भांगरभूंय | प्रतिनिधी
पणजीः फोंडें वेचणूक रद्द जाल्ल्यान सरकारान विधानसभा सत्र परत आपोवन आमी मांडिल्ल्या विधेयकांचेर चर्चा करची. ह्या विधेयकांचेर चर्चा जायना तो मेरेन कलम ३९ (अ) खाला सगले अर्ज गोठवचे. ही मागणी पुराय जायना जाल्यार गोंयभर सावन लोक एकठांय येवन सरकारा आड एल्गार उबें करतलें, अशी शिटकावणी ‘आतां सोंसू नेजो’ हे चळवळीचे फुडारपण करपी न्या. फेर्दीन रिबेलो हांणी दिल्या.
दोना पावला आपल्या घरा आपयल्ले पत्रकार परिशदेंत उलयतना न्या. रिबेलो हांणी सांगलें, तांचेनी जमीन सरंक्षण कायदो विधेयक विधनासभेंत मांडून तांची चर्चा करपाची मागणी केल्ली. उपरांत फोंडें पोटवेंचणूकेक लागून विधानसभा अधिवेशन तहकूब केल्ली.
मात त्या वेळार आमकां दिसून आयलें, ह्या विधेयकाचेर चर्चा जावची न्हय म्हण हें अधिवेशन तहकूब केला. ह्या विधेयकांत आमी तीन मुखेल मागण्यो मांडिल्ल्यो. हातूंत नगर नियोजन कलम ३९ (अ) रद्द करचे, कलम १७ (अ) दुरूस्त करून फकत २५ टक्के उतार आशिल्ले दोंगराचेर जनहीतार्त बांदकामाक परवानगी दिवची आनी जनहीता फाटल्यान कारण स्पश्ट करचें आनी गोंयची शेत जमीन आसात ते बिगर शेतकारांक विकपाचेर निर्बंध हाडचे. जर ते बिगर शेतकारांक विकता जाल्यार तो ३० वर्सा खातीर गोंयचो रहिवासी आसचो अशी मागणी आमी केल्ली, अशें रिबेलो हांणी सांगलें.
ही जमीन गोंयकारांच्या हक्काची जमीन आसा आनी ती दुसर्यांक विकपाक जायना हो आमचो मुखेल मुद्दो आसा. मात हे विशींचो कायदो गोंय सोडल्यार दरेक राज्याच्या जमीन महसूल कोडांत आसा. देखून फोंडें विधानसभा अधिवेशन रद्द जाल्ल्यान आमी हे चळवळी वरवीं विधानसभा अधिवेशन सत्र परत आपोवन ही विधेयकांचेर चर्चा करपाची मागणी करतात. ह्या विधेयकांचेर जो मेरेन चर्चा जायना तो मेरेन कलम ३९ (अ) खाला नव्यो परवानग्यो दिवच्यो न्ही, अशी मागणी रिबेलो हांणी केल्या.
आमी सरकाराच्या निर्णयाची वाट पळयतले. ह्या विशयाचेर आमी कोर समितीचे बसकेंत चर्चा केल्या. आमी गांवां गांवांनी बसका घेवन थळाव्यांक तेको जाहीर केला आनी आमकां जेन्ना गरज पडटली तेन्ना आमकां तेंको दिवपा खातीर सगळे एकठांय येवपाचें आस्वासन आमकां थळाव्यांनी दिलां. जर अधिवेशन आपोवंकना जाल्यार गोंयभरच्यान सगले लोक एकठांय येवन सरकारा आड आवाज काडटले, अशी शिटकावणी रिबेलो हांणी दिली.
मुख्यमंत्री, प्रधानमंत्र्याचे जापेची पळयतात वाट
फकत तोयार तळ्या विशीं बरयल्लें एक पत्र सोडल्यार मुख्यमंत्री डॉ. प्रमोद सावंत हांणी हेर पत्रांक अजूनय जाप दिवंक ना. तशेंच प्रधानमंत्री नरेंद्र मोदी हांकां बरयल्ल्या पत्रांची जाप येवपाची आसा. तशेंच आमच्या पत्राची कार्यवाही करत राष्ट्रपती द्रौपदी मुर्मु हांणी गृह खात्याक निर्देश दिल्यात आनी ह्या निर्देशाची प्रत दिवची अशें आमी गृह सचिवां कडेन मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
