भांगरभूंय | प्रतिनिधी
पणजीः शालांत मंडळा वतीन मार्चांत जावपी धावेचे परिक्षेचे अर्ज 22 ऑक्टोबर सावन पोर्टलाचेर स्वीकारतले. फेब्रुवारींत जावपी बारावेच्या परिक्षेचे अर्ज आयज मंगळार, 14 ऑक्टोबर सावन पोर्टला वरवीं घेवपाक सुरवात जाल्या. धावी आनी बारावेच्या परिक्षे खातीर 1200 रुपया शुल्क आकारतले. मुजती भितर परिक्षेचो अर्ज सादर केलो ना जाल्यार 500 रुपयांचें अतिरिक्त शुल्क (लेट फी) भरचें पडटलें.
शालांत मंडळान 2025- 26 शिक्षणीक वर्साची धावेची परिक्षा 2 मार्च 2026 सावन सुरू जातली.जाल्यार 10 फेब्रुवारी 2026 सावन बारावेची परिक्षा सुरू जातली.
परिक्षा शुल्क आनी परिक्षेचे अर्ज सादर करपाच्यो तारखो शालांत मंडळान जाहीर केल्यात.
बारावेचे परिक्षे खातीर (ऑनलायन) अर्ज 14 ऑक्टोबर ते 10 नोव्हेंबर मेरेन पोर्टलाचेर सादर करचे पडटले. परिक्षेचे शुल्क 1200 रुपया आसा. ते भायर मार्कशीट, पास प्रमाणपत्रा खातीर 350 रुपया आनी प्रात्यक्षिक परिक्षे खातीर (दर विशय) 175 रूपयांचे शुल्क आसा. 10 नोव्हेंबर उपरांत अतिरिक्त शुल्क (लेट फी) 500 रुपया भरून 25 नोव्हेंबर 2025 मेरेन अर्ज करूं येता. 25 नोव्हेंबर उपरांत अर्ज सादर केल्यार अतिरिक्त शुल्का सयत 1500 रुपया शुल्क भरचे पडटले. 1500 रुपया शुल्क भरुन अर्ज सादर करपाची निमाणी तारीख 25 डिसेंबर आसा.
धावेचे परिक्षे खातीर (ऑनलायन) अर्ज 22 ऑक्टोबर सावन शालांत मंडळ पोर्टलाचेर स्वीकारतले. परीक्षा शुल्क 1200 रुपया आसा. अर्ज स्वीकारपाची निमाणी तारीख 15 नोव्हेंबर 2025. ते भायर मार्कशीट, पास प्रमाणपत्रा खातीर 350 रुपया आनी प्रात्यक्षिक परिक्षे खातीर (दर विशय) 175 रुपया शुल्क आसतले. 15 नोव्हेंबर उपरांत आनी 25 नोव्हेंबर मेरेन अतिरिक्त शुल्क (लेट फी) 500 रुपया सयत अर्ज स्वीकारतले. 25 नोव्हेंबर उपरांत अतिरिक्त शुल्क (लेट फी) 1500 रुपया शुल्क आसतले. अर्ज सादर करपाची निमाणी तारीख 15 डिसेंबर मेरेन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
