भांगरभूंय | प्रतिनिधी
आमी पणजीकार पॅनलाची घोशणा
संभावीत चेपण टाळपाक उमेदवारांच्या घोशणेक कळाव
– भाजप पॅनलाचे उमेदवार कित्याक जाहीर जावंक ना?
भांगरभूंय। प्रतिनिधी
पणजी : पणजी म्हापालिका वेंचणुकेत मंत्री बाबूश मोन्सेरात आनी उत्पल पर्रीकार हांच्या आमी पणजेकार पॅनला मदीं थेट लडत जातली. म्हापौर रोहीत मोन्सेरात हांचो पराभव करून पणजेकारांक बऱ्यो सुविधा दिवपाच्या हेतान आमी पणजेकार पॅनल उमेदवार दवरतले. सगल्या विचारसरणीच्या लोकांचो तेंको पॅनलाक आसा, अशें उत्पल पर्रीकार हांणी सांगलें.
उत्पल पर्रीकार हांणी पत्रकार परिशदेत आमी पणजीकार पॅनलाची घोशणा केली. ह्या वेळार आदले म्हापौर सुरेंद्र फुर्तादो, वैदेही नायक, दत्तप्रसाद नायक आनी मिनीन डिक्रुज हाजीर आशिल्ले. म्हापौर रोहीत मोन्सेरात हांच्या कारभाराक पणजेकार विटल्या. मोन्सेरात हांचे एकाधिकारशायेंतल्यान पणजेकारांची मुक्तता करपाक जाय. पणजेच्यो समस्या सुटाव्यो करपा सयत बऱ्यो सुविधा दिवपा खातीर आमी पणजेकार पॅनल म्हापालिका वेंचणूक लडयतलें, अशें उत्पल पर्रीकार हांणी सांगलें. आमी पणजेकार पॅनलाच्या बॅनराचे ह्या वेळार उक्तावण जालें. आमका सगल्या पणजेकारांचो तेंको आसा. रोहीत मोन्सेरात हांचे विरोधात जे कोण आसा, त्या सगल्यांचो तेंको आमी घेतले. काँग्रेस सयत सगल्या राजकी पक्षांचो तेंको आमी घेतले. आदले नगरसेवक मिनिन डिक्रुज हे सध्या काँग्रेसीत आसा, ते आमच्या पॅनला सयत आसा. आदले म्हापौर सुरेंद्र फुर्तादो हांची विचारसरणी ही वेगळी आसा. ते लेगीत आमच्या पॅनला सयत आसा, अशें पर्रीकार हांणी सांगलें.
——————
रणनिती म्हूण उमेदवारांची नांवां गुप्त दवरल्या
आमी पणजेकार पॅनल सगळ्या प्रभागांत उमेदवार दवरतले. कांय प्रभागा मदीं मोन्सेरात पॅनलाच्या विरोधी उमेदवारांक तेंको दिवपाचो पर्याय उक्तो आसा. उमेदवारांचीं नांवां निश्चीत आसा. मात रणनिती म्हूण आमी ती गुप्त दवरल्या. नांवां जाहीर जाली जाल्यार उमेदवारांचेर पयसो वा हेर तरेन चेपण येवपाची खर शक्यता आसा. खबरदारीचो उपाय म्हूण नांवां योग्य वेळार आमी जाहीर करतले. उमेदवारी अर्ज भरपाच्या मुजती मेरेन नांवां जाहीर जातली, अशें उत्पल पर्रीकार हांणी सांगलें.
कॅसिनो विशीं कायद्या प्रमाण निर्णय घेतले
कॅसिनोंचेर नियंत्रण दवरपा खातीर पणजी म्हापालिका कायद्यांत जी किते तजवीज आसा, ते प्रमाण आमी कार्यवाही करतलें. कॅसिनो कडल्यान म्हापालिकेक जी येणावळ येता, तिचो योग्य तरेन वापर जातलो. कॅसिनो बंद करप वा काडपाचे अधिकार पणजी म्हापालिकेक आसा काय? ते पळोनूच हाचेर निर्णय जातलो, अशें पर्रीकार हांणी कॅसिनोचेर उलयतना सांगलें.
स्मार्ट सीटीचीं कामां योग्य तरेन जावपाची गरज आसा. पणजेत पार्किंगाची समस्या आसा, प्रदुशणाची समस्या आसा. हाचेर उपाय काडून पणजेकारांक बऱ्यो सुविधा दिवपाचो यत्न आसा.
पणजेकारांचेर म्हजो विस्वास आसा. विधानसभा वेंचणूक लडोवपाचो निर्णय हांवे निमाणे वेळार घेतलो. प्रचाराक वेळ उणो मेळ्ळो. तरी लेगीत म्हाका बरी मतां मेळ्ळी. सगल्या पक्षाच्या लोकांनी म्हाका तेंको दिलो. पणजे म्हापालिका वेंचणूक लेगीत आमी पणजेकार पॅनल जिखतले, असो विस्वास उत्पल पर्रीकार हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
