भांगरभूंय | प्रतिनिधी
–
करियर
प्रा रामदास केळकार
–
गोंय स्टार्ट अप येवजणीची म्हायती तुमकां ते दिवं शकतात. startup.goa.gov.in ह्या संकेतस्थळाक भेट दित जाल्यारुय ती मेळू शकता.
यशाची म्हायती सगळ्यांक जाय. तें जितलें सोंपें आसना म्हूण जाणून घेवपाची मनशाक सवयच आसा आनी ती आसपाक जाय. फाटल्या एका लेखांत आमी गौतमी रायकर हांची स्टार्ट अपा भितर आशिल्ली यशोगाथा सांगली. आतां अशीच एक यशोगाथा चिन्मय कामत ह्या तरणाट्याची मुद्दाम दितां जेणे करून जांकां स्टार्ट अपान रस आसा, तांणी ताची देख घेवं येता. खूब वेळा आमी सांगतां की जरी स्टार्ट अपाचे लाव आसले तरी ते सुरु करपाक धाडस लागता. तुमचे भितर आत्मविस्वास आसूंक जाय आनी तुमका कोणाचो तरी सपोर्ट जाय. ती मजत मागीर पयशांची आसूं वा धीर दिवपाची. येवजण्यो खूब आसतात, हें जरी खरें आसलें तरी ताचो लाव घेवपाक फुडें येवपाक जाय आनी हें धाडसी मनीसूच करूं शकता. गोवा शालांत मंडळान अंदुंच्यान आर्टिफिशीयल इंटलींजन्स शाळांनी शिकोवपाचें थारायलां. ह्याच पद्धतीन गोंय सरकारान येरादारी नियंत्रणा खातीर एआय म्हणजे कृत्रिम बुद्धीमता यंत्रणा वापरपाचें थारायलां. हांचो अर्थ स्टार्ट अपाक बरे दीस येतले.
स्टार्ट अप करीत जाल्यार दुसऱ्याक नोकरी दिवपाचें समाधान मेळटा, पूण ह्या खातीर धाडस जाय. चिन्मय कामतीन तें दाखयलें. गोंयांत नोकरी करपाक सगलेच सोदतात, पूण उद्देजक जाय, स्टार्ट अप हो ना म्हळ्यार एक प्रकारचो उद्देगुच. दुसरें म्हळ्यार तो पर्यावरणाक त्रास करीना. चिन्मयान ‘कॉपर कोड्स’ ह्या नांवांन आपली कल्पना चालीक लायली. पीसीसी वेर्णे हे कॉलेजींतल्यान आय टी पदवी घेतले उपरांत एक तर नोकरी करप नाजाल्यार सरकारी नोकरे खातीर यत्न करप हे पर्याय आशिल्ले, पूण ताणें विचार केलो तो आपणा वांगडा दुसऱ्याक नोकरी कशी दिवं येता ताचो. ती दिवपाचें समाधान चड आसता हें चिन्मयान आयकल्लें. हातूंतल्यानूच ‘कॉपरकोड्स कन्सल्टिंग’ ची कल्पना फुडें आयली. 2017 सालान ताचो इश्ट रोहन नायक हाणें तंत्रज्ञानाचो लाव घेत, दोगांनी मेळून ‘कॉपर कॉडस’ जन्मांक हाडली आनी हे सगळे अणभव नासतना. चिन्मयाचे बाबा संजीव कामत हांणी भरपूर मजत केली. ‘टिटो’ ह्या नायट क्लबा खातीर तांणी ऑनलायन तिकीट आरक्षण करपाचें ऍप तयार केलें. ताका लागून विक्री हजारां वयल्यान लाखांचेर पावली. हाचो आमकां खूब फायदो जालो. आमचो आत्मविश्वासूय वाडलो, अशें चिन्मय म्हणटा. ह्या फाट्यान तुमी बेगीन येता तें चड बरें. कित्याक तर तुमका चुको जरी जाल्यो तरी त्यो पयस करपाची उमेद आसता.
आमचें काम पळोवन अमेरिकेंतलो अभिषेक विर्जीनकार खुश जालो आनी आमचो तो क्लायन्ट जालो. तो आमच्या प्रोजेक्टांत गुंतवणूक लेगीत करता. हो विस्वास आमी जोडलो त्या खातीरूच हें शक्य जालें. ह्या फाट्यांत विस्वास जिखप चड महत्वाचें आसता आनी बऱ्या कामानूच हें शक्य आसा. बरें काम म्हळ्यार निकाल दिवपी काम. आमचो आयटी मंत्री बाब रोहन खंवटे आमकां बरी मजत करता. उर्बा दिता. ताका आमी नोकरे फाटल्यान ना तर आमी दुसऱ्यांकूय नोकरी दिवन सांबाळटात हें आयकून पळोवन बरें दिसलें, अशें कामत हांणी सांगलें. दितानाचे समाधान वेगळेंच आसता, अशें तो सदांच म्हणटा. आयज गोंय राज्य तुमचे कल्पनेचें स्वागत करता. जाय ती मजत दिवपाक फुडें येता. हाका लागून तुमकांय बी काम करपाक उमेद येतली. ह्या व्यवसायान तुमकां काम करपाची उमेद आसपाक जाय. अडचणी येवं शकतात, तेन्ना तुमी अणभवी लोकां कडल्यान मार्गदर्शन घेवं शकतात. ह्या फाट्यांत तुमच्या कल्पकतेक चड संद आसा. तुमची कल्पना फिजिबल आसपाक जाय. ती घेवन तुमी इन्क्युबेशन केंद्रांत वचूंक जाय. जर तुमची कल्पना तांकां आवडली तर ते फुडें कशे वचप? हें सांगतात. गोंयां भितर स्टार्ट अपाक खूब वाव आसा. गोंयांतले पयलें इन्क्युबेशन केंद्र फर्मागुडी कॉलेजींत डॉ विजय बोर्जिस हांणी सुरु केलें. सिबा, वेर्णा, फातोर्डा हांगां तुमी तुमची कल्पना घेवन वचूं शकतात. गोंय स्टार्ट अप येवजणीची म्हायती तुमकां ते दिवं शकतात. startup.goa.gov.in ह्या संकेतस्थळाक भेट दित जाल्यारुय ती मेळू शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
