भांगरभूंय | प्रतिनिधी
रायगड, खबरां संस्था ः कोलकातांत बायल दोतोरांचेर बलात्कार करुन खून केलो, उपरांत उत्तराखंडातले एके नर्सीचेर बलात्कार करून तिचो खून केलो, बदलापूरचे एके नामनेचे शाळेंत दोन सान पिरायेच्या चलयांचेर अत्याचार जालो अशो एका फाटल्यान एक एक घडणुक घडत आसतनाच आतां छत्तीसगडच्या रायगडांत एका आदिवासी बायलेचेर सामुहीक बलात्कार जालो. रक्षाबंधना दिसा जात्रेंतल्यान परत येताना ही घडणूक घडली. आरोपीं मदीं बायलेचो एक इश्ट आनी ताचे 10 वांगडी आसात. ह्या प्रकरणांत पुलिसांनी 7 आरोपींक अटक केल्या.
पुसौर ब्लॉकांत रावपी 27 वर्सां पिरायेची बायल कांय वर्सां सावन घोवा पसून वेगळी रावताली. सोमारा ती आपल्या वळखीच्या लोकां वांगडा मीना बाजारांत गेल्ली. थंयच्यान परत येतना एनटीपीसी लारा लागसार कांय जाणांनी तिका आडायले आनी तिचेर सामुहीक बलात्कार केलो. हे संबंदी मंगळारा एफआयआर दाखल केली.
बायलेन स्वता कागाळ केली
ती बायल आपल्या इश्टा वांगडा परत येताली. ताणें तिचेर पयलीं बलात्कार केलो. ह्या वेळार आरोपी तरणाट्याचे वांगडी आयले आनी तांणीय तिचेर बलात्कार केलो. हे घडणुके उपरांत सगल्या आरोपींनी थंयच्यान पळ काडलो. ते उपरांत ते बायलेनूच पुलिशेंत वचून कागाळ नोंद केली.
7 आरोपींक अटक…
कांय आरोपींनी बायले कडेन चुकीची वागणुक केली अशें एसपी दिव्यांग पटेल हांणी सांगलें. बायलेची वैजकी तपासणी केल्या. कागाळ केले उपरांत रोखडोच एक पंगड तयार केलो. ह्या पंगडान आरोपींच्या लिपपाच्या सुवातेर धाड घालून कांय जाणांक सोदून काडले. मंगळारा वेगवेगळ्या सुवातीं वयल्यान 6 आरोपींक अटक केल्ली. आयज आनीक एका आरोपीक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
