भांगरभूंय | प्रतिनिधी
श्रावणांतली पयली मुखेल परब म्हळ्यार नागपंचम. सोरपाक आमी भितात. पूण नागपंचमी दिसा त्याच सोरपाक देव मानून आमी ताची पूजा करतात. ह्या दिसा सोरपाचे दर्शन जावप म्हळ्यार तो मनीस नशीबवान म्हणपाचो. हो दिसूच खूब शुभ. लोक वेगवेगळ्या रितींनी नागाची पूजा करतात. कोण फोटो हाडून, कोण मातयेचो नाग हाडून तर कांय पिठाचो नाग करून पूजा करतात. अशे म्हणटात की जाका सर्प दोष आसा, जांकां सपनांत सोरोप दिसतात, तांणी ही पूजा करची. सगळे दोष पयस वतात. भिवन आंग काडपी मनीस भंय मुक्त जाता. नागपंचम म्हळ्यार पातोळ्यो खावपाचो दीस. नागपंचमीक खाशेलो पदार्थ म्हळ्यार पातोळ्यो. “हळदीच्या खोल्याक पिठाची साथ, परब नागपंचमेची, गोडा चुनान मारला थाट”.
नाग हो विखारी सोरोप. हाका लोक थर्त भितात. ह्याच नागपंचमीच्या निमतान नागाकुय देवाचें स्थान मेळटा. जशी मनशा तशे सोरोपूय ह्या सैमाचो एक भाग. हे परबे निमतान तांकांय एक मानाचें स्थान मेळटा. नागपंचम मनोवपा फाटल्यान एक काणी आसा. एका गांवांत एक शेतकार आनी ताचो घराबो रावतालो. एक दीस शेतात ताणें नांगरपाचे काम हातात घेतलें. नांगरतना नकळत ताचे कडे मातयेत भितर आशिल्लो सोरपाचो घराबो आनी ताचीं पिलां चिड्डलीं. हें जेन्ना नागिणेक कळळे तेन्ना तिका खूप राग आयलो. आपूण ह्या शेतकऱ्याक आनी ताच्या घराब्याक कशीच जिती सोडचिना असो निश्चेव तिणें केलो. ती शेतकाराच्या घरा गेली आनी वेळ काडीनासतना शेतकाराक, ताचे बायलेक आनी भुरग्याक मारून उडयलें. शेतकाराची धूव थंय नाशिल्ली. जेन्ना तें घरा पावलें ताणें नागिणेक एके वाटयेंत घालून दूद दवरलें आनी नागाच्या फोटोची पूजा करूंक लागलें. हे वटेन नागिणेक कळ्ळें की शेतकारालें एक भुरगे जितें आसा म्हूण. ताका मारपाक म्हूण तिणें परतून एकदा वाट धरली. सरपटत सरपटत ती शेतकारागेर पावली. पळयत जाल्यार किदें तें चली आपणाक दूद दवरून आपली पूजा करूंक बसला हें तिणें पळयलें. ते चलयेची भक्ती पळोवन ती प्रसन्न जाली. आनी तिका जाय तें मागपाचो वर दिलो. ते चलयेत घरच्यांक जीवनदान दिवचें आनी तांकां माफ कर अशे मागणें केलें. सगळी गजाल तिणें नागिणेक सांगली. आयकून नागिणेक चूक होलमली. शेतकारा कडल्यान हें चुकन घडिल्ले हेंय तिका समजलें. तिणें चलयेक अमृत दिलें आनी सांगलें, हें तूं तुज्या घरच्यांक पिवय. सगळ्यांचो जीव परत येतलो. आनी तशेंच जालें. सगळीं सावचित जालीं. सगळ्यांनी मेळून नागिणीची पूजा केली आनी त्या दिसाच्यान नागपंचम ही परब मनोवपाक सुरवात जाली. सगळ्यांक नागपंचमीची परबी
श्रावणातली पयली परब
म्हणटात जाका नागपंचम
नागाक लावन पूजेक आमी
घेवया घरांत पक्वानांचो घमघम
सैमाचो तो राखणो
झाडां जाची इष्ट
मानल्यार देव ताका
जातले पयस सगळे कष्ट
ह्या पंचमाच्या दिसा
तुमी कितेंच कापचें न्हय
मोडचें न्हय, तोडचें न्हय
फोडचें न्हय, खणचें न्हय
सैमाक कोणें दुखोवचो न्हय
मातयेक करची न्हय इजा
फोडणा बीडणा नाका
नागाक रागार करुं नाकात
स्त्राप कसले घेवं नाकात
बायलां मानतात भाव जाका
म्हणटात राखण दी रे म्हाका
दुद ल्हायांचो करता अभिषेक तुका
पातोळी गोडसाण दिता तुका
वेगवेगळ्यो प्रथा वेगवेगळ्यो रीती
हरयाळी फुलां फाती उजवाती
ओवाळून दिवे नागाक आमी
गावया गितां गावया आरती
मानून सगळयो रीती
मानून सगळयो भावना
हे नागपंचमेक जाव पुराय तुमच्यो
सगळ्यो इत्सा मनोकामना
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
