भांगरभूंय | प्रतिनिधी
नवी दिल्ली, खबरां संस्था ः भारतीयांनी परदेशांतल्यान आपल्या मूळ देशांत धाडिल्ल्या पयशांनी म्हळ्यार रेमिटन्सान सेगीत दुसरे वर्सा 100 अब्ज डॉलराची मर्यादा हुपल्या. 2023-24 अर्थीक वर्सा 107 अब्ज डॉलराचेर पावला. उल्लेखनीय म्हणल्यार ह्या वर्सा देशांत आयिल्ल्या 54 अब्ज डॉलराच्या थेट परकी गुंतवणूक परस हें सुमार दुप्पट आसा.
परकी नागरिकां कडल्यान चडांत चड निधी मेळोवपाच्या मळार भारत संवसारीक पांवड्यार आघाडेर आसा. 1990 च्या दशकासावन भारतांतल्यान उत्तर अमेरिकेंत आनी युरोपांत म्हायती- तंत्रज्ञान (आयटी) वेवसायिकांचें स्थलांतर जाल्ल्यान ही प्रवृत्ती दोन दशकांपरस चड काळ तिगून उरल्या. उपलब्ध आशिल्ल्या आंकडेवारी प्रमाण खाजगी हस्तांतरण म्हणून भारतीयां कडल्यान परदेशांतल्या येवपी वट्ट रेमिटन्स सुमार 119 अब्ज डॉलर आसा. परकी लोकांच्या उत्पन्नाची परतफेड आनी हेर संबंदीत खर्च सोडल्यार निव्वळ निधी हस्तांतरणाची रक्कम 107 अब्ज डॉलर आसा.
फाटल्या 2022-23 वर्सा भारताक 125 अब्ज डॉलर रेमिटन्स मेळ्ळें, जाल्यार मेक्सिको 67 अब्ज डॉलर, चीन 50 अब्ज डॉलर, फिलिपिन्स 40 अब्ज डॉलर आनी इजिप्ताक 24 अब्ज डॉलर मेळ्ळे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
