ते १५ मार्च मेरेन परिक्षा चलतली. उपरांत तांत्रीक विशयांच्यो परिक्षा जातल्यो. विद्यार्थ्यांनी परिक्षा केंद्राचेर अर्दवर बेगीन येवप गरजेचें. सुटी जाहीर जाली तरी पेपर मुखार धुकलचे ना. विद्यालयांतली प्रात्यक्षीक परिक्षा ४ फेब्रुवारी सावन सुरू जातली.
१ मार्चाक पयली भास (इंग्लीश/ मराठी/ उर्दु) पेपर आसतलो. ३ मार्चाक दुसरी भास हिंदी, ५ मार्चाक तिसरी भास (इंग्लीश/ मराठी/ कन्नड/ संस्कृत आनी हेर विशय) पेपर आसतले. ७ मार्चाक रोजी समाजशास्त्र १, ८ मार्चक समाजशास्त्र २, १० मार्चाक गणीत लेवल २, ११ मार्चाक गणीत लेवल १ पेपर, १५ मार्चाक विज्ञानाचो पेपर आसतलो. उपरांत डेटा प्रोसेसिंग, डीटीपी ह्या तांत्रीक विशयांचे पेपर २१ मार्च मेरेन चलतले.
दिवचल, काणकोणा, कुंकळ्ळी, कुडचडें, केपें, माशेल, मडगांव, मंगेशी, शिवोली, पणजी, हरमल, पेडणें, पिलार, फोंडें, सांगें, साखळे, शिरोडें, शिवोले, तिस्क -धारबांदोडें, वाळपय, वास्को, नावेली, पर्वरी, मांद्रें, कळंगूटे, वेर्णें, हळदोणें, कुजिरा, पैंगीण, म्हापशें ए, म्हापशें बी, नेत्रावळी, कोलवाळ ह्या ३२ केंद्रांनी परिक्षा जातली.
उर्दू माध्यमां खातीर मडगांव, पणजी, वाळपय आनी वास्को ह्या ४ केंद्रांनी परिक्षा जातली.
णववेची परिक्षा २१ मार्च सावन: परिक्षा केंद्रांचेर सीसीटीव्ही कॅमेरे बसोवपाचे निर्देश
शालान्त मंडळा वतीन घेवपी यत्ता णववेची दुसरी सत्र परिक्षा २१ मार्च सावन सुरू जातली. परिक्षेचें सविस्तर वेळापत्रक जाहीर केलां. सदांच एक पेपर आसतलो. परिक्षा केंद्रांत सीसीटीव्ही कॅमेरे आसप सक्तीचें आसा. जर ते नात जाल्यार बसोवपाची वेवस्था विद्यालयांनी करची, अशे निर्देश एसओपींत दिल्यात.
अंदूं सावन णववेचे परिक्षे खातीर राष्ट्रीय शिक्षण धोरण (एनईपी) लागू केलां. हाका लागून पयल्या आनी दुसर्या सत्राची परिक्षा शालान्त मंडळा वतीन घेवप गरजेचें. प्रस्न पत्रिका शालान्त मंडळ काडटा. उत्तरपत्रिकांची तपासणी मात विद्यालयाच्या शिक्षकां वरवींच जाता. वेळापत्रका सयत शालान्त मंडळान परीक्षे खातीरची एसओपी जारी केल्या.
दिव्यांग वा विशेश भुरग्यां खातीर तांची गरजे प्रमाण वेवस्था करप बंधनकारक आसा. योग्य अशे बसपाचे वेवस्थे सयत गरजे प्रमाण रीडर वा लेखनिकांची वेवस्था करपाची जापसालदारकी संबंदीत संस्थांचेर आसा.
आंतरराष्ट्रीय खेळां सर्तींत वा दुसर्या राज्यांतल्या खेळां सर्तींनी वांटो घेवपा खातीर जे विद्यार्थी परिक्षेक बसपाक शकनात, तांचे खातीर पुरवणी परिक्षा घेतले. पुरवणी परिक्षेचें वेळापत्रक मागीर धाडटले. २१ मार्च ते २८ मार्च ह्या काळांत सकाळीं ९ ते १२ ह्या वेळार परिक्षा जातली.
२१ मार्च (शुक्रवार) दिसा इंग्लीश विशयाचो पेपर आसतलो. उपरांत २२ तारखेक विज्ञान, २४ तारखेर गणित, २५ तारखेर हिंदी, २६वेर मराठी/ कन्नड / उर्दु/ अरेबिक / फ्रेंच/ पुर्तुगीज ह्या विशयांचे पेपर आसतले. २७ मार्चाक समाजशास्त्र, जाल्यार २८ मार्चाक संस्कृत/ कोंकणी ह्या विशयांचे पेपर आसात.
मुख्याध्यापकांनी सद्दां सकाळीं केंद्रांत नमूद केल्ल्या विद्यालयांतल्यान प्रश्नपत्रिका संच हाडप गरजेचें. इंटर डिसीप्लीनरी, वोकेशनल, कला शिक्षण आनी शरिरीक शिक्षण ह्या विशयांच्यो परिक्षा विद्यालयांकूच घेवच्यो पडटल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
