भांगरभूंय | प्रतिनिधी
पोटांत दुखप हें जायत्या यकृताच्या दुयेंसांचें लक्षण. बरोच तेंप पोटांत दुखता आनी मागीर कांय दिसांनी पोटांत खर दुखपाक लागले जाल्यार ताचे कडेन दुर्लक्ष करुं नाकात.
फाटल्या कांय वर्सांत भारतांत यकृताच्या दुयेंसांचें प्रमाण वाडत आसा. फॅटी लिव्हरचो दुयेंस आतां सामान्य जाला. यकृत निकामी जावपाचे प्रमाणूय आतां वाडत आसा. खावपाच्यो चुकीच्यो संवय आनी वायट जिणे पद्दतीक लागून अशें घडटा.
संवसारीक भलायकी संघटनेच्या (WHO) म्हणण्या प्रमाण, भारतांत दर वर्सा 2.59 लाख लोकांक यकृताच्या दुयेंसांक लागून मरण येता. सगल्या दुयेंसांक लागून मरण आयिल्ल्या वट्ट मरणांतले हे 2.95 टक्के आसा. भारतांतल्या दरेकी पांचांतल्या एका मनशाक यकृताचो दुयेंस आसा.
नॉन-अल्कोहोलिक फॅटी लिव्हर डिसीज (NAFLD) ह्या दुयेंसाचे प्रमाण फाटल्या कांय वर्सांत नेटान वाडत आसा आनी ताचें प्रमाण 6.7 टक्के ते 55.1 टक्क्यां मेरेन आसूं येता. चडशा यकृताच्या दुयेंसांत लोक ताची सुरवातीच्या लक्षणांकडेन दुर्लक्ष करतात. खर पोटांत दुखप हें यकृत निकामी जावपाचें लक्षण. यकृताचेर चड चरबी वाडप हेंय एक लक्षण आसूं येता.
जायत्या प्रकरणांनी व्हायरल हिपॅटायटीस संसर्गाक लागून पोटांत खर दुखप जावं येता. हे संसर्गाक लागून पोटांत दुखप, जोर येवप वा मळमळप जावं येता. पोटांत खर दुखप हें यकृताचें दाह वा जखम जावपाचीय लक्षण आसूं येता. अशा वेळार पोटांत खर दुखप जाल्यार दोतोराचो सल्लो घेवचो. अल्ट्रासाऊंड वा रगत तपासणेच्या मजतीन दोतोरांक यकृताचो खंयचोय दुयेंस सहजपणान सोदून काडूंक मेळटा.
यकृत निरोगी कशें दवरप?
० खाणां, जेवणांत मीठ, साकर आनी पिठाचो वापर उणो करचो.
० जंक फूड अजिबात खावंचें न्हय.
० दर दिसा लीटर, देड लीटर तरी उदक पियेवचें.
० दर दिसा व्यायाम करचो.
० सोरो पियेवंक नाकात.
० दिसपट्ट्या आहारांत फळां आनी पाचव्यो भाजयो खायात.
० गरजे भायर खंयच्याय प्रकारचें वखद घेवप टाळचें.
० तळिल्लीं खाणां चड खावचीं न्हय.
० वेळार जेवचें, न्हिदचें, उठचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
