परतून ‘ट्रम्पेट’ वाजलें

भांगरभूंय | प्रतिनिधी

दोस्त दोस्त ना रहा, प्यार प्यार ना रहा, ज़िंदगी हमें तेरा ऐतबार ना रहा. मुकेशाचें हें पद याद जावपाचें कारण म्हणल्यार आमचो इश्ट डोनाल्ड ट्रम्प. अमेरिकेच्या ह्या अध्यक्षान भारताचेर आनीक 25 टक्के टॅरिफ लायलां. आतां तें 50 टक्क्यांचेर पावलें. कारण दिलां, रशिये कडल्यान केल्ली कच्च्या तेलाची आयात. काल सांजवेळा तांणी ही घोशणा केली. हें टॅरिफ चवथीक लागू जातलें. अमेरिकेंत भारतांतल्यान येवपी म्हालाक हो नवो 50 टॅक्स लागतलो. चीन 20 आनी पाकिस्तान 31 टक्के हांचे परस तो चड आसा. (पाकिस्ताना वयलो कर आतां नवी वेपारी कबलात करून 19 टक्क्यांचेर हाडला.) रशिया आनी इराण हे भारताचे पयलीं सावन इश्ट. तांचे कडल्यान सवाय म्हाल मेळटा जाल्यार भारतूच न्हय, तर खंयचोय देश तो घेतलोच. पूण अमेरिकेक तें मान्य ना. आपूण सांगता तशें हेर देशां कडेन वागचें, अशें ह्या दादोक दिसता. आतां भारत दुसऱ्यांच्या पोशान उदक पियेवपी न्हय, हें आमच्या इश्ट ट्रम्पाक दाखोवन दिवचें पडटलें. स्वदेशीचेर चड भर दिवप हो एक उपाय जावंक शकता.
हो निर्णय अन्यायकारक आनी गरज नासतना घेतला. आमची आयात ही बाजारपेठेंतल्या घटकांचेर आदारीत आसता. 1.4 अब्ज लोकांचे उर्जा सुरक्षेचे नदरेन ती गरजेची. राष्ट्रीय हिता खातीर भारतूच न्हय, तर सगलेच देश अशी आयात करतात. खुद्द अमेरिका रशिये कडल्यान सारें, रसायनां घेता. युरोपियन संघूय घेता, अशें केंद्र सरकाराच्या म्हणयाऱ्यान म्हणलां. मात ट्रम्प हें मानून घेतलेच हाची खात्री ना. सध्या ते जाॅर्ज वाॅशिंग्टना परस वेगान कुराड चलोवपाक लागल्यात.
भारत हो बरो वेपार भागिदार उरूंक ना. आमी 25 टक्क्यांचेर राविल्ले, पूण आतां हांव तें आनीक वाडयतलों. कारण ते आजून रशियन तेल विकत घेतात, अशें ट्रम्पान थळाव्या टिव्ही चॅनलाक सांगलां. ह्या वक्तव्याक लागून साबार देशांनी अस्वस्थताय निर्माण जाल्या. भारत, ब्राझील, रशिया, घडये चीन पसून एकठांय येवपाक शकतात. ते वटेन चीन आनी जपान एकमेकांक हात दिवपाचे आसात. अर्थांत हें बेगीन जावंक जाय. भारतीय अर्थतज्ञांच्या मता प्रमाण, ह्या वाडीव टॅरिफाचो भारताचेर सामकोच उणो परिणाम जातलो खंय. जीडीपींत फक्त 0.2 ते 0.3 टक्के उणाव येवंक शकता, असो तांचो दावो. हो अदमास फक्त टॅरिफा बाबतींत, म्हालाचेर 10 टक्के दंड घाला ताचें किते?
हें टॅरिफ म्हणजे एका देशान दुसऱ्या देशांतल्यान येवपी म्हालाचेर लायिल्लो टॅक्स. अमेरिकेंत भारतांतल्यान ज्यो वस्तू वतात, ताचेर हो कर लायला. अमेरिकेचे म्हाल वळेरेंत जें आसा, तांकां हो कर लागू जाता. पूण हो कर म्हाल आयात करपी थंयचो वेपारी भरता. म्हाल विकप्याक तो थेट भरचो पडना. अमेरिकेंत गेल्लो म्हाल म्हारग जाता. सर्त उणी जाता. म्हालाच्यो आॅर्डरी कमी जावपाक शकतात. भारतीय वेपाऱ्यांक अमेरिकेक म्हाल धाडून चार पयशे जोडपाक मेळटाले, ते कमी जातले. आपशीच हांगाच्या कामगारांची कपात जातली. भारतीय म्हारग म्हाल अमेरिकी लोक कित्याक घेतले? ते बांगलादेश, व्हिएतनामा सारक्या देशांच्या सवाय म्हाला कडेन वळटले. अमेरिकन कंपनींनी भारतीय कंपनीं कडेन कबलात केल्या, तांकां दुसरे पुरवणदार सोदचे पडटले. भारतीय म्हालाचे मोल वाडिल्ल्यान तो तयार करप्यांचो फायदो देंवतलो. अमेरिकेंत म्हारगाय वाडटली. म्हणटकच हो अमेरिकन गिरायकांकूय धपको.
भारतीयांनी फक्त स्वदेशी म्हालाचेरूच लक्ष केंद्रीत करून अमेरिकन म्हाल घेवप बंद केलें जाल्यार अमेरिकेक जाग येवं येता. पूण ही कठीणूच न्हय, तर लागीं लागीं अशक्य अशी गजाल!