भांगरभूंय | प्रतिनिधी
पयलीं जमनींक व्हडलेशें म्हत्व नाशिल्लें. सवाय भितर जमनी मेळटाल्यो. पूण, त्यो घेवपाक लोकां कडेन पयशे नासताले. गिरेस्त लोकांकूय जमनींत (भाटां, बेसां सोडून) व्हडलोसो रस नासतालो. मात, 1980 च्या दसकांत जमनींक अचकीत दर आयलो. एका एकराचे जमनीक तीन- साडेतीन लाख रुपया मोल आशिल्लें, तें आतां 25 कोटीं वयर पावलां. हाचे वयल्यान फक्त अदमास करचो. जमनी चड मोलाक खपतात, कुचकुचीत पयसो मेळटा, हें कळटकच शारांतल्यान न्हय, तर गांवांतल्या जमनींक पसून मोल आयलें आनी त्यो धडाधड खपपाक लागल्यो. ह्यो विकपी गोंयकार आनी विकत घेवपी चडशे उत्तर भारतीय. बिल्डरांचेय वेवसाय फुल्ले. काळ उलगलो तश्यो जमनीं, भाटां सोंपत आयलीं. मागीर शेतां, सखल भाग पुरोवन ताचेर इमारती उब्यो जावपाक लागल्यो. ह्याच सुमाराक गोंयांत परप्रांतीयांचो आंकडो वाडपाक लागिल्लो. हातांत पयसो घोळटा तांणी फ्लॅट विकत घेवपाक सुरवात केली. उरिल्ले गांवांनी भाड्याक रावपाक लागले. झोपडपट्ट्योय तयार जाल्यो. आतां दोंगर बोडकावन ते विकपाचें काम चल्लां. पणजे मांडवी कडेन उबे रावल्यार तें प्रत्यक्ष पळोवपाक मेळटा.
जमीन विकपाचें प्रकार कायदेशीर मार्गान जाताले. मात, हालींच्या कांय वर्सांनी तातूंत गुन्यांवकारी प्रवृत्ती घुशिल्ली पळोवपाक मेळटा. 15 जून 2022 दिसा आयपीएस अधिकारी निधीन वाल्सन (हालींच तांची बदली जाली.) हांच्या फुडारपणा खाला गोंयांतल्या जमीन हडप प्रकरणांची चवकशी करपाक विशेश तपास पंगडाची म्हणल्यार एसआयटीची स्थापना केल्ली. तांणी आतां मेरेन 52 गुन्यांव दाखल केल्यात. ह्या जमनीं विशीं कायदेशीर निर्णय घेवपाक सरकारान 9 सप्टेंबर 2022 क निवृत्त न्यायाधीश व्ही के जाधव हांच्या एक वांगडी चवकशी आयोगाची स्थापना केल्ली. तांणी 44 गुन्यांवांची चवकशी करून साबार शिफारशीं सयत सरकाराक अहवाल सादर केल्लो. गोंयां भायर रावपी गोंयकारांचे मालकेच्यो ह्यो जमनी बोगस दाखले, प्रमाणपत्रां करून भायले भायर विकिल्ल्याचें तेन्ना उक्तडार आयिल्लें. विशेश म्हणल्यार गुन्यांवकारांनी हातूंत जायत्या सरकारी अधिकाऱ्यांकूय भागिदार करून घेतिल्ले. तांकां आयज निलंबीत केल्यात. चवकशीय सुरू आसा.
आतां हें नवें प्रकरण मुखार आयलां. म्हापशें पुलिशेंत एस्पेरन्स आॅलिव्हर, विन्सेंट डिसोझा, अॅनाक्लेतो मोंतेरो हांच्या कागाळींच्या आदाराचेर दाखल जाल्ल्या गुन्यांवांची ईडीन दखल घेतिल्ली. ते प्रमाण तांणी आसगांवच्या कांय जमनींच्या प्रकरणांत मनी लाँड्रिंग प्रतिबंधक कायद्या खाला चवकशी सुरू केल्ली. मुखार जमीन खायऱ्या गुन्यांवकारांनी बळकायिल्ल्यो 39.24 कोटींच्यो 31 जमनीं तात्पुरत्यो जप्त करपाचो निर्णयूय घेतिल्लो. आतां हातूंतल्यो 19 जमनी हडप केल्ल्यो आसात, अशें कळ्ळां. 19 कोटी रुपयांची ही जमीन. तांचे जप्तीची कारवाय सुरू जाली तेन्ना ते जमनी विशीं कोणे एसआयटी कडेन कागाळ करूंक नाशिल्ल्याचें मुखार आयलां. ह्यो जमनी त्या गुन्यांवकारांच्या नांवाचेर आसात. थोड्यांनी त्यो विकल्यात. उरिल्ल्यांनी भाड्यान दिल्यात. थंय शॅक्स, रिसोर्ट, क्लब, हाॅटेलां बी चलतात. ईडीन आतां ह्यो मालमत्ता जप्त केल्यात. हे चडशे प्रकार आसगांव, हणजूण वाठारांत जाल्यात. ह्या 19 जमनींची कागाळ एटीएस, पुलिसां कडेन ना हाचो अर्थ कोणाक ते विशीं खबर ना वा त्या जमनींचे वारस नात. फाल्यां आडवाटेच्यो सरकारी जमनी पसून कोण गुपचूप विकून पयशे घेवपाक आसा. फक्त आसगांव, हणजूण ह्या दर्यावेळां वयल्योच न्हय, तर हेर कडल्या जमनींचेरूय आतां पुलिसांनी नदर मारपाक जाय.
ह्यो सगल्यो जमनी मूळ वारसदारांक दितले. जर ते मेळ्ळे नात जाल्यार त्यो जमीन सरकारजमा जातल्यो, अशी घोशणा फाटीं जाल्ली. आतां ईडी तपासांतल्यान भायर सरिल्ले हे म्हायतीक लागून तपासाचीं चक्रां परतून घुंवपाक लागतलीं. ताका लागून तपास सोंपपाक आतां कितलीं वर्सां लागतलीं तें कळपाक मार्ग ना. कारण ह्या प्रकरणाचीं पाळांमुळां बरीच खोल मेरेन गेल्यांत आसतलीं. ह्या वेव्हाराचे पड्ड्या फाटले कोण सुत्रधार आसात, जाल्यार तांचोय सोद घेवचो पडटलो. गोंयचो आंवाठ कितलो आनी हांगा जमनी हडप करपाच्यो असल्यो भानगडी जाल्यात कितल्यो? ताच्या तपासाक आतां आनीक वेग येवंक फावो. आमचे पूर्वज जमनीक देव मानताले. तिची पुजा करताले. तातूंत पीक पिकोवन आपलें पोट भरताले. घरच्या मनशा सारकी तिची अपुरबाय करताले. ती सांबाळून दवरताले. हातूंतल्यो कितल्योशोच जमनी तांचे मालकेच्योय नाशिल्ल्यो, तरीय ते केन्नाच जमनीं कडेन पडमूर जाले नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
