भांगरभूंय | प्रतिनिधी
विकत घेवप्यां परस जमनी विकपी गोंयमायेचे व्हडले गुन्यांवकार जाले नात?
गोंय तशें व्हडलें न्हय. दोन- अडेज वरां भितर पेडणेंच्यान काणकोण पावूं येता. हांगाची लोकवस्ती मुखेलपणान शारांनी, उपनगरांनी वसल्या. लोक शिगमो, चवथीक गांवघरा वतात. चडश्यांनी थंयच्यो जमनी कोट्यांनी रुपयांक विकल्यात. मात, आतां ह्या प्रस्नान जनआंदोलनाचे स्वरुप घेतलां. कालूच निवृत्त न्यायाधीश फेर्दीन रिबेलो हांणी गोंय वाटावपा खातीर लोकचळवळ उबारपाचो उलो मारला. खास करून जमीन विक्री आनी वाडटो जुगार हाचे आड. तशें ही पयलीच लोकचळवळ न्हय, हाचे आदीं जमनीचो थेट संबंद आशिल्ल्या प्रादेशीक आराखड्यां (2011, 2021) आड 2005 वर्सा व्हडलें आंदोलन जाल्लें. गोवा बचाव अभियान (जीबीए) संघटनेच्या निमंत्रकपदाचेर डाॅ. आॅस्कर रिबेलो, सबिना मार्टिन्स हांची निवड जाल्ली. रेमो फर्नांडीसूय आशिल्लो. उपरांत प्रतापसिंह राणे हांच्या फुडारपणा खालच्या काँग्रेस सरकारान फेब्रुवारी 2007 त तो आराखडो फाटीं घेतिल्लो. मुख्यमंत्री दिगंबर कामत हांणी तो पुराय रद्द केल्लो. नगर नियोजन मंत्र्याक राजिनामोय दिवचो पडिल्लो. प्रादेशिक आराखडो 2021 दिगंबर कामत हांच्या काळांत 2012 त स्थगीत दवरिल्लो. उपरांत तो परत चालीक लावन दुरुस्ती मागयिल्ल्यो.
आंदोलन येसस्वी जालें, पूण त्या आराखड्यांक ज्या कारणांक लागून विरोध जाल्लो, तीं प्रत्यक्षांत येवंक नात? काय आयल्यांत? त्या आराखड्यां परस चड भिरांकूळ परिस्थिती आयज आसा, अशें जाणकार म्हणटात. खरें तें? 2023 वर्सा मार्चांत शार आनी नगर नियोजन (टीसीपी) कायद्यांत दुरुस्ती जाली. सैम संवेदनशील जमनी सोंपेपणी रुपांतरीत करपाक मेळटल्यो अशी ती दुरुस्ती आशिल्ली. बोवाळ जालो. पोरूं आॅक्टोबरांत हजारभर लोकांनी टीसीपी कार्यालयाचेर मोर्चो व्हेलो. गोवा कृती समितीन नवो आराखडो करपाक सांगलो. 23 जून 2025 दिसा उच्च न्यायालयान पांच गांवांचे ओडीपी रद्द केले. ताका आतां सरकारान सर्वोच्च न्यायालयांत आव्हान दिलां. मात समाज वावुरप्यांच्या मतान, जमनींचें रुपांतर सद्दां जायत आसा. आंदोलनाय वाडल्यांत. गोंयकारांचे भायल्यां आड वाद जायत आसात. पेडण्यां मारपेट जावन एकल्याक मरण आयलां. दर्यावेळां लागसारच्यो भोवतेक जमनी विक्रेक गेल्यात. चडश्यो कोमुनिदाद, सरकार आनी थळाव्या नागरिकांच्यो.
आतां गोंय वाटोवपाक लोकचळवळ उबी करपाचो उलो निवृत्त न्यायाधीश फेर्दीन रिबेलो हांणी मारला. आदल्या आंदोलनाचे फुडारी आशिल्ले तेय रिबेलोच. हो योगायोग. न्या. रिबेलो हे उबारपाक सोदतात, ती लोकचळवळ, मुखार वता काय ना, तें पळोवचें पडटलें. ताचे परस म्हत्वाचें, ती ज्या- ज्या उद्देशान उबारपाचें थारायलां, ते पुराय जावंक जाय. अर्थवेवस्थेची व्हडली धिगी आशिल्ल्या कॅसिनो जुगारा आडूय ते उबे रावल्यात. तांणी कांय सुचोवण्यो केल्यात. दोंगरांचेर उदरगती खातीर परवानगी दिवची न्हय. झोनिंग, वापर बदला संबंदीचे कायदे रद्द करचे, प्लाॅट तयार करचे पयलीं थंयच्यो साधनसुविधा, येरादारी हांचो विचार जावचो. फट नोंदी, अहवाल दिवपी अधिकाऱ्यांचेर खर कारवाय जावची, सीआरझेडांतलीं बेकायदेशीर कामां काडचीं, कॅसिनो बोटी काडच्यो, अशें न्या. रिबेलो हांणी मागलां. हें सगलें जावं येता, पूण पयलीं संबंदीत सगल्यांनी वृत्ती बदलून गोंयचो सर्वांगी विचार करचो पडटलो. एक व्हिडियो जारी जाला, तातूंत एकलो सांगता, म्हाका चड पयशे दिल्लीकार दितात म्हूण हांवें दोन प्लाॅट तांकां विकले. भाटकार फायद्याचो विचार करता, तर थोडे हातार कितें तरी पडटलें, म्हूण कोमुनिदादी सारक्या संस्थांच्यो, सरकारी जमनी विकीत सुटल्यात. हातूंत लुकसाण जाता तें गोंयचें. विकत घेवप्यां परस जमनी विकपी गोंयमायेचे चड गुन्यांवकार जाले नात? हणजुण्यां उजो लागतकच आतां कारवायेचेर कारवायो चालू आसात. बरेच क्लब, पब बेकायदेशीर आशिल्ले तर? जमीन विक्री बाबतींतूय अशीच कृती करची. कितें तरी घडपाची वाट पळोवची न्हय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
