भांगरभूंय | प्रतिनिधी
अग्रलेख
स्टे मेळूंक ना जाल्यार पुराय गोंयांतले धोकादायक पद्दतीन हुमकळपी केबल काडटले.
गोंयांत 40- 45 वर्सां पयलीं झाडांक जायरातींचे पोस्टर लावपाची पद्दत आशिल्ली. वेंचणुकेचे बॅनरुय दोन खांद्यां मदीं लोंबकळयताले. उपरांतच्या काळांतूय तें चलिल्लें. लोक खिळे मारपाक लागले तेन्ना कांय पर्यावरणवाद्यांनी ताका हरकत घेतली. प्रकरणां न्यायालयांत पसून गेलीं. हे प्रकार उणे जाले. खळ, गोम घेवन पोस्टर लावपूय चलतालें. फक्त झाडांच न्हय, तर भौशिक जागे, लोकांच्या घरांच्यो वण्टीय ह्या पोस्टरांनी, वेंचणुकांच्या घोशणांनी रंगूंक लागल्यो. म्हालाच्या जायरातीय भितर घुसल्यो. हे बरेचशे पोस्टर, बॅनर वेंचणूक, कार्यावळ सोंपली तरी तशेच उरपाक लागले. वाठार बुरसो दिसूंक लागलो. व्हडले जायरात फलकूय आसतात. ताका लागून गाडी चलोवप्याचें लक्ष विचलीत जाता. तांणी दिशा आडायिल्ल्यान फुडलें कांय दिसना. फलक पडून मुंबय लोकांक मरण पसून आयलां. मात पोस्टर, बॅनरांक लागून गोंयकारांक तशी व्हडलीशी अडचण येवंक ना. केबल टिव्हीचें 1990 च्या उत्तरार्धांत आगमन जालें आनी झाडांक, लायट- टेलिफोनाच्या खांब्यांक केबल हुमकळटना दिसपाक लागले. सरकारी खांब्याक वेवसायीक केबल लायल्याय पयशे भरपाक जाय. एका खांब्याक वर्साक देडशें ते तिनशे रुपया शुल्क आसता. घडये चड आसूं येता. हालींच सांताक्रूझांत स्कूटर केबलांत घुस्पल्ल्यान एका बापूय- पूत गंभीर जखमी जाले. भुरग्याच्या पांयांचे हाड सुटलां. न्यायालयान हो प्रकार गंभीरपणान घेतला. तांणी केबलांक लागून अपघात वा लुकसाण जाल्यार केबल आॅपरेटराक पुरायेन जापसालदार धरतले, अशें म्हणलां. तशें बरोवन दिवचें पडटलें. एका खांब्यार तिनूच केबल घालपाक परवानगी आसा. ताचे वयर दिसतात ते काडपाचो आदेश न्यायालयान दिला.
चडशे केबल हे टिव्ही चॅनल, इंटरनेट सेवांचे. एका वीजखात्याकूच केबल वेवसायिकांचें 1 कोटी वयर भाडें थकलां. तें तांणी भरिल्लें जाल्यार केबलांचेर उपाययेवजण करपाक मेळपाची. खांब्याचेरकेबल एकठांय करून एकेच कडेन बांदून सेवा दिवंक मेळटाली. कांय कडेन जमनी पोंदच्यान वीज केबल आसात. थंय हेंवूय केबल घालूं येताले. आतां हाचेर फुडल्या सोमारा सुनावणी जातली. मागीरुच कितें तो निर्णय जातलो. स्टे मेळूंक ना जाल्यार धोकादायक पद्दतीन हुमकळपी पुराय गोंयांतले केबल काडटले. घडये इंटरनेट सेवा दिवपी केबलांक थाकाय मेळत. कारण ताचेर साबार जाणांचे वेव्हार, दिसपट्टीं कामां अवलंबून आसात. फाटीं केबल तोडपाची मोहीम जाल्ली, तेन्ना इंटरनेट सेवा ठप्प जाल्ली. उपरांत ते कापपाक सांगपी अभियंत्याचे ते अधिकार काडून घेतिल्लें.
फाटलीं बरींच वर्सा हें केबल नाट्य चालू आसा. खांब्यांचेर अनधिकृत वायरिंग आसल्यार शाॅर्ट सर्कीट जावं येता. वीज चोरयेचो प्रकारुय घडूं येता. भाडें भरिनासतना सरकारी खांबे वापरप म्हणल्यार सरकाराक लुकसाण. कितलें ताचो फक्त अदमास काडचो. वीज- टेलिफोन खात्याच्या केबलांचेंच जाळें (थोडे वडाक बांदल्यात) जालां, तातूंत हें खाजगी केबल. वीज कामगाराक दुरुस्तीकामां करतना अडचण जावं येता. पळोवपाकूय हे केबल बुरशे दिसतात. प्रत्येक खांब्याक एक क्रमांक दिवन आॅपरेटर खंयचो आनी कितले खांबे वापरता ताचो हिशोब दवरतात. महाराष्ट्र, अस्तंत बंगालांत ही पद्दत आसा. ह्या केबलांचे विशिश्ट रंग जाय. कारण सगले केबल एकाच सारके दिशिल्ल्यान प्रामाणीक केबलधनयाचो केबल काडून उडोवपाचो प्रकार घडूं येतात. भाडें भरिनासतना रावतात, तांकां नोटीस दिवन केबल काडूं येतात. मागीर तो केबलधनी आमदार, मंत्र्याचो वावुरपी आसलो तरी. आतां ह्या केबलाचें प्रस्थ बरेंच वाडलां. ताका लागून ते जमनी पोंदच्यान व्हरपाक केबल डक्ट बांदू येतात. जंय ते आसात थंय खाजगी केबलांक इल्लो जागो दिवचो. पूण हें केबल पुराण एकदाचें सोंपोवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
