भांगरभूंय | प्रतिनिधी
मुखार गर्दी दिसली काय फुडाऱ्यांक सपासप उतरां कापचीशीं दिसता. विरोधकाचो (मागीर तो पक्षांतलो आसूं वा पक्षा भायलो) मुद्दो मेळ्ळो काय थोडे उलयतां उलयतां भलतेच कडेन पावतात. उदकाचो प्रवाह वाट मेळटा थंय वता, मागीर तो मुखार कोण आसा वा ना तें पळयना. फोंड्यां आयतारा जाल्ले प्रेरणा दीस कार्यावळींत कला आनी संस्कृती मंत्री गोविंद गावडे हांणी उलोवपाच्या भारार आदिवासी कल्याण खात्याचेर टिका केली. ताचें प्रशासन डळमळीत जालां. कर्मचाऱ्यांनी जें काम दिलां तेंच तांणी करचें. पणजेंतल्या श्रमशक्ती भवना खाला काॅण्ट्रेक्टरां कडल्यान कितेंय घेवन तांच्यो फायली वयर खात्यांत दितात, हें दुर्दैवी अशें विधान तांणी केलें. सरकारान आदिवासी भावा- भयणांक दिल्लें उतर अजून पाळूंक ना. आमी तांकां याद करून दीत आसात, पूण आतां आमचो संयम सुटत चल्ला. मागण्यो मान्य जावंक ना जाल्यार आदिवासी भाव परत आंदोलन करपाक फाटीं फुडें पळोवचें नात, अशी शिटकावणीय तांणी दिली. आदिवासी भवनूय बेगीन पुराय करचें, अशी मागणी तांणी केली. सरकारांतल्या मंत्र्यांनूच सरकाराचे टिका करप, अशें सहसा जायना. मात, फाटल्या कांय म्हयन्यांनी तें जालां.
भाजपाचे आदले मंत्री पांडुरंग मडकयकार हांणीय एका मंत्र्याचो पीए आपली फायल मंजूर करपाक पयशे मागतालो, अशें सांगिल्लें. व्हडलो बोवाळ जाल्लो तेन्ना. आतांय तो जाला. हरवें सोदतल्याक, भाजिल्लें मेळ्ळें, म्हणटात तसली गजाल ही. आतां विरोधक हो मुद्दो कितले मेरेन लावन धरता, तें पळोवपाचें. गोविंद गावडे हांचीं विधानां हाचे आदींय वादग्रस्त थारल्यांत. सांस्कृतीक कार्यावळीं खातीर दवरिल्ल्या रु. 26 लाख 85 हजारांचो निधी एकूच पत्तो आशिल्ल्या कांय संस्थांक दिल्लो. पावसाच्या दिसांनी काणकोणच्या संस्थांक कार्यावळी करपाक सभाघर नाशिल्लें, अशें 2024 चे सुरवेक सभापती तवडकार हांणी म्हणिल्लें. उपरांत मंत्री गावडे हांणी ते आरोप न्हयकारून सगलें कितें योग्य पद्दतीन जालां, गैरप्रकार जाल्यार निधी परतून घेतले, अशें सांगिल्लें. पोरूं फेब्रुवारींत आपल्याक कळयनासतना मतदारसंघांत कार्यावळ आयोजीत केली म्हूण तांणी आदिवासी कल्याण संचालकाक केल्लो फोन बरोच व्हायरल जाल्लो. नट शरद पोंक्षे हांचेर केल्ले आरोपूय गाजिल्ले. एका काळार घटमूट आशिल्ली कला अकादमी दुयेंत पडिल्ल्यान त्या खात्याचे मंत्री ह्या नात्यान गोविंद गावडे हांचेर सगल्यांनीच खर टिका केल्ली. हातूंत विरोधी पक्षूच न्हय, तर कलाकारांचोय आस्पाव आशिल्लो. अजून हें आंदोलन सोंपूंक ना. आनी आतां हो भ्रश्टाचाराचो आरोप. ह्या खात्याचे मंत्री सध्या खुद्द मुख्यमंत्री आसात. ताका लागून सरकारांतले