भांगरभूंय | प्रतिनिधी
कोलवाळ बंदखण कायम वादाच्या भोंवऱ्यांत घुंवत आसता.बंदखणींतले कैदी स्वताच्या मनाक येता तशे वागतात. कांय कर्मचारी चार पयशांचे आशेन तांकां साबार सुविधा, ड्रग्स, फोनाची पुरवण करतात. कैद्यांचे इश्टूय तांकां बेधडक घुंवळे वखदां हाडून दितात हें पयर उक्तडार आयलां. खंयचेय बंदखणींत अशें सदांच चर्चेंत उरप हें बऱ्याचें लक्षण न्हय. बंदखणींत गुन्यांवकार सुदारचे म्हूण दवरतात, नवे गुन्यांवकार घडोवपाक न्हय. मात, कोलवाळे दवरिल्ले कांय कैदी सुदारचे बदला आनीक इबाडपाक लागल्यात. बंदखणीच्या टेहळणी टाॅवर्सां कुशीक गांजाचे आठ गुळे (बाॅल) मेळ्ळ्यात. तांचें मोल देड लाख रुपया इतलें आसा. खुनाच्या आरोपा खाला कैद भोगपी म्हापशेंच्या कांय गुन्यांवकारां खातीर ते पाकिटांत बंद करून थंय हाडून उडयिल्ले, असो दुबाव आसा. ह्या प्रकरणांत तीन तरणाट्यांक अटक केल्या. तर एका नेण्ट्या भुरग्याक ताब्यांत घेतला. हे खंय त्या गुन्यांवकारांचे इश्ट. चवकशी मुखार सरता तशी आनीक म्हायती उक्तडार येत रावतली. कोलवाळ बंदखणींतले गैरप्रकार बंद करपाक कितें करपाक मेळटलें, ताचेर आतां झुजा पांवड्याचेर यत्न जावंचे.
पुलीस स्टेशन, बंदखण म्हणटकच आदल्या तेंपार लोकांक घाम सुट्टालो. ते वटेन वचपाक पसून थोडे भियेताले. मात आतां सगलेच धाडसी जाल्यातशे दिसता. नाजाल्यार कंवळे पिरायेचो नेण्टो भुरगो खुद्द बंदखणी लागसार वचून गुन्यांव करपाचें धाडस करचो नासलो. ह्या सगल्या प्रकरणांत बंदखणींतले कर्मचारी, कामगार, अधिकारी हांचो हात आसा असो दुबाव कांय जाण उक्तायतात. एक- दोगांक अटक करून कांय म्हयन्यां पयलीं निलंबितूय केल्यात. आनी हीच चड तिडक हाडपी गजाल. वंयूच शेत खाता, तातूंतलोच हो प्रकार जालो. कोलवाळ बंदखणींत कित्याक लागून घडटां हें? कर्मचारी उणे आसात? तांकां प्रशिक्षण ना? खांप्या गुन्यांवकारांक घुंवळे वखदां वा हेर सवलती दितना ते कित्याक सांपडल्यात? कैद्यांचो आंकडो चड आसा? कैद्यांक काम दिनात? कोणाचें कर्मचाऱ्यांचेर, कैद्यांचेर चेपण आसा? वेंचीक कर्मचारी, कैद्यां कडेन उलयल्यार हाचेर चवकशी अधिकाऱ्यांक वेगळें कितें सांपडूं येता.
कोलवाळ बंदखणींतली सुरक्षा आनीक कडक करपाचो वेळ आयला. हे खातीर सीसीटीव्ही, मोबायल जॅमर आनी हेर सुविधांचो वापर करूं येता. कांय सुविधा आसात. पूण तरीय कैदी आपणाक जाय ते करतात खंय. कैद्यांचे हालचालींचेर लक्ष जाय. ते खातीर खास पंगड नेमूं येता. तांकां दर स म्हयन्यांनी अहवाल सादर करपाक लावन ते प्रमाण उपाय- येजवण्यो चालीक लावं येतात.
कोलवाळचे हे नवे बंदखणीचें उक्तावण 30 मे 2015 दिसा जाल्लें. ताचेर सुमार 100 कोटीं रुपया खर्च जाला. बंदखणींत 624 कैद्यांक दवरूंक मेळटा. थंय सादारण पांचशेच्या आसपास वा केन्नाय 700 मेरेन कैदी आसतात, अशें आंकडे सांगतात. कैदी दवरपाची तांक, कर्मचाऱ्यांची संख्या वाडोवपाची गरज आसल्यार तशें पावल सरकारी यंत्रणांनी उखलचें. ह्या बंदखण प्रकल्पांत कर्मचाऱ्यांक रावपाक घरां, हाॅस्पिटल, सभाघर, रांदचीकूड आनी हेर सुविधा आसात. पूण भोवतेक सुविधांचो, इमारतीचो, शौचालयांचो दर्जो तितलोसो बरो ना, अशें फाटीं मनीस हक्क आयोगान म्हणिल्लें. ते बाबतींत बेगीन सुदारणा जावप गरजेचें. घुंवळे वखदां वा हेर भायलें सामान नेमकें कोणा कडेन वता, तें तपासून संबंदीत कैद्यांक वेगळे दवरपाक जाय. तांचेर चड लक्ष दवरूंक जाय. हांगाचे कांय कैदी आक्रमकूय आसात. कर्मचाऱ्यांक मारपेट करपाच्यो बऱ्योच घडणुकोय घडल्यात.
कोलवाळ बंदखण प्रकरण आतां गळ्या कडेन आयलां. वर्साक 4- 5 फावटी थंय कितें ना कितें जाताच. हें कायमचें थांबचें, अशें सरकारी यंत्रणांक दिसना?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
