भांगरभूंय | प्रतिनिधी
भाई नायक हांचे सयत वेवस्थापकीय समिती आड गुन्यांव
मडगांव: एसजीपीडीए कडल्यान गरजेची परवानगी घेनासतना दामोदर हायस्कुल आनी उच्च माध्यमीक शाळेच्या इमारतीचो विस्तार केलो. तातूंत प्राथमीक शाळा सुरू करुन भुरग्यांचो जीव धोक्यांत घालो. ह्या प्रकरणांत मडगांव पुलिसांनी मठग्रामस्थ हिंदू सभेचे अध्यक्ष पांडुरंग उर्फ भाई नायक आनी दामोदर हायस्कुलाची वेवस्थापकीय समिती आड गुन्यांव नोंद केलो.
कोंब मडगांवच्या राजीव नायकान मडगांव पुलिशेंत कागाळ केली. ते प्रमाण चवकशी मडगतीं मडगांव पुलिसांनी मठग्रामस्थ हिंदू सभेचे अध्यक्ष पांडुरंग उर्फ भाई नायक आनी दामोदर हायस्कुल आनी उच्च माध्यमीक शाळेचे वेवस्थापकीय समिती आड बेकायदेशीर इमारत दुरुस्त करप, हेरांचो जीव धोक्यांक घालप, भौशीक त्रास दिवपी कृत्य करप अशा कलमां खाला गुन्यांव नोंद केलो.
दामोदर हायस्कुल आनी उच्च माध्यमीक शाळेच्या इमारतीचो बेकायदेशीर विस्तार केलो. इमारतीचो तळमजलो आनी पयल्या माळयेचे बांदकाम केले. ह्या वेळार एसजीपीडीए कडल्यान परवानगी घेवंक नाशिल्ली. ही इमारत परवानगी नासतना बांदली आनी तातूंत प्राथमीक विभाग सुरू केलो. हाका लागून सुमार एक हजार भुरग्यांच्या जिवाक धोको निर्माण जालो. मडगांव पुलीस निरिक्षक सूरज सामंत हांच्या मार्गदर्शना खाला पुलीस उपनिरिक्षक समीर गांवकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
