भांगरभूंय | प्रतिनिधी
डॉ. चंद्रकांत शेट्ये : दिवचले आयज शिगमो मिरवणूक
भांगरभूंय । प्रतिनिधी
दिवचल : परंपरीक शिगमो हें गोंयचे सांस्कृतीक दायजाचें दर्शन घडोवपी संचीत आसा. सगळे लोक ह्या उत्सवांत उमेदीन वांटो घेवन आगळी खोस अणभवतात. बिरेस्तारा 20 मार्चाक दिवचले जावपी शिगमो उत्सव मिरवणुकेंत व्हड संख्येन वांटो घेवन खोस आनीक वाडोवची, असो उलो दिवचल शिगमोत्सव समितीचे अध्यक्ष आमदार डॉ. चंद्रकांत शेट्ये हांणी मारलो.
शिगमोत्सवा निमतान समिती वतीन श्री शांतादुर्गा देवूळ, कोटेश्वर देवस्थान, शांताराम मठ मंदीर ह्या सुवातांचेर देवांक नाल्ल दवरून सांगणें करून आशिर्वाद घेतले. ह्या वेळार नगराध्यक्ष विजयकुमार नाटेकार, तशेंच हेर नगरसेवक, समितीचे पदाधिकारी व्हड संख्येन हाजीर आशिल्ले.
बिरेस्तारा सांजेच्या 4.30 वरांचेर बोड्ड्यां श्री वडेश्वराच्या पांया कडेन नाल्ल दवरून गाराणें घालून शिगमो उत्सव मिरवणुकेक सुरवात जातली. चित्ररथ, रोमटामेळ, लोकनाच, वेशभुशा सर्त आनी मिरवणूक जातली. तशेंच विवीध गटांतल्यो वेशभुशा सर्त सांजेच्या 5 वरांचेर छत्रपती शिवाजी महाराज मैदानाचेर जातल्यो. ह्या सगळ्या मिरवणूक आनी सर्तींक व्हड संख्येन हाजीर रावचें, तशेंच सगळ्यांनी वेळाचें वंधन पाळचें, अशें शिगमोत्सव समिती वतीन कळयलां.
येरादारी मार्गांत बदल
शिगमो उत्सवाचे मिरवणुके खातीर येरादारींत बदल केला. 20 मार्चाक सांजेच्या 5 वरां सावन बायपास रस्त्या वयल्यान येरादारी घुंवडायतले. मार्केट पॉयंटा कडेन गाडयो व्हरपाक मेळच्यो नात. सगळ्यांनी आदार करचो, असो उलो दिवचल शिगमोत्सव समिती आनी येरादारी विभागा वतीन मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
