परदेसांत मरण आयिल्ल्यांची कूड भारतांत हाडपाची प्रक्रिया आतां सोंपी
भांगरभूंय | प्रतिनिधी
भांगरभूंय । खबरां संस्था
भारतीय नागरिकांक परदेसांत मरण आयल्या उपरांत कूड भारतांत हाडपाची प्रक्रिया आतां सोंपी जातली. ताका लागून सगळ्यो एअरलायन्स एजन्सी ‘ओपन ई- केअर प्लॅटफॉर्म’ सुरू करतले. ते आयच्यान कामाक सुरवात करतले. उपरांत, मरण आयिल्ल्या व्यक्तीच्या सोयर्यांक फकत अर्ज करचो पडटलो. उपरांत परदेशांतल्यान कूड हाडपाची प्रक्रिया रोखडीच करतले.
परदेशांत मरण आयल्यार भारतीय कुटुंबाक कूड हाडपा खातीर बरीच व्हड प्रक्रिया करची पडटा. केन्ना केन्ना एक सप्तक वा ताचे परस चड काळ लागता. असामान्य परिस्थितींत मरण आयल्यार हो काळ आनीक वाडपाक शकता. कांय वेळां भारतीय परराष्ट्र मंत्रालयाक लेगीत हातूंत हस्तक्षेप करचो पडटा. देखूनच फाटल्या कितल्याशाच दिसां सावन भारतीय नागरिकांची कूड परदेशांतल्यान हाडपाची प्रक्रिया सुरळीत जावचे खातीर मागणी केल्ली. आतां हे दिकेन सकारात्मक पावलां उबारल्यांत.
‘ओपन ई केअर’ म्हणल्यार कितें?
सगळ्या विमान कंपन्यांनी मेळून ओपन ई- केअर प्लॅटफॉर्म तयार केला. परदेशांत भारतीय नागरिकाक मरण आयल्यार कूड रोखडीच भारतांत हाडपाक मेळटली, हाचो निर्णय जातलो. हे खातीर मरण आयिल्ल्या व्यक्तीच्या कुटुंबांतल्या वांगड्यांनी अर्ज करचो. अर्ज आनी गरजेचीं कागदपत्रां तपासल्या उपरांत रोखडीच कूड हाडपाचे प्रक्रियेक सुरवात जातली.
कसली प्रक्रिया करची पडटली?
ओपन ई-केअर प्लॅटफॉर्म एका विभागाप्रमाण काम करतलें. जो दिल्ली विमानतळार उघडटले. देशांतले सगळे विमानतळ हाका जोडटले. मरण आयिल्ल्या व्यक्तीच्या कुटुंबीयांक अर्ज करचो पडटलो. उपरांत, सगळी म्हायती आनी वेवस्था संबंदीत विभाग वा लोकां मेरेन पावोवपाची जापसालदारीकी एअरलायन्स कंपन्यांची आसतली.
हो दस्तावेज गरजेचो
1- मरणाचें प्रमाणपत्र
2- एम्बॅलींग म्हणजे प्रमाणपत्र (मरण आयिल्ल्याच्या शरिरार रसायनांचो लेप)
3- भारतीय दुतावासाची मान्यताय (NOC)
4- मरण आयिल्ल्या व्यक्तीचो पासपोर्ट
आदीं लागतालो इतलो वेळ
दर म्हयन्याक परदेशांत भारतीय नागरिकांक मरण येवपाच्यो स ते सात प्रकरणां उजवाडाक येतात. कूड भारतांत हाडपाचे लांब प्रक्रियेक लागून लोकांक व्हड त्रास सोंसचे पडटाले. आतां मेरेन अर्ज आनी दस्तावेज ईमेल वरवीं प्रमाणीत करताले. आदीं विवीध खात्यांतल्यान मान्यताय घेवपाक बरोच वेळ लागतालो, पूण आतां ही पुराय प्रक्रिया विमान कंपन्यां वरवीं जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
