भांगरभूंय | प्रतिनिधी
भांगरभूंय । प्रतिनिधी
पेंगीणः काणकोण तालुक्यांतल्या पैगीणच्या श्री परशुराम देवळांत शेनवार 22 एप्रिलाक भगवान परशुराम जंयती मनयतले. त्या निमतान परशुराम मंदिर समितीन तरेकवार कार्यावळींचें आयोजन केलां. सकाळीं 7.30 वरांचेर गांवांतल्यान भगवान परशुराम रथयात्रा काडटले. खावट, गाळयें, पैंगीण, माशें, लोलयें मार्गान ती गालजीबाग, सादोळशे हांगच्यान पर्तगाळ मार्गान परत दनपारां परशुराम देवळांत येतली.
पऱशुराम जल्मोत्सवाची जाग्रुताय करपाच्या हेतान ही परशुरमा रथयात्रा काडटले. सांजे 4 वरांचेर भगवान परशुराम हांचो जल्म तें तांचो वावर हाचेर खाशेलें व्याख्यान आयोजीत केलां. हिंदू जनजागृती समितीचे दक्षीण गोंय जिल्हो समन्वयक सत्यविजय नायक परशुरामाची पुराणीक म्हायती दितले. सांजे 5 वरांचेर परशुराम स्वर संध्या ही संगीताची कार्यावळ डॉ प्रवीण गांवकार आनी तांचे वांगडी कलाकार सादर करतले. परशुराम देवळाच्या प्राकारांतल्या परशुराम सभाघरांत ही कार्यावळ जातली.
व्याख्यान आनी स्वर संध्या ही कार्यावळ दिपा क्रिएशन्सची निर्मणी आसा. परशुराम मंदिर समितीच्या पालवान ती जातली. गोंय सरकाराच्या म्हायती आनी प्रसिद्धी तशेंच पर्यटन खात्यान स्वर संध्या कार्यावळीक सहकार्य केलां, जंयती कार्यावळीक भाविकांनी व्हडा संख्येन हाजीर रावचें अशें परशुराम मंदिर समितीन मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