मंत्रीच न्हय, तर भाजपाय तिडकल्या.. आनी तें साहजिकूच आसा. कारण सध्या भाजपाचें सरकार सत्तेर आसा आनी तांच्या मंत्रीमंडळाचोच एक वांगडी तांकां घरचो आहेर दिता म्हणटकच प्रकरण तापतलेंच. मंत्री गावडे हांणी अशें उलोवचें पयलीं मुख्यमंत्र्यां कडेन उलोवपाक जाय आशिल्लें, अशें सभापती तवडकार हांणी सांगलें. तर आरोप म्हज्या खात्या कडेन संबंदीत नाशिल्ल्यान हांव उलोवंक शकना, अशें पर्यटन मंत्री खंवटेन म्हणलां. भाजपाध्यक्ष दामू नायक हांणी मात कडक प्रतिक्रिया दिल्या. उखल्ली जीब आनी लायली ताळ्याक, हें दर खेपे सोंसून घेवचे नात. भाजपा हो शिस्तीचो पक्ष. असलीं बेजापसालदारपणा चलचीं नात. पक्ष योग्य ती कारवाय करतलो, अशी शिटकावणी तांणी दिल्या. आदले खासदार नरेंद्र सावयकार हांणी एका वाक्याचो सूचक कमेंट केला, ‘जेन्ना उदक माथ्या वयल्यान व्हांवता’. ही म्हण सगल्या भाशांनी आसा. खंयचीय स्थिती नियंत्रणा भायर वता, म्हणजे गंभीर, कठीण जाता, तेन्ना ही म्हण वापरतात. ‘जबाबदार मंत्र्यांनी जापसालदारकेन वक्तव्यां करपाक जाय. आमी ह्या विधानाची दखल घेतल्या. रोखडीच तांचेर योग्य ती कारवाय जातली’ अशें मुख्यमंत्री डाॅ. प्रमोद सावंत हांणी स्पश्ट केलां. खासदार सदानंद तानावडे हांणी ‘फटीचीं विधानां करचे पयलीं मुख्यमंत्र्यां कडेन उलोवपाक जाय आशिल्लें’ अशें म्हणलां.
विरोधकांनी पेंगट बांदलां. आमी इतलीं वर्सां करताले, तोच भ्रश्टाचाराचो आरोप मंत्री गावडे हांणी केला. आतां ते ताचेर ठाम रावतले काय पक्षाच्या चेपणा उपरांत पांडुरंग मडकयकार हांचे भशेन यू टर्न घेवन फाटीं सरतले, होच खरो प्रस्न, अशें काँग्रेसीन म्हणलां. लाच घेवन फायली पास जाता असो आरोप जाला, तेन्ना मुख्यमंत्र्यान कारवाय करची, अशें गोवा फाॅरवर्डाक दिसता. सध्या मंत्री गावडे देशा भायर आसात, ते 29 मेक येतकच फुडलें कितें तें घडपाक शकता.
ह्या प्रकरणाक लागून भ्रश्टाचारा आड कारवाय करपाची भांगरा संद आयिल्ली. श्रमशक्ती भवना सकयल कोण भ्रश्टाचार करता जाल्यार गुपचूप ताका धरपाक मेळपाचो. मात आतां सगलेच सादूर जाल्यात आसतले! आतां उरले आदिवासींचे प्रस्न. विधानसभा वेंचणुकांनी तांकां राखीव जागे दिवपाचें उतर केंद्र आनी राज्य सरकारान दिलां. आदिवासी भवनाचो प्रस्न तडीक लावपाचो उरला. सगल्यांनी मतभेद विसरून एकठांय येवन यत्न केल्यार आदिवासींचे प्रस्न सुटपाक उशीर लागचो ना. कसलीय घडामोड जाली काय राजकी परिणाम जातात. पूण ताका लागून समाजमन अस्वस्थ जावंक फावना. गोंयांतल्या प्रशासनानूय प्रामाणीक, पारदर्शक जावचें. म्हणटकच फायल सयकल वयर व्हरपाचो वेळूच तांचेर येवचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
