भांगरभूंय | प्रतिनिधी
लायट ही आयचे घटकेक सगल्यांत म्हत्वाची गजाल. अर्दवर पसून लायट गेली जाल्यार सगलेच वयर- सकयल जातात. कारण जिणेगरजेचीं भोवतेक उपकरणां लायटी बगर निरुपेगी. लायटी बगर मनशाचे जिणेक ब्रेक लागता. लायट गेली, आयली, बील वाडलें जाल्यार तिडकुपी लोकांचो आंकडो वाडला. ओडिशांत पयरूच चड बील दिलें म्हूण एकल्यान मिटर रिडराची हत्या केली. अर्थांत अशें सगळेच कडेन जावचें ना, पूण लायट दिसाचीं अखंड 24 वरां मेळना, बिलां मात चुकनासतना येतात, अशी कागाळ भोवतेक सगलेच करतात, तें वीज खात्यान मतींत घेवपाक जाय. तशी लायट गेल्यार रोखडीच येता, पूण गोंयांत अशे कांय गांव आसात, थंय रात-रात भर लायट नासता. सुरवेक म्हणलां ते प्रमाण लायटी बगर कोणाचें चलना. विरोधी आमदारां सयत सत्ताधारी आमदारांनीय पयर वीज खात्याच्या कारभाराचेर फोग काडलो. पुरवण आनी बिलाचे दर नियंत्रणांत दवरपाची मागणीय तांणी केली.
गोंयांत लायट वचपाचीं कारणां तशीं खूब आसात. पोरणीं आनी लोड घेवंक शकनाशिल्ली यंत्रणां, सरयां वयर झाडां, माड, उणी पुरवण…. मात्सो लोड येत जाल्यार लायट चल्ली. तातूंत गडगडो, पावस आसल्यार बरेच कडेन वीज पुरवण बंद जाता वा दवरतात. वीज पुरवणेक आडखळ हाडपी झाडां कापतना वीज खात्याक नागरिकां कडल्यान आडमेळीं येतात. वास्तवीक आमकां सद्या मेळटा, ताचे परस दुपेटीन लायट जाय. कारण गोंय हें पर्यटन थळ. पर्यटना कडेन संबंदीत सगल्यांक लायट जायच, पूण गांवगिऱ्या वाठारांनीय लायटीची गरज वाडल्या. गोंयचे बरेच गांव फक्त नांवा पुरते गांव उरल्यात. तांकांय शाराचें रूप आयलां. शारांतल्यो इन्व्हर्टरा पसून एसी मेरेनच्यो सगल्यो सुविधा आयज गांवांनी पावल्यात… आनी ताचे खातीर अखंड वीज पुरवण जाय. साल्वादोर दो मुन्द गांवांत अंदूं पावस सुरू जाल्ल्याक कितले फावटी लायट गेल्या, ते थळावे सांगतलें. पयर आयतारा पसून थंय रातभर लायट नासली. आतांच हें अशें तर आनीक पांच वर्सांनी कितें? लायट गेली काय रोखडीच येता. ते खातीर वीज कामगार, अभियंत्यांक वालोर. पूण, कांय कडेन लायट गेली काय ती केन्ना येतली ताची खात्री नासता. हाचेर बेगीन उपाय घेवचो.
तमनार प्रकल्पांतल्यान गोंयांत 1200 मेगावॅट लायट मेळटली. सरयांचें जाळें विणप, वीज सबस्टेशनां बांदप हीं कामां झुजा पांवड्यार जाल्यार बरीं. कारण आमची वीज यंत्रणा ओव्हरलोड घेवपाक शकना. ताण पडलो आनी कितें वायट जालें जाल्यार अर्दें राज्य दोन दीस काळखांत उरपाक शकता. दर्यादेगांचेर पर्यटना विशींच्यो कार्यावळी वाडल्यात. तांकां लायट जाय. जनरेटर लावप म्हणल्यार हवा, आवाजाचें प्रदुशण. ताका लागून पुराय वीज यंत्रणेचें आधुनिकीकरण जावंक जाय. न्यायालयान आदेश दिल्ले प्रमाण वाग वाठार चालीक लागलो जाल्यार तमनार प्रकल्प संकश्टांत येवपाची शक्यताय खुद्द वीज मंत्री सुदिन ढवळीकार हांणी उक्तायल्या. ताचे पयलीं तीं कामां जावप गरजेचें. तमनार प्रकल्प 240 किलोमिटर वीज लायन घालतलो. म्हापशें- धारबांदोडें – कर्नाटक हें काम फुडल्या देड- दोन वर्सां भितर पुराय जातलें. सबस्टेशनूय जावपाचें आसा.
वेंचणुके वेळार अमूक युनीट मुफत वीज दिवपाची घोशणा जाल्ली. हालींसराक दर वाडोवपाचो विचार चल्ला. ताका लागून लोक बेजार आसात. सौर उर्जेचो वापर वाडलो, जाल्यार लायटीच्या आपालिपाचो लोकांक जावपी त्रास, मनस्ताप कमी जातलो. सौर उर्जेचो स्ट्रीट लायटी खातीर वापर जावंक जाय. गोंयांत प्रायोगीक तत्वाचेर खूब कितें सुरू जाता, पूण तें चड काळ तिगना. इन्व्हर्टरांचेर सरकारी अनुदान दिल्यार लायटी बगर लोकांक मनस्ताप जाता तो उणो जातलो. वीज पुरवणे संबंदी आनीक एक समस्या आसा, ती फाॅल्ट सोदपाची. तीं यंत्रां सरकारान मागोवपाक जाय. कारण, फाॅल्ट सोदपाक वरांचीं वरां लागिल्ल्याचो अणभव सगल्यांकूच आसा. सरयो, कंडक्टर ही वीज यंत्रणा बदलपाचो वेळ आयला, तेंवूय सगल्यांक खबर आसा. खात्या कडेन सुरक्षा उपकरणां जाय. फाटल्या 20 दिसांच्या काळांत दोग वीज कामगार कामार आसतना संवसाराक अंतरल्यात. कामगारांची सुरक्षा म्हत्वाची. खांब्या वयले दुरुस्ती खातीर निसण आशिल्ल्यो खाशेल्यो गाडयो केन्ना घेतले?
उजो पालोवपी दळा प्रमाण, वीज खातेंय रातदीस काम करता, हें कोणूच न्हयकारचो ना. पूण, लोक पयशे फारीक करता म्हणटकूच अखंड वीज पुरवण मेळप हो ताचो हक्क आनी तो ताका मेळपाकूच जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
